Ёсин бин ал Манни ким ўзи?
«Ньюкасл»нинг ушбу дебютанти ҳозир кўпчиликнинг оғзида. Боиси унинг ижросидаги жарима зарбаларидан кейин тўп ғоят гўзал тарзда дарвоза «тўққизлиги»дан жой олмоқда. Бундан ташқари, у рақиб ўйинчиларини ноқулай аҳволга солиб келяпти. Айтайлик, тўпни оёқлар орасидан олиб ўтиш унинг энг севимли финтларидан биридир. Хўш, бу бола ўзи ким ва қаердан пайдо бўлди? Бу саволга жавоб топишга ҳаракат қиламиз.
- Буларнинг ҳаммасини қаердан ўргандим? Аслида, Роналдиньо, Лео Месси, Робиньо ва Криштиану Роналдулар иштирокидаги лавҳаларни YouTubeда кўрардим. Улардан бирор нарсани ўрганиб, такрорлашга ҳаракат қилардим.
Ўтган ҳафта Англия кубоги доирасидаги «Ньюкасл»-«Бирмингем» ўйинида 21 ёшли Ёсин бин ал Манни «олақарғалар» сафидаги дебютини ўтказди. ғалабали беллашувда у 70 дақиқа майдонда ҳаракат қилди. «Хўш, нима бўлибди?» деган ўринли савол туғилиши табиий. Гап шундаки, олти ой олдин «Ньюкасл» уни руйхатдан ўтказганида у бор-йўғи YouTubeдаги фристайллар юлдузи эди, холос. Энди эса ўринбосарлар сафида 8та ўйин ўтказиб, асосий таркибгача етиб келишга муваффақ бўлди. Ёсин ўз машҳурлигига Rule m Sports каналидаги ролик сериялари туфайли эришди. Бу лойиҳа энг зўр британиялик видеоблогерлар томонидан яратилган бўлиб, машҳурликка эришган. Ёсин иштирокидаги роликларни тахминан ярим миллионга яқин киши томоша қилди ва улар орасида «Ньюкасл» офисидагилар ҳам бўлишган. Йўқса, «Челси» кўригидан ўтолмаган ўйинчи бу ишни қандай қилиб Англиянинг шимолий-шарқида уддалади?
1995 йили Лондонда туғилган ал Маннининг келиб чиқиши марокашликдир. Унинг фамилияси ва исми ҳам бундан далолат бериб турибди. Унинг ота-онаси африкалик, ўзи эса лондонлик бўлишга эришди. Бироқ бу нарса унга ҳеч қандай имтиёз бергани йўқ. «Ньюкасл»гача Ёсин атиги кўча футболи ва Британия футболининг энг қуйи табақаларида иштирок этадиган «Барнета», «Алдершот», «Фарнборо» ва «Льюис» каби жамоаларнинг ёшлари таркибида ўйнаш билан кифояланган. Уларнинг фақатгина охиргисида ишлари бироз яхши кетган. Ал Маннини ўзи ҳам буни тан олади. Ўтган йили у ҳатто, «Челси» кўригида бўлиб, кимсан Гус Хиддинк бошқарувида асосий таркиб билан шуғулланди. Ўринбосарлар сафидаги дебют ўйинида гол урган бўлсада, кўрикдан барибир, ўтолмади.
- Бу воқеаларнинг ҳаммаси менга ёрдам берди. Шунча йиллик «дарбадарлик»дан кейин «Ньюкасл»да тақдим этилган имкониятни қўлдан бой бермаслигим керак, - деди Ёсин.
Яқинда «Ньюкасл» ёшлар жамоаси мураббийи Питер Бирдсли ҳам ўз шогирдининг истеъдоди ҳақида илиқ фикрлар билдирди.«Ҳужумда унда ҳеч қандай муаммо йўқ. Фақат ҳимоячиларга ёрдам бериш учун орқароқда ўйнашни ҳам ўрганиши керак. қачон прессингга қўшилиб, ёрдам беришни тушуниб олиш лозим. Шунга қарамай, у ажойиб йигит ва ҳаммасини тез ўрганяпти», - деди Питер. Бундан ташқари, мураббий шундай кадр учун клуб скаутлар бўлими бошлиғи Стив Никсонга миннатдорчилик билдирди. Тўғри-да, бир томондан, фаолияти охирлаган йигитни жамоага олиб келиш - анча мардонавор қарор. Бошқа томондан, «Льюис»даги фаолиятининг охирида уни «қуйи лигаларнинг Риёд Маҳрези» деб атай бошлашди. Бундан ташқари, у Неймар ва Криштиану Роналдунинг устози ролида ҳам кўриниш берди.
- Мен Sports on Screen компаниясининг реклама акциясида иштирок этдим. Неймар билан ишлаш учун Барселонага бориб келишга тўғри келди. Менинг вазифам унинг ролини дубляж қилиш ва ўзи ҳали бажара олмайдиган бир жуфт трюкларни кўрсатишдан иборат эди. Эшитган нарсангни такрорлашга уринишдан кўра, уни кўриш доим осонроқ бўлган», - деди футболчи The Daily Mailга берган интервьюсида.
Кейинроқ футбол бутсалари рекламасида Криштиану Роналду билан ишлашга муваффақ бўлди. Ўшандан бери реклама компаниялари ал Маннини бир дақиқага ҳам тинч қўйишмаяпти. Вазифа ҳар доим режиссёр кўрсатмаси билан трюклар ижро этишдан иборат бўлган, кейинчалик актёрлар уларни камерага такрорлашади. Яқин орадаги рекламаларда Ёсинни дублёр сифатида эмас, балки бош роль ижрочиси сифатида кўрсак, ажабмас.
«Ньюкасл»га келгач ишқибозлар жамоага оддийгина фристайлер келди, деб қўрқишганди, аммо кейин маълум бўлишича, кўча ўйини Ёсинга ақл бовар қилмас техникадан ташқари, бошқа нарсаларни ҳам берди.
- Мен футзал ҳам ўйнаганман, у ерда ҳудуд торроқ, шунинг учун энди катта футболда ўйинни яхшироқ ўқий оляпман. Кўча футболи мураббийларсиз ҳам ҳамма нарсани ўзинг ўрганишинг учун имкон беради, мен бунинг уддасидан чиқдим. Одамларга нималарга қодирлигимни кўрсатишни хоҳлайман. Чемпионшипда ҳам жамоага ёрдам бера оламан, деб умид қиламан. Мен юқори савияда ўйнашни истайман. Умид қиламанки, бунга «Ньюкасл» билан бирга эришаман»
Ёсин бин ал Маннининг ҳаёти - орзуси туфайли катталар футболида дебют қила олган оддийгина йигитчанинг тақдиридир. қанчалик жарангдор бўлмасин, лекин Ёсин ўз машғулотларини камерага олиш орқали ютуққа эришиш мумкинлигини ўзининг мисолида кўрсатиб бера олди.
А.ИСРОИЛХОНОВ тайёрлади
Манба: www.interfutbol.uz
InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20