Уэйн Руни «Манчестер Юнайтед»нинг энг яхши тўпурарига аталган совринни шахсан сэр Бобби Чарлтондан қабул қилиб олди. «Барселона» иштирокидаги ўйин инобатга олинмаган гол туфайли можаро билан якунланди. «Ювентус» Италиядаги рақобатчиларидан анча ўзиб кетди. Германияда террорчиликка алоқадорликда айбланган футболчи клубдан ҳайдалди. Ўтган дам олиш кунлари рўй берган шу ва бошқа муҳим воқеалар диққатингиз марказида.

Клопп омадсизлик гирдобида

Ўтган ҳафта Англия кубогининг 1|16 финал учрашувлари ўтказилди. Улар орасида «Ливерпул»нинг «Вулверхэмптон»га ютқазиши энг кутилмаган натижа сифатида баҳоланди. Мерсисайдликлар илк дақиқадаёқ гол ўтказиб юборишган бўлса, танаффус арафасида рақиб ҳисобдаги устунликни яна биттага оширди. «Ливерпуль» эса ўйин охирида ягона жавоб тўпини йўллаш билан кифояланди. Ушбу натижа айниқса, Юрген Клопп учун оғриқли кечди, зеро германиялик мутахассис 2007 йилдан буён ўз уйида уч марта имкониятни бой бермаганди. У сўнгги марта «Майнц»да ишлаётган кезлари шундай ҳолатга тушганди.

Шунингдек, нуфуз борасида Англияда бешинчи ўринда турадиган дивизион вакилларининг мамлакат кубоги 1|8 финалига йўл олишлари ҳам кўпчиликни ҳайрон қолдирди. Бунақаси турнир тарихида кузатилмаганди. «Саттон Юнайтед» кичик ҳисобда «Лидс»дан устун келди, «Линкольн Сити» эса «Брайтон энд Хоув Альбион»ни мағлубиятга учратди - 3:1.

Бошқа эътиборга молик воқеалар Манчестерда рўй берди. «МЮ»нинг «Уиган»га қарши баҳси бошланиши арафасида «Қизил иблислар» ҳужумчиси Уэйн Руни клубнинг энг яхши тўпурарига аталган совринни қўлга киритди. У бир ҳафта муқаддам «Сток Сити» билан ўйиннинг сўнгги дақиқаларида ҳисобни тенглаштириб, «Манчестер Юнайтед» либосидаги 250-голини урганди.

Футболчига мукофотни «МЮ»нинг бошқа бир тўпурари сэр Бобби Чарльтон топширди. Учрашув эса манчестерликларнинг йирик (4:0) ғалабаси билан якунланди. Тўғри, Руни шу куни гол урмади, аммо Бастиан Швайнштайгер ўз номини таблога ёздириб қўйди. Эътиборлиси, 32 ёшли германиялик ярим ҳимоячи 385 кундан сўнг илк марта «МЮ» бошланғич таркибига киритилди.

Ўтган дам олиш кунларининг энг омадсизи сифатида «Халл Сити» аъзоси Абель Эрнандесни кўрсатиш мумкин. Маҳоратли ҳужумчи «Фулхэм»га қарши баҳснинг сўнгги дақиқаларида иккита пенальтини аниқ амалга ошира билмади. Унинг дастлабки зарбасини дарвозабон Маркус Беттинелли қайтарганди, аммо Эрнандес қайтган тўпга етиб бориб, тепмоқчи бўлганида кипер унга нисбатан қўполлик ишлатди. Натижада ҳакам яна «нуқта»га ишора қилди. Буни қарангки, Беттинелли иккинчи уринишда ҳам устунлик қилиб, дарвозаси дахлсизлигини сақлаб қолди. Эҳтимол, бунақаси футбол тарихида кузатилмагандир.

«Барселона» видеотакрорлар тарафдори

Испания примеросининг 20-тури «Реал» таъқибчиларининг қоқилишлари билан ёдда қолди. «Барселона» ва «Атлетико» кутилмаганда дуранг қайд этишган бўлса, «Севилья» қаторасига бешта ўйиндан иборат ғалабали сериядан сўнг мағлубиятга учради.

«Матрасчилар»нинг «Алавес»га қарши баҳсида мухлислар гол кўришмади, аммо футболчиларнинг асаби дош бермади. Қизиғи, Дейверсон Брум ва Диего Годиннинг бир-бирларига қилган ҳурматсизликларини ҳакам бор-йўғи «сариқ» билан «сийлади».

