Европа Чемпионлар Лигаси 1/8 финали дастлабки учрашувлари давом эттирилди. Сеншанба куни тунда иккита ажойиб ўйин гувоҳига айландик. Шулардан бири Леверкузенда бўлиб ўтди. Мадриднинг «Атлетико» клуби «Байер»га қарши баҳсда ишончли ғалабага эришди.

Биринчи бўлимда Саул ва Гризманнинг голларидан кейин меҳмонлар биринчи бўлимдан кейин икки тўп фарқи билан олдинга чиқиб олишди. Иккинчи бўлимда томонлар икки мартадан дарвозаларни ишғол этишди. Якуний ҳисоб 4:2 меҳмонлар фойдасига. Жавоб учрашуви олдидан Диего Симоне шогирдлари чорак финал масаласини деярли ҳал қилиб қўйишди.

«Атлетико» ҳужумчиси Антуан Гризманн ЕЧЛ 1/8 финали доирасида жамоасининг «Байер»га қарши баҳсда ўз ҳисобига гол ёзишга эришди.

Шу тариқа 25 ёшли ҳужумчси Испания жамоасининг Европа Чемпионлари Лигаси мусобақасида тўпурарига айланди. Унинг ҳисобида ЕЧЛдаги голлар сони 13 тага етди. Бунгача ЕЧЛда «Атлетико» сафида Луис Арагонес 12та тўп киритишга эришганди.

«Манчестер Сити»-«Монако» учрашуви эса голларга бой бўлди. Майдон эгалари 26-дақиқада Саненинг голидан сўнг ҳисобда олдинга чиқиб олишганди. Орадан кўп ўтмай, Фалкао мувозанатни тиклади. Кейинчалик «Монако»нинг 18 ёшли ҳужумчиси Килиан Мбаппе ўз ҳисобига гол ёзиб қўйди. Шу тариқа футболчи «Монако»нинг еврокубокларда гол урган энг ёш футболчисига айланди. Франциялик ҳужумчи гол урган куни 18 ёшу 63 кунлик эди. Олдинги рекорд Давид Трезегега тегишли бўлиб, деярли 20 йилдан буён янгиланмай келаётганди.

Иккинчи бўлим бошида Фалкаолга нисбатан қўполликдан кейин ҳакам манчестерликлар дарвозасига пеналти белгилади. Жабрланувчининг ўзи томонидан амалга оширилган жарима тўпни Кабалеро қайтаришга эришди. 58-дақиқага келиб, «шаҳарликлар» Серхио Агуэронинг голидан сўнг мувозанатни тиклашди. Аммо орадан уч дақиқа ўтар ўтмас Фалкаонинг «парашют» голи яна «Монако»ни ҳисобда олдинга олиб чиқди. Аммо бу ҳали ҳаммаси эмасди. Гвардиола шогирдлари 12 дақиқа ичида кетма-кет учта гол уришга эришишди ва якуний ҳисоб 5:3 бўлишини таъминладилар.

Шу тариқа монегаскликлар илк марта ушбу мусобақа тарихида ўз дарвозаларидан бешта гол ўтказиб юборишди.

«Манчестер Сити» эса иккинчи марта ЧЛ турнирида бешта гол уришга эришди. Бунгача улар 2013 йили ноябр ойида ЦСКА (5:2) дарвозасига шунча тўп киритишнинг уддасидан чиқишганди.

Шунингдек, «Монако» учта гол уриб, топ-5 лигаларда етакчига айланди. Жамоанинг жорий мавсумда урган голлари сони 111тага етди. Бу билан монаколиклар 109та гол урган «Барселона»дан олдинга чиқиб олишди.

Бундан ташқари «Манчестер Сити»-«Монако» учрашуви ЕЧЛ плей оффи дастлабки ўйинлари орасида энг сермахсули бўлди.

***

Ўйиндан сўнг

ЕЧЛ плей-офф босқичидан жой олган яна бир учрашувда «Байер» ўз майдонида «Атлетико»га ютказиб қўйди. Ўйиндан сўнг мадридликлар бош мураббийи Диего Симеоне учрашувдаги тафсилотлари ҳақида сўз очди.

- Ўйиндан олдин, қанотлардан ҳужум қилсак «Байер» ҳимоячиларини қийин аҳволга солиб қўйишимиз мумкинлигини билардик.

Якунда шундай ҳам бўлди. Иккинчи бўлимда рақиб ҳимоя чизиғимизда бир қанча муаммоларни юзага келтирди. Умуман олганда, ўйин натижасидан қониқиш хосил қилдик.

Гамейро «Атлетико» сафидаги ўзининг энг яхши ўйинларидан бирини ўтказди. Гризманн ҳам ажойиб ҳаракат қилди. Энди Мадридга юзимда табассум билан қайтсам бўлади.

Рожер Шмидт («Байер» бош мураббийи):

- Бу биз учун жуда қийин ўйин бўлди. Охирги уч йилда «Атлетико» икки марта финалга чиқди. Шундай экан бу жиддий рақиб. Ўйинни ёмон бошладик. «Атлетико»нинг қарши ҳужумларда ажойиб ҳаракат қилишини билардик. Шунга қарамай, биринчи бўлимда иккита тўп ўтказиб юбордик. Танаффусдан кейин эса ҳақиқий жанг бўлди. Хаттоки ҳисобни 3:3 кўринишига ҳам олиб келишимиз мумкин эди. Аслида бундан яхшисига муносибмиз. Ҳозирча жавоб ўйини ҳақида ўйламоқчи эмасман. Лекин ҳар қандай ҳолатда ҳам Мадридда ижобий натижа қайд этишимиз қийин бўлади.

