Мадриднинг «Атлетико» клуби бош мураббийи Диего Симеоне мавсум якунида жамоани тарк этиши мумкинлиги ҳақидаги гап-сўзларга изоҳ бериб ўтди.

Аргентиналик мураббий шунингдек, ЕЧЛ-2015/16 йилги мавсумида «Реал»дан (1:1, пенальтилар серияси бўйича — 3:5) учралган мағлубиятдан кейин осон бўлмаган даврни бошидан ўтказгани ҳақида гапириб берди.

Бундан ташқари жамоа 2013/14 йилги финалда ҳам «Реал» билан тўқнаш келган, «Атлетико» 1:0 ҳисобида олдинда бора туриб, 93-дақиқада Серхио Рамоснинг голидан кейин ҳисобни тенглаштирган. Қўшимча бўлимларда эса «Реал» яна учта тўп киритиб, ғалабани ўз томонига оғдирганди — 4:1.

«Мен матбуот анжуманига «Реал» футболчилари байрам қилаётган зал олдидан ўтиб борганман. Ўзимда жуда кучли оғриқни ҳис қилганман. Келгуси учрашувлар учун шогирдларимни қандай қилиб руҳлантира олишим мумкинлиги ҳақида ўйлардим. Вазият мени синдириб қўйгани йўқ. Шунчаки ўзимга-ўзим ўйлаб олишим кераклигини айтардим.

Агар «Атлетико»ни тарк этишни истасам, бунинг учун 35 млн сабаб топиб беришим мумкин. Лекин мен «Атлетико»дан кетишни истамайман, бундай қилишни хоҳламайман ҳам», — дея Симеоненинг сўзларини келтиради As нашри.