Бугун Европа чемпионлар лигаси мусобақасининг марказий ўйинларидан бири Манчестер шаҳрида бўлиб ўтади. Бу ўйин аҳамияти битта учрашувда ҳал бўлмасада лекин бугунги беллашув чинакамига қизиқарли ва рақобатбардош бўлишини аввалдан таҳмин қилиш мумкин. Ҳўш, бугун Гвардиоланинг нозик усули натижа келтирадими? Ёки Леонарду Жардимнинг футболга бўлган ёввойи қарашлари?

ЎЙИН ҲАҚИДАГИ ҲАЯЖОНЛАР

АПЛ чемпионатида жавлон ураётган «Манчестер Сити» жамоаси ҳимоячилари негадир ишончсиз ўйнашмоқда, барчанинг ёқимтойига айланиб бораётган Жон Стоунз бора-бора «Этихад» стадионида энг ёмон кимсалардан бўлиб қолмоқда.

«Монако»да эса аксинча, Евро мавсумнинг энг яхши ҳужумчилари тандемини ҳосил қилган Фалькао, Жермен, Силва ва Лемар бугунги ўйинда Гвардиоланинг Манчестердаги ҳаётини қийинлаштириб юбориши мумкин.

Каталониялик мутахассис плей-оффга йўл олишдан аввал ўтказилган матбуот анжуманида ҳам агар «Манчестер Сити» «Монако» жамоасига тўғри келгудек бўлса, францияликлар тўсиғидан ўтиб олиш қийинлашишини айтиб ўтганди.

Лекин, бугунги ўйинга келадиган бўлсак, «Манчестер Сити» ўз майдонида тўп суришини. инобатга олиб, мезбонларда имконият бироз юқори эканлигини айтиш мумкин. Унинг устига Гвардиола шогирдлари хар мавсум ЕЧЛнинг 1/8 финалидан осонликча кейинги босқичга ўтиб келишган.

Пеп жамоанинг ишонган ҳимоячиси Винсент Компани ва «бразилиялик йигитча» Жезусни жароҳати туфайли майдонга тушира олмайди, монаколиклар эса «яратувчи» вазифасида ҳаракатланадиган футболчи Бошилисиз ўйинни ўтказишга мажбур бўлишади.

ШАҲС

СЕРХИО АГУЭРО

Ҳақиқатдан ҳам ҳақиқат аччиқ бўлади деганлари тўғри экан. Кўп йиллик умр кунларини «Манчестер Сити»га бағишлаган Серхио Агуэро ўрнини узоқ Бразилиядан ташриф буюрган Габриэль Жезус бир зумда эгаллаб оладими?

Аргентиналик футболчи аста-секинлик билан «Манчестер Сити»дагт етакчи номини йўқотаётган бир пайтда, юқорида келтириб ўтган Габриэль Жезус исмли футболчининг жароҳати Агуэрони мана икки – уч ўйиндирки яна майдонга қайтишида омил бўлиб хизмат қилмоқда.

Бразилиялик ёш иқтидор соҳиби жароҳат олгани чиндан ҳам Агуэрони майдонга қайтиб «шаҳарликлар» мухлисларнинг ўзига бўлган ишончини қайтаришида катта ҳисса қўшади.

Бугун «Манчестер» машинаси таркибида Серхиодек кучли ҳужумчи иштирок этади, аргентиналик футболчининг ЕЧЛ гуруҳ босқичида ўтказган 6та ўйинда урган 6та голини ҳисобга олиш даркор. У бугун ўша голлар сонини яна кўпайтириш имкониятига эга.

РАДАМЕЛЬ ФАЛЬКАО

Радамель Фалькаони танийсизми? Албатта, уни Англия чемпионатинг етакчи жамоалари таркибида фаолият олиб борганидан яхшигина хабарингиз бор.

Лекин, унинг «туманли ўлкада» ўзидан яхши хотиралар сақлаб қолганини эслай олмаслигингиз мумкин.

Чунки, «МЮ» ва «Челси» каби гранд жамоалар сафида фаолият олиб борган «омадсиз» лақабли ҳужумчи Францияга қайтиб кетма-кет голлар уришни бошлаб юборди.

Тўғри, уни Англияда гол урмади десак хато қилган бўламиз-у, аммо Фалькао каби ҳужумчига 36та ўйинда 5та гол уриш бу ярашмайдиган, ўта ярашмайдиган ҳолат. («Манчестер Юнайтед», ўйин 26-4, «Челси» 10-1).

Франция чемпионатига қайтган колумбиялик ҳужумчи ҳисобида айни пайт 28та ўйинда урилган 22та гол мавжуд бўлиб турибди.

Кўрамиз, қайси жамоа ҳужум чизиғи кучли бўлса, айнан мана-шу жамоа бугунги қизиқарли баҳсда ғалабага эришади.

Иккала жамоа имкониятларидан келиб чиқиб, ўйин ҳисобини аввалдан таҳмин қилиш мушкул. Лекин нима бўлган тақдирда ҳам биз бугун Манчестерда ҳақиқий футбол жангига гувоҳ бўламиз.

Таҳминий таркиблар:

Манчестер Сити: Кабальеро, Отаменди, Стоунз, Сабалета, Коларов, Фернандиньо, Силва, Туре, Де Брюйне, Сане, Агуэро.

Монако: Субашич, Менди, Ражи, Сидибе, Глик, Фабиньо, Бакайоко, Лемар, Силва, Жермен, Фалькао.

Ўйинда қатнашмайдиган футболчилар: Компани, Жезус, Гюндоган – Бошилья, Жемерсон.

www.interfutbol.uz версияси бўйича таҳминий ҳисоб: 2:1.

Акмалхон Эшонхонов