***

«Манчестер Сити»-«Монако»

«Манчестер Сити» - «Монако» учрашувидан сўнг ўтказилган матбуот анжуманида францияликлар бош мураббийи Леонарду Жардим ўйин ҳақида ўз фикрларини билдирди.

- Биринчи ўринда, бу ўйин Чемпионлар Лигасидаги энг ажойибларидан бири бўлди демоқчиман. Мухлислар учун бу ҳақиқий совға. Ишончим комил улар саккизта голдан роҳат олишди.

«Монако» ўзининг энг яхши ўйинларидан бирини ўтказди. Бунинг учун шогирдларимга миннатдорчилик билдирдим.

Аммо ҳимояда кичик хатоларга йўл қўйдик. Шунингдек, пенальтини аниқ амалга оширмай, 3:1 ҳисобида олдинга чиқиб олиш имкониятини қўлдан бой бердик.

«Сити» ҳимоячилар ортида бўшлиқ қолдиришини билган холда Мбаппени майдонга туширдим. Чунки у жуда тезкор. Килиан ажойиб ўйин ўтказди. Ваҳоланки йигитча энди 18 ёшга тўлди. Шунингдек, бу унинг ЕЧЛдаги биринчи учрашуви.

Фалькао кучли футболчи эканлигини яна бир бор исботлади. Лекин Агуэро ҳам жаҳон даражасидаги ҳужумчи. Бугунги баҳсда ҳеч нима ҳал бўлмади. Олдинда яна 90 дақиқалик ўйин бор.

Хосеп Гвардиола («Манчестер Сити» бош мураббийи):

- Бугунги ўйин стадионга ташриф буюрган мухлислар учун байрамга айланди. «Монако» бугун ҳақиқатдан ҳам яхши жамоа эканлигини исботлади. Бунуги натижадан қониқиш хосил қилдим. Энг мухими мусобақадаги иштирокимизни ҳозирча давом эттиряпмиз. Бундай ўйинлар жамоага олдинга яна бир қадам ташлаш учун ёрдам беради.

Энди Монакога борамиз. У ерда иложи борича кўпроқ гол уришимиз керак. Агар меҳмонда тўп кира олмасак, турнирдан чиқиб кетишимиз мумкин.

1:3 ҳисобини тенглаштириш жуда қийин. Ҳайриятки Кабальеро пенальтини қайтради.

Икки жамоа ҳужумда яхши ўйнаса, якунда ажойиб ўйин вужудга келади. Мухлисларимиз 90 дақиқа давомида қўллаб туришди. Бу биз учун энг яхши совға бўлди дейишим мумкин.

 ЕЧЛ. 1/8 финал.

 “Байер” Германия – “Атлетико” Испания 2:4 (0:2)

 Голлар: 0:1 – 17 Сауль, 0:2 – 25 Гризманн, 1:2 – 48 Бельараби, 1:3 – 58, пенальти Гамейро, 2:3 – 67, автогол Савич, 2:4 – 86 Торрес.

 “Байер”: Лено, Венделл, Драгович, Топрак, Хенрихс, Арангис, Бельараби (Похьянпало, 66), Хавертц (Фолланд, 56), Кампль, Брандт (Бэйли, 87), Эрнандес.

 “Атлетико”: Мойя, Савич, Филипе Луис, Хименес, Врсалько, Феррейра Карраско (Торрес, 78), Коке, Габи, Сауль, Гризманн (Корреа, 78), Гамейро (Парти, 71).

 Огоҳлантириш: Хенрихс (15), Драгович (58), Венделл (64), Арангис (74), Торрес (87), Габи (89), Филипе Луис (90).

 «Манчестер Сити» ва «Монако» ўртасидаги ўйин эса голларга янада бой бўлди. "Шаҳарликлар" ҳисобни очганларига қарамай, "Монако" танаффусга қадар 2та гол уриб, ҳисобда олдинга чиқиб олди. Иккинчи бўлим бошида Радамель Фалькао пенальтини голга айлантира олмаган бўлса, орадан кўп ўтмасдан "парашют" услубида жуда чиройли гол муаллифига айланди. Бунгача эса Агуэро дарвозабоннинг ишончсиз ўйини туфайли ҳисобни тенглаштиришга улгурганди. "Монако" мана шу 3та гол билан тўхтади. Гвардиола шогирдлари эса яна учта гол урмагунларича тўхташмади. Натижада "Сити" 5:3 ҳисобида ғалаба қозонди.

“Манчестер Сити” – “Монако”  5:3 (1:2)

Голлар: 1:0 – 26 Стерлинг, 1:1 – 32 Фалькао, 1:2 – 40 Мбаппе, 2:2 – 58 Агуэро, 2:3 – 61 Фалькао, 3:3 – 71 Агуэро, 4:3 – 77 Стоунз, 5:3 – 82 Сане.

“Манчестер Сити”:  Кабальеро, Стоунз, Отаменди, Санья, Фернандиньо (Сабалета, 62), де Брюйне, Туре, Сильва, Сане, Стерлинг (Навас, 89), Агуэро (Фернандо, 87).

“Монако”: Субашич, Глик, Фабиньо, Менди, Раджи, Лемар, Бернарду Силва (Моутинью, 85), Мбаппе (Жермен, 79), Бакайоко (Дирар, 88), Сидибе, Фалькао.

Огоҳлантириш: Глик (8), Сидибе (25), Агуэро (35), Фернандиньо (40), Отаменди (49), Бакайоко (55), Фалькао (67), Сабалета (73), Бернарду Силва (76), Фабиньо (81).

Манба: www.interfutbol.uz