Сурияга қарши кечадиган ўйин олдидан нохуш янгилик тарқалди - Ўзбекистон терма жамоасининг етакчи футболчиларидан бўлган Виталий Денисов «Локомотив» таркибида Россия чемпионатида «Спартак»ка қарши ўтказилган ўйинда жароҳат олибди. Ёмон томони, Денисов жароҳат билан сўнгги дақиқаларга қадар ўйнаган. Бу эса вазиятни янада чигаллаштириши турган гап.
Денисов табиатан шундай футболчики, у майдонда етакчиликни ўзига олишга интилмайди, бошқа жамоадошларига дакки бериб, тузукроқ ўйнашга ундаш унга хос эмас. Виталий шунчаки, ўз ишини тўғри қилади ва мураббийнинг кўрсатмасини ҳар бир «ҳарфи ва вергули»гача бажаришга одатланган. Шу боис ҳам мураббийлар уни жуда қадрлайдилар.
Ўзи ўйнаган барча клубларда ва Ўзбекистон терма жамоасида мудом асосий таркибда бўлганининг боиси ҳам шунда. ЖЧ саралашининг муҳим ўйинлари олдидан терма жамоамиз мана шундай футболчидан ажралган кўринади. Ҳар ҳолда ўнг оёқ сон мушакларининг олд қисми жароҳатланган футболчининг 4 кунда сафга қайтиб, Сурияга қарши ўйнаши осон бўлмаса керак. Хўш, бу йўқотиш Ўзбекистон терма жамоаси учун қай даражада оғриқли бўлади?
Албатта, Виталий Денисов муҳим футболчилар сирасига киради. Бежизга уни Россия чемпионатида «электричка», деб атамайдилар. Виталий яхши жисмоний тайёргарлик, техника ва тезликка эга бўлгани боис ҳимоядан ҳужумга тез-тез ўтади ва «Локомотив»нинг асосий ҳужумлари айнан унинг қанотидан кўп ташкил этилади.
Денисовнинг Ўзбекистон терма жамоасидаги ўйини ҳақида ҳам деярли шундай фикр билдириш мумкин. Гарчи охирги вақтларда терманинг ўйин услуби ўзгаргани боис Виталийдан кўпроқ ҳимояда ишончлироқ ўйнашни талаб қилишаётган бўлса-да, унинг ҳужумкорлик қобилияти ҳеч қаерга йўқолмаган. Керак вақтда бемалол олдинга ўтиб, вазиятни кескинлаштириши мумкин. Табиийки, бундай футболчининг таркибда йўқлиги билинади. Бироқ агар мана шу йўқотиш ҳал қилувчи аҳамият касб этса, билингки, терма жамоада муаммолар бор экан.
Чунки ҳеч бир футболчи терма жамоа учун алмаштириб бўлмас аҳамият касб этмаслиги лозим. Чунки бу қандайдир клуб эмас, янги футболчи сотиб олиш учун трансфер мавсумини кутадиган.
Терма жамоада бир-бирининг ўрнини босадиган номзодлар бўлиши лозим. Самвел Бабаян шундоқ ҳам Эронга қарши Тошкентда бўлиб ўтган учрашувдаги мағлубиятдан сўнг (0:1) жамоа ўйини тўлиғича Одил Аҳмедовга боғлиқлиги ва у йўқлиги боис мағлубиятга учралганини гапириб, юракка ғулғула солиб қўйган эди. Агарда Виталий Денисовнинг йўқлиги ҳам қандайдир муаммоларга олиб келадиган бўлса, демак ҳали бизникилар жаҳон чемпионатига чиқишга дарҳақиқат тайёр эмас экан.
Ўзбекистон терма жамоаси мураббийлар штаби ЖЧ саралашида Сурия ва Қатарга қарши майдонга тушадиганлар рўйхатини анча олдин тақдим этиб бўлган. Аммо айни вақтда таркибда бўлганлардан Виталий Денисовнинг ўрнини босадиган футболчи сифатида фақат Олег Зотеевни кўрсатиш мумкин бўлса керак.
Агар Виталий йиғинда иштирок эта олмаса, демак унинг ўрнига бошқа футболчи чақирилади. Албатта, номзодлар бор, аммо улар Денисовнинг ўрнини боса олишармикан? Ҳамма гап шунда. Эҳтимол, Самвел Бабаян яна Олег Зотеев ёки Станислав Андреевдан бирига ишонч билдирар? Нима бўлган тақдирда ҳам миллий термамиз устозининг қарорига қўшилмасликнинг иложи йўқ.
Чунки натижага у жавоб беради, демак футболчиларни танлаш ҳуқуқи ҳам унда. Ҳозир бу борада ортиқча эътироз билдирмоқчи эмасмиз. Айтмоқчи бўлганимиз, Виталий Денисов тугул бошқа ҳар қандай футболчи майдонга туша олмаган тақдирда ҳам Ўзбекистон терма жамоаси ўзини йўқотиб қўймаслиги лозим. Айниқса, Сурия ва Қатар сингари савия жиҳатидан биздан қуйироқда турадиган рақибларга қарши кечадиган ўйинларда.
Самвел Бабаян Ўзбекистон терма жамоасини бошқаришни бошлаган вақтдан буён бир анъана кузатилмоқда. Бизникилар ўзидан кучсиз ҳисобланадиган рақибни албатта, мағлубиятга учратади.
Тўғри, қийналиши мумкин, ҳисоб у қадар йирик бўлмас, аммо ҳар тугул, шу вақтга қадар уч очкони қўлга киритиб келмоқда. Аммо ўзидан кучли ҳисобланган рақибларга қарши ҳеч нарса қила олмаётгани ҳам бор гап. Ҳар қанча ғалати туюлмасин, келгуси ўйинлар олдидан айнан шу жиҳат мухлисларни бироз хотиржам қилиши лозим.
Чунки март ойида ўтказиладиган ҳар икки учрашув ҳам айнан кучсиз ҳисобланадиган рақибларга қарши бўлади. Сурия ва Қатар биринчи даврада ҳар қанча кутилмаган натижалар тақдим этган бўлишмасин, бу учрашувларда фаворит барибир, Ўзбекистон терма жамоаси ҳисобланади. Бизнинг футболчиларимиз эса бундай вақтда қандай ўйнаш кераклигини яхши билишади.
Муҳими, ўша кўникмани унутиб қўйишмаган бўлишсин. Таркибда Виталий Денисов бўладими ёки йўқ, жаҳон чемпионатига чиқишни орзу қиладиган жамоа Сурия ва Қатарни мағлуб эта олмаса, демак ўша орзу билан хайрлашиши лозим бўлади. Шундай эмасми?
НУРУЛЛОҲ
Манба: www.iff.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20