Хабарингиз бўлса, «Сурхон» (Термиз) бу йил биринчи лигада Сурхондарё вилояти шарафини ҳимоя қилади. Бу клуб аввалги мавсум «Нефтчи» (Жарқўрғон) ва вилоятнинг бошқа жамоаларида тўп сурган маҳаллий футболчилар ҳисобига шакллантирилади. Термизда профессионал клуб фаолиятини йўлга қўйиш бўйича қатор ишлар амалга оширилмоқда. Сурхондарё вилояти ҳокимлиги ҳамда «Сурхон» раҳбарияти футболчиларга қулай шарт-шароитлар яратиш йўлида барча имкониятларни ишга соляпти. ПФЛ талабига кўра, ҳар бир клуб ўз рамзи (логотипи) ва байроғига эга бўлиши лозим. Шуни ҳисобга олган «Сурхон» раҳбарияти муносиб логотип танлаш мақсадида танлов эълон қилди. Унда профессионал дизайнерлар қатори мухлислар ҳам ўз ижодий ишлари билан қатнашиш ҳуқуқига эгалар. Логотипда футбол элементларидан ташқари, Сурхондарё вилояти, шунингдек, кўҳна ва ҳамиша навқирон Термиз шаҳри тимсолини ифодалувчи белгилар акс этиши шарт. Келаси йили «Сурхон»нинг ярим асрлик тўйи нишонланади. Воҳаликлар мавсумни анъанавий сариқ ва кўк ранг­ли формада ўтказишни режалаштирмоқдалар. Логотип яратишда бунга ҳам эътибор қаратиш лозим. Танлов 12 февралга қадар давом этади.