Англия лига кубоги. финал

«МЮ» Англия Лига кубоги финалида «Саутгемптон»нинг қаттиқ қаршилигига дуч келди, лекин Златан Ибрагимовичнинг маҳорати эвазига мақсадига эришди, барибир - 3:2. «Қизил иблислар» шу билан мазкур турнир тарихида 5 мартадан ғолиблик шаробини ичган «Челси» ва «Астон Вилла» билан тенглашишди. Лига кубоги сони бўйича «Ливерпуль» мутлақ пешқадам - 8та. Жозе Моуриньо эса мазкур турнирда 4-марта ғалабани тантана қилиб, бу борада рекордчи саналган афсонавий Брайан Клаф ва Алекс Фергюсон қаторига қўшилди. «Беназир»нинг бутун мураббийлик фаолиятидаги совринлари сони 24тага етганини ҳам айтиш ўринли. Лекин бу футбол тарихидаги энг совриндор мураббий - Алекс Фергюсон (48та) натижасининг ярми, холос. Моу айни пайт совринлар сони бўйича Жок Стейн, Валерий Лобановский ва Мирча Луческудан ҳам орқада. Факт: «МЮ» ўз тарихида 41-совринни ютиб, бу масалада «Ливерпуль» натижасини такрорлади.

Ўз ўрнида айтиш керак, финални бошқариб борган Андре Марринер бригадаси ўйинда ҳали ҳисоб очилмаган пайт қўпол хатога йўл қўйди. Яъни «Саутгемптон» ҳужумчиси Маноло Габбьядини томонидан урилган соф гол инобатга олинмади. Ҳакамлар бу вазиятда футболчининг ўйиндан ташқари ҳолатда қолганини қайд этишди. Ваҳоланки, Маноло эмас, ҳужумнинг боришига таъсир ўтказмаган ҳимоячи Райан Бертран «офсайд»га тушганди.

26 февраль

МЮ - Саутгемптон - 3:2 (2:1)

Лондон. «Уэмбли» стадиони. 85264 томошабин.

Бош ҳакам: Андре Марринер.

Голлар: Ибрагимович (19, 87), Лингард (38) - Габбьядини (45, 48).

МЮ: де Хеа, Смоллинг, Байи, Рохо, Валенсия, Лингард (Рашфорд, 77), Погба, Эррера, Мата (Кэррик, 46), Мартиаль (Феллайни, 90), Ибрагимович.

Саутгемптон:  Форстер, Стивенс, Бертран, Соареш, Йошида, Редмонд, Уорд-Проуз, Тадич (Буфаль, 77), Дэвис (Родригес, 90), Габбьядини (Лонг, 83), Ромеу.

Огоҳлантиришлар: Эррера (24), Лингард (41) - Ромеу (18), Стивенс (40), Редмонд (56).

Ўйиндан кейинги фикрлар

Златан Ибрагимович («МЮ» ҳужумчиси): - Англияга ғалаба қозониш учун келганман ва шундай қиляпман. Қайси клуб сафига қўшилмайин, барчасида соврин ютишга одатланганман. Адашмасам, бугун 32-рақамли совринимни қўлга киритдим. Муҳими, Англия футболидан роҳатланяпман.

Поль Погба («МЮ» ярим ҳимоячиси): - Жамоамиз учун муҳим ютуқ. Бағоят хурсандман. Мана, Ибрагимовични нима учун таркибимизга қўшиб олганимизга жавоб! У айнан ҳал қилувчи баҳсларда бош ролга кўтарилади.

Англия Лига Кубогининг  барча ғолиблари