Қайднома

Қидирув

Ари: «Муҳими «Локо»га манфаат келтириш»

Ари: «Муҳими «Локо»га манфаат келтириш»

  10.03.2017 03:38
  0
  331
Ари: «Муҳими «Локо»га манфаат келтириш»

«Краснодар»даги ўйинлари орқали ном қозонган бразилиялик ҳужумчи Ари жорий мавсумни «Локомотив» сафида якунлайдиган бўлди. У «темирйўлчилар» таркибидаги дебютини Россия кубоги доирасида «Тосно»га қарши кечган ўйинда нишонлади. «СЭ» нашри мухбирлари шу учрашувдан сўнг Арини суҳбатга чорлаб, унинг янги жамоадаги илк таассуротлари ва «Краснодар»дан кетиши сабабларига қизиқишди.

- «Локо»даги дебютингизни қандай баҳолайсиз? У омадли чиқдими?

- Очиғи, анча хотиржам тўп суришни ўйлагандим. Аммо эҳтиросларни жиловлай олмадим. Умуман, Москвага қайтганимдан хурсандман, илк учрашувдаёқ «Локо»даги голларим ҳисобини очишни режалаштиргандим. Гарчи бу ниятим амалга ошмаган бўлсада, мамнунман, барибир. Зеро, жамоамиз ғалабага эришди.

- «Темирйўлчилар» сафидаги ватандошларингиз сизни қандай қарши олишди?

- Жуда яхши! Нафақат улар, балки бошқа футболчилар ҳам илиқ кутиб олишди.

- Клубга талаб даражасида мослашишингиз учун қанчадир муҳлат керакдир...

- Менимча, йўқ. Ҳарқалай, жамоада ўзимни худди уйдагидек ҳис қиляпман.

- Мавсум якунига қадар мўлжалланган мақсадларингиз қандай? Масалан, 5-6та гол уриш...

- Йўқ, муҳими - жамоага манфаат келтириш. Шахсий натижалар - иккинчи даражали масала.

- Аҳамиятли томони, «Локо»га ўтишингиз ўта қисқа вақт ичида ҳал этилди.

- Аслида «Краснодар» билан боғлиқ воқеалар хусусида сўз очишни истамасдим. Чунки ўтган иш туфайли куйинишдан наф йўқ. Ҳа, у ерда айрим кўнгилсизликларга дуч келганим рост. Хайриятки, ҳаммаси ортда қолди, яъни жамоа билан хайрлашдим. Ҳозирги ижара келишуви менга фойда келтиради, менимча. Тўғрироғи, фойда келтира бошлади. Ахир «Краснодар» кубок турниридан чиқиб кетди, биз эса ярим финалдамиз!

- Шартномага имзо чекишдан аввал клуб президенти ёки спорт директори билан алоҳида гаплашдингизми?

- Йўқ, ҳаммаси жуда тез рўй берди. Аввалига «Краснодар» мени «Галатасарой»га юборишни ўйлаганди. Аммо бу таклифни қабул қилмадим. Кейин Хитойдан манфаатли таклифлар тушди. Бироқ клуб раҳбарлари мени қўйиб юбормасликларини айтишди. Трансферлар бозорининг охирги куни эса фақат «Локомотив»га ўтишим мумкинлигини маълум қилишди.

- «Инстаграм» орқали «Локо» президентига миннатдорчилик изҳор этганингиз боиси нима?

- Гап шундаки, «Локомотив» аввалроқ ҳам мен билан боғланишга уриниб кўрган, яъни жиддий қизиққанди. Қолаверса, шартнома тузиш учун вақт жуда оз эди - трансферлар бозори ёпилишига саноқли соатлар қолганди. Шундай экан, масалани тезкор равишда ҳал қилишгани ва менга яхши муносабатда бўлишгани учун клуб раҳбарларига яна бир марта раҳмат. Энди бунга ишончли ўйинларим билан жавоб қайтаришим шарт.

- Мана, «Локо»нинг афсонавий мураббийи раҳбарлигида ишлаяпсиз. У қандай таассурот уйғотди?

- Сёминнинг табиатан вазмин, адолатли ва топшириқни аниқ тушунтирадиган мутахассис эканлиги шундоқ сезилиб турибди. Жамоадаги нуфузи ҳам жуда баланд. Унинг «Локо»да қандай натижаларга эришгани билан қисман танишиб чиқдим. Албатта, Сёминнинг барча кўрсатмаларини кўнгилдагидек бажаришга ҳаракат қиламан.

- Мухлисларни 1 ой ёрқин ўйнаганингиздан сўнг бирданига сустлашиб қолиш одатингиз хавотирга соляпти. Уларга қандай жавоб берасиз?

- «Локо»га ижара келишуви асосида келдим. Ихтиёримда 3 ой бор ва бу имкониятдан тўлақонли фойданишим керак. Мухлислар ўйинимга қараб, хулоса чиқараверсинлар. Умид қиламанки, улар тез орада хавотирлари ўринсиз эканлигига амин бўладилар.

- Энди «Краснодар» ҳақида. Айтишларича, жамоа мураббийига машғулотлардаги ҳаракатларингиз ёқмай қолган экан.

- Тўғриси, краснодарликлар мени сотмоқчи эдилар ва тезроқ кетишим учун босим ўтказдилар. «Локо» варианти юзага келишидан олдин Хитойга йўл олишни ўйлагандим. Шукрки, якунда Россияда қолдим. Бундан мамнунман, «Локо»нинг асосий таркибидан жой олиш учун бор маҳоратимни ишга соламан.

- Демак, «Краснодар»нинг сизга нисбатан норозиликлари машғулотларга боғлиқ эмас, шундайми?

- Ҳа, бундай гап-сўзларнинг барчаси ёлғон. Далил сифатида тестларда қайд этган натижаларимни кўрсатишим мумкин, турли жиҳатлар бўйича етакчилар қаторидаман. Хуллас, мени сотишни режалаштиришгани учун шундай гап-сўзлар урчиди, деб ўйлайман.

Содиқ СОБИР тайёрлади


Манба: www.interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

МАВЗУГА ОИД БОШҚА ХАБАРЛАР

Оммабоп мақолалар

Термамиз етакчилари қандай фикрда?

Хабарингиз борми

Чемпионатлар

Жамоа Ў О
тўлиқ маълумот »

Кун фотоси

  • Сизнингча, Олий лига-2017 ни қайси жамоалар тарк этади?


© "Interfutbol.UZ". © 2006-2017. Мобил версия
Сайт материалларидан тўлиқ ёки қисман фойдаланилганда веб-сайт манзили кўрсатилиши шарт!
Барча ҳуқуқлар амалдаги қонунчиликка биноан ҳимояланган.