«Барселона» эса «Бетис» билан ўйинда ютқазиб қўйиши ҳам мумкин эди. Учрашув якунланишига 15 дақиқа қолган бир паллада майдон эгалари ҳисобда олдинга чиқиб олишди. Каталонияликларни эса мағлубиятдан Луис Суарес қутқариб қолди: уругвайлик ҳужумчи шериги Лионель Мессининг қойилмақом пасини кўкка совурмади - 1:1.

Умуман, баҳсдан сўнг 78-дақиқада «Барса» томонидан урилган голнинг инобатга олинмагани кўп муҳокама қилинди. «Бетис» ҳимоячси Айсса Манди дарвоза чизиғини кесиб ўтган тўпни тепиб юборганди, бироқ мазкур ҳолат ҳакамлар назаридан четда қолди. Натижада Луис Энрике видеотакрорларга эҳтиёж туғилаётгани ҳақида чиқиш қилди: «Аввал ҳам айтганимдек, технология ёрдам бериши мумкин. Ҳакамларнинг кўмакка муҳтож эканликлари кўриниб турибди».

Шунга қарамай, ушбу дурангдан сўнг «Барселона» иккинчи ўринга чиқиб олди, зеро «Севилья» сафарда «Эспаньол»га ютқазганди - 1:3. Учрашув бошиданоқ меҳмонларнинг ўйинлари чиқмади: 2-дақиқада Николас Пареха ўз жарима майдончасида қўполлик ишлатиб, майдондан четлатилгач, Хосе Антонио Рейес пенальтини аниқ амалга оширди. Андалусияликлар Стеван Йоветичнинг саъй-ҳаракатлари эвазига ҳисобни тенглаштиришганди, бироқ камчиликда қолишгани ўз сўзини атиб, яна иккита тўп ўтказиб юборишди.

«Реал» эса, ўз навбатида, рақобатчиларнинг очко йўқотишларидан унумли фойдаланиб, «Сосьедад»ни 3:0 ҳисобида мағлуб этди. Голларга Матео Ковачич, Криштиану Роналду ҳамда Альваро Мората муаллифлик қилишди. Шу тариқа мадридликлар энг яқин таъқибчиларидан тўрт очкога ўзиб кетишди. Боз устига, «Қироллик клуби» захирасида яна битта ўйин бор.

Дибала - норози

Италияда ҳам худди шунга ўхшаш ҳолат кузатилди: «Ювентус»нинг чемпионлик йўлидаги асосий рақобатчилари - «Рома» ва «Наполи» очко йўқотишди. «Кекса синьора» эса «Сассуоло»ни 2:0 ҳисобида енгди. Гонсало Игуаин «А» серияда қаторасига олтинчи ўйинда гол муаллифига айланди. Мазкур баҳснинг «қаҳрамони» сифатида Пауло Дибалани кўрсатиш мумкин. Гап шундаки, 77-дақиқада захира ўйинчисига алмаштирилган аргентиналик футболчи намойишкорона тарзда Массимилиано Аллегрига норозилик билдирди: бош мураббийнинг қўлини сиқишни хоҳламади. Мутахассис эса мазкур ҳолатни хотиржам тарзда қабул қилди.

«Дибала ранжиди, аммо бу ўйиннинг бир қисми. У ёмон ўйнамади, лекин Паулонинг ёнида тўп сурган Манжукич ва Куадрадо яхшироқ кўринишди, шу боис Марко Пьяцага майдонга тушиш имкониятини тақдим этдим. Ушбу воқеа муносабатларимизга таъсир ўтказмайди. Баъзан футболчиларнинг мураббий қарорига норозилик билдиришлари нормал ҳолат, шу боис, Дибалани тўғри тушунаман. Бўлар иш бўлиб ўтди», - деди Аллегри La Gazzetta dello Sport нашрига берган интервьюсида.

Ушбу турга қадар қаторасига тўртта ўйинда зафар қучган «Рома» «Сампдория»га ютқазди - 2:3. Ваҳоланки, римликлар икки марта ҳисобда олдинга чиқиб олишганди, аммо якунда мағлубиятга учрашди. Икки самарали пас бериб, ғалаба голини урган колумбиялик Луис Мурьель учрашув қаҳрамонига айланди.

«Милан» «Удинезе»га имкониятни бой берган бўлса (1:2), «Наполи» «Палермо»ни мағлубиятга учратолмади. Шунга қарамай, «Интер»нинг ишлари юришиб кетди. Франк де Бур бошчилигида мавсумни ўта ёмон бошлаган жамоа аста-секин ўзига келмоқда. 22-турда «нерадзурри» «А» сериядаги қаторасига еттинчи ғалабасини қўлга киритди. Кейинги турда «кўк-қоралар»ни сафарда «Ювентус»га қарши баҳс кутиб турибди.

«Хоффенхайм»нинг мавсумдаги илк мағлубияти

Чемпионлик учун курашаётган «Бавария» ва «Лейпциг» ишончли ғалабани нишонлашган бўлса, «Хоффенхайм» бундеслига дебютантига ютқазди. Эътиборлиси, «кўк-оқлар» кучли бешлик чемпионатларининг жорий мавсумида  ютқазмаган ягона жамоа бўлиб туришганди. Ваҳоланки, учрашув бошида «Хоффенхайм» ҳисобда олдинга чиқиб олганди. Бироқ танаффусга қадар «Лейп­циг» мувозанатни тиклади, иккинчи бўлимда эса меҳмонлар яна битта тўп ўтказиб юборишди.

«Бавария» эса «Вердер»га қарши баҳсда Арьен Роббен ва Давид Алабанинг голларига эвазига устунликка эришиб турганди. Бироқ танаффусдан сўнг бременликлар битта гол уришди. Натижада чемпионат етакчиси қолган дақиқаларни асабий руҳда ўтказди. Баҳсдан сўнг Карло Анчелоттининг жамоаси ўйинидан қониқмагани бежиз эмас, албатта.

«Ўйин қийин кечди, лекин биз ҳақли ғалабага эришдик. Ўтказиб юборилган голдан сўнг муаммоларга йўлиқдик. «Вердер» яхши ўйнади, айниқса, иккинчи бўлимда. Мавсум давомида мураккабликларнинг кузатилиши одатий ҳол», - деди «Бавария» устози.

Шунингдек, «Майнц» билан 1:1 ҳисобида дуранг ўйнаган «Боруссия» (Дортмунд) учинчи ўринни «Айнтрахт»­га бўшатиб берди.

Энг қийин аҳволда қолган клуб сифатида «Дармштадт»­ни кўрсатиш мумкин. Жамоа навбатдаги турда «Кёльн»дан олтита тўп ўтказиб юборгани етмаганидек, кутилмаган сабаблар туфайли футболчиларини йўқотмоқда. Клуб террорчиликка алоқадорликда гумонланаётган тунислик ярим ҳимоячи Энис Бен-Хатира билан хайрлашишга мажбур бўлди. Ўйинчи айбловни рад этишига қарамай, «Дармштадт» фикрида қатъий қолди.

«Вазиятни таҳлил қилиб, ушбу ҳамкорликка чек қўйиш лозим, деб ҳисобладик. Энис жамоада ўзини яхши томондан кўрсатганди. Унинг келгусидаги фаолиятига омад тилаймиз», - дейилади клубнинг расмий сайтидаги баёнотда.

Роналдиньо Парижга қайтди

Франция чемпионатининг 22-тури марказий учрашуви амалдаги чемпион «ПСЖ» ва пешқадам «Монако» ўртасида кечди. Ўйин катта қизиқишга сабаб бўлганини парижликларнинг собиқ футболчиси Роналдиньонинг ҳам стадионга ташриф буюрганидан сезиш мумкин. Ҳаттоки, бразилиялик юлдузга ўйин бошланишидан олдин дастлабки рамзий зарбани йўллаш имконияти тақдим этилди.

Дастлабки 45 дақиқаликда кичик устунлик «ПСЖ» томонида бўлди, Лига 1 тўпурари Эдинсон Кавани бир нечта қулай вазиятлардан фойдалана билмади. Танаффусдан сўнг майдон эгалари асосий дарвозабонсиз қолишди. Жароҳат олган Кевин Трапп ўз ўрнини Альфонс Ареолага бўшатиб берди.

Мухлислар учрашув охирларига келибгина голларни кўришди. Финал ҳуштаги янграшига 10 дақиқа қолганида парижликлар пенальтидан унумли фойдаланишди, бироқ «Монако» Бернарду Сильванинг аниқ зарбаси эвазига мағлубиятдан қутулиб қолди.

Айни пайт Франция чемпионати турнир жадвалида қўшҳокимлик юзага келган, чунки «Ницца» монаколиклардан фарқли равишда ўз ўйинида ғалаба қозонди.

Ушбу турда кузатилган яна бир эътиборга молик жиҳат сифатида «Марсель» ҳужумчиси Бафетимби Гомиснинг «хет-трик»кини кўрсатиши мумкин. Форвард нафақат «Олимпик»нинг «Монпелье» устидан 5:1 ҳисобида ғалаба қозонишини таъминлади, балки 115та гол билан Лига 1нинг амалдаги энг яхши тўпурарига айланиб олди. Гомис ушбу кўрсаткич бўйича ёзда «ПСЖ»дан «МЮ»га ўтган Златан Ибрагимовични орт­да қолдирди.

Russian.rt.com - А.АҲМЕДОВ тайёрлади