Бу йил ҳам «Пахтакор»нинг унча «мазаси» йўқ. Клуб янги мавсумда Ўзбекистон чемпионатида 3та ўйин ўтказиб, ҳозирча 4 очко ишлади, холос. Айниқса, «Динамо»га қарши ўз майдонида ўтказган ўйинни бой бергани (0:1) анча ҳайрон қолдирди. Чунки «шерлар» таркибида Ўзбекистон миллий терма жамоаси аъзолари тўп суришса, самар-қандликлар ҳақида бундай деб бўлмайди. Аммо ўз сафига ёш футболчиларни жамлаган «Динамо» олий лига 3-турига келиб, 100 фоизлик натижа билан биринчи ўринни эгаллаб турибди. «Пахтакор» эса...
Ҳозир «Пахтакор»га нима бўлаётгани ҳақидаги саволлар билан бошингизни қотирмоқчи эмасмиз. Зеро бу вазифани бажарадиган масъул шахслар бор. Биз шунчаки, очиқ-ойдин фактларга мурожаат қилишни истаймиз, холос. Яхши биласиз, «шерлар»нинг муаммолари аслида ўтган мавсум бошланган эди. Клуб бир ярим йил муқаддам чемпионликни қўлга киритгач, олий лига-2016ни яхши бошлай олмай, кетма-кет омадсизликларга дуч келди: 10-турдан сўнг 4та ғалаба, 3та дуранг ва 3та мағлубият қайд этди. Айниқса, «Нефт-чи»га қарши сафарда кечган ўйинда 1:2 ҳисобида имкониятнинг бой берилиши раҳбариятнинг тоқатини тоқ қилган кўринади, бош мураббий Нўъмон Ҳасанов истеъфога чиқарилди. Бу қарорни тўғри тушуниш мумкин. Чунки ҳар қандай клубда натижа ёмонлашган вақтда мураббийга чиқиш эшиги кўрсатилиши одатий ҳол. «Пахтакор»да ҳам худди шундай бўлди. Бироқ воқеаларнинг ке-йинги ривожи бошқача тус олди.
Не ажабки, истеъфодан сўнг «Пахтакор» ўз номига мос тарзда тажрибали, номи чиққан мутахассис эмас, клуб мураббийлари тизимида фаолият юритаётган Григорий Колосовскийни жамоа устозлигига тайинлашга қарор қилди. Яхши танимасангиз, таништирайлик - Колосовский ўз вақтида Тошкент вилояти клублари сафида қуйи лигаларда тўп сурган. Кейинчалик «Янгиер» ва «Трактор» шарафини ҳимоя қилган. Футболчилик даври якунига етгач, «Пахтакор» клуби мураббийлар тизимида меҳнат қила бошлади. Аммо унинг ишидан бирор ёрқин таассурот қолмагани боис, фаолиятининг бу босқичи ҳақида ортиқча фикр билдира олмаймиз. Биз Колосовскийни кейинроқ - «Пахтакор» бош мураббийи сифатида яхшироқ танидик. Аммо афсуски, шунда ҳам кетма-кет қўлга киритилган ғалабалар орқали эмас...
Албатта, бош мураббий вазифасини бажариш Григорий Анатольевичга топшириларкан, клуб тутган йўлни тушунса бўларди. Чунки жамоа устози истеъфога чиқарилганда унинг ўрнини ёрдамчиси эгаллаши жаҳон футболида тез-тез кузатилади. Қолаверса, у ўз ишини қойилмақом тарзда уддалагач, доимий ваколатга эга чиққанини ҳам кўрганмиз. Масалан, Мадриднинг «Реал» клуби билан афсонавий натижаларга эришган Висенте Дель Боске айнан шундай услубда мадридликлар бошқарувига тайинланган эди. Шунингдек, «Челси» билан Чемпионлар Лигасида ғолиб чиққан Ди Маттеони эслаш мумкин. Аммо Колосовский...
Афсуски, «Пахтакор»нинг Григорий Анатольевич билан ўтган мавсум қайд этган натижалари у қадар ижобий эмас. Жамоа ушбу мутахассис қўл остида олий лигада 20та ўйин ўтказган бўлса, шундан 11тасида ғалаба қозонди, 4тасида дуранг ўйнаб, 5тасида мағлубиятга учради. Бу кўрсаткич Нўъмон Ҳасановникидан у қадар яхши эмас. Боз устига, «Пахтакор»дек клубга ярашмаслиги ҳам тайин. Аммо не ажабки, деярли бир хил натижа боис бири истеъфога чиқарилди, иккинчиси эса доимий бош мураббийликка тайинланди. Модомики, шундай экан, Ҳасановни истеъфога чиқаришнинг кераги бормиди? У ҳам мавсум охирида жамоа билан бешинчи ўринни эгаллаши мумкин эди-ку!
«Пахтакор» Колосовский бошчилигида жорий мавсумни ҳам яхши бошлай олмади. Гарчи ўз майдонида «Қизилқум»ни 3:1 ҳисобида енгган бўлса-да, иккинчи турда «Нефт-чи» билан нурсиз дуранг қайд этди. Учинчи турда қандай натижа қайд этилганини эса юқорида айтиб улгурдик. Аммо клуб мухлисларини ранжитадигани салбий натижа ҳам эмас. «Пахтакор» сафида Ўзбекистон терма жамоасининг асосий таркиб вакиллари тўп суришгани ҳолда нурсиз ўйин намойиш этилиши кишини асло хурсанд қилмайди. Тўғри, кучли футболчилар бор, аммо улардан ташкил топган кучли жамоа йўқ.
Аслида, «Пахтакор» бу йил фақат чемпионликка даъво қилиши лозим. Жамоа Осиё Чемпионлар Лигасида иштирок этмаяпти, демак кучни тежаб, бор эътиборни олий лигага қаратиш имконига эга. Бироқ бунинг учун яхши футболчилар билан биргаликда кучли мураббий ҳам керак бўлади. Шундай мутахассис топиш учун эса узоққа бориш шарт эмас. Айтайлик, Миржалол Қосимов ва Вадим Абрамов айни вақтда бўш юришибди. Уларни жамоага таклиф этишга нима халал бермоқда, айтиш қийин. Албатта, Григорий Колосовскийга ҳурматимиз баланд, аммо унга берилган бир йиллик вақт бу ҳурмат ададини белгилаш учун етарли, бизнингча. «Пахтакор» мавжуд камчиликларни имкон