Ўзбекистон миллий жамоасининг сурияликларга қарши кечадиган ўйини арафасида термамизнинг биринчи рақамли дарвозабониАлександр Лобановдан интервью олиб, унинг муҳим учрашув арафасидаги фикрлари билан қизиқдик.
- Учрашувга катта иштиёқ билан тайёргарлик кўряпмиз, - дея сўз бошлади «Пахтакор» посбони. - Футболчиларнинг кайфиятлари аъло даражада ва ўйлайманки, ана шу кўтаринкилик 23 март кунги ўйиндан кейин ҳам сақланиб қолади. Бир нарсани аниқ айта оламан, барча ўйинчилар ғалаба учун борларини беришга тайёр туришибди.
- Тошкентдан Дубайга парвоз қилдинглар ва у ердан Малайзияга етиб бординглар. Иқлимга мослашиш қандай кечяпти? Умуман, об-ҳаво ҳақида гапирсангиз.
- Барчага маълумки, Малайзияда намгарчилик юқори. Атрофини океан ва денгиз ўраб туради. Ҳозирда кун иссиқ. Узоқ парвоздан кейин анча ўзимизга келиб олдик (кулади).
- Иқлим жамоамизнинг ўйинига ҳамда натижага салбий таъсир ўтказмасмикан?
- Қийинчилик бўлади, лекин натижага у даражада таъсир ўтказади, дея олмайман. Иккала жамоа футболчилари ҳам бир хил шароитда ўйнашади.
- Виталий Денисовнинг майдонга туша олмаслиги ҳақидаги хабарни терма жамоадагилар қандай қабул қилишди?
- Албатта, бу биз учун катта йўқотиш. Лекин майдонга 11 нафар футболчи тушади. Витянинг ўрнини билдирмасликка ҳаракат қиламиз. Унинг жойини ким эгалласа ҳам, майдонда икки ҳисса куч билан ўйнаши шарт.
- Рақибни ўрганиш жараёни қандай кетяпти?
- Йиғиннинг илк куниданоқ Сурия термасини ўрганишни бошлаганмиз. Рақиб қандай кучга эга эканлигини Жанубий Корея ва Эронга қарши кечган ўйинларда намойиш этди. Ҳимояси мустаҳкам. Футболчилари ҳақиқий жанговар руҳда. Жисмонан жуда яхши тайёргарликка эга. Бежизга гуруҳимиз пешқадамларидан очко тортиб олишмади.
- Сиз айтгандек, Ж.Корея ҳам, Эрон ҳам сурияликлар дарвозасини ишғол қила олмади. Бу ҳолат сизларни ташвишга солмаяптими?
- Йўқ. Ишончим комил, биз Сурия терма жамоаси дарвозасини ишғол қила оламиз. Буни Тошкентдаги ўйинда ҳам исботлаганмиз.
- Сизнингча, сурияликлар ҳимоявий тактика танлашармикан?
- Ҳа, менимча ҳимоядан ўйнашади. Ҳар ҳолда очиқ футбол намойиш этишмаса керак. Қарши ҳужумда бизни жазолашга уриниб кўришади. Шундан эҳтиёт бўлиш лозим.
- Бу эса бизнинг вазифамизни оғирлаштиради, шундайми?
- Замонавий футболда «автобус» деган тушунча пайдо бўлган. Лекин мезбон сифатида ҳужум уюштиришга мажбурлар, чунки улар ҳам очко олишлари керак.
- Сурия термасини ниманинг эвазига мағлуб этишимиз мумкин?
- Жаҳон чемпионатига бориш иштиёқи. Айнан шу мақсадда майдонга тушсак, албатта, Малайзиядан қимматли 3 очко билан қайтамиз. Қолаверса, рақиб билан таққослаганда, бизнинг жамоада кучли ижрочилар кўпроқ. Тажриба бобида устунмиз. Фақат мана шу устунликни ҳисобда акс эттиришимиз шарт.
- Ижобий натижа қайд этишимизга нима халақит бериши мумкин?
- Умид қиламанки, ҳеч нарса.
- Одатда, йилнинг бу вақтида футболчиларимизнинг жисмоний ҳолати талаб даражасида бўлмайди. Боз устига, асосий умидимизга айланган легионерларимизнинг ҳаммаси ҳам ўйин амалиётига эга бўла олишмаяпти. Шу жиҳатдан бироз хавотир йўқ эмас...
- Фикримча, терма жамоадан чақирув олган барча футболчилар етарлича ўйин амалиётига эга бўлиб улгуришди. Улар миллий чемпионатдан ташқари, ОЧЛ баҳсларида ҳам тажриба орттиришди.
- Биздаги маълумотларга қараганда, терма жамоамиз футболчилари ҳамда мураббийлар штаби олдига Сурия ва Қатарга қарши ўйинларда фақат ғалаба қозониш вазифаси қўйилибди. Акс ҳолда...
- Гапингизни тушундим. Биз ҳамма ўйинга фақат ғалаба илинжида тушамиз.
- Олий лигада 3та тур ортда қолди. Дастлабки таассуротлар қандай?
- «Динамо»нинг ўйинидан «шок» ҳолатига тушиб қолдим. Самарқандлик футболчилар чинакамига жасорат кўрсатишяпти.
- Кўпчилик «Динамо»нинг юриши Тошкентда - айнан «Пахтакор»га қарши ўйинда тўхтаса керак, деб ўйлаганди. Лекин амалда воқеалар бошқача ривож топди. Сизнингча, мағлубиятнинг сабаби нимада?
- Бундай бўлишини умуман кутмагандик. «Динамо» қайд этаётган натижаларни тасодифга йўймасдим. Таркибида ёш, ўйинга чанқоқ футболчилар кўпчиликни ташкил этади. Улар ўзларини кўрсатишга ҳаракат қилишяпти ва бунинг уддасидан чиқишяпти ҳам. Лекин биз ҳали ўз сўзимизни айтамиз. Чемпионат эндигина бошланди. Ҳали ҳаммаси олдинда.
- «Пахтакор» олдига аниқ вазифа қўйилдими?
- Мавсумни ҳеч бўлмаса битта соврин билан якунлашимиз шарт.
- Лекин «Пахтакор» захираси билан мақтана олмайди. Бу мақсадга эришиш учун тўсқинлик қилмасмикан?
- Фикрингизга юз фоиз қўшиламан. Бу - «Пахтакор»нинг энг катта муаммоси. Умид асосий таркибдаги тажрибали футболчилардан.
- Захирадан майдонга тушиб, жамоа ўйинини кучайтира оладиган футболчининг ўзи йўқ. Фикримга қўшиласизми?
- Шубҳасиз, шундай. Лекин ана шу ёшлар исталган пайтда порлаши мумкин. Буни ҳам унутмаслик керак.
Камолиддин АЛИМОВ суҳбатлашди
Манба: www.iff.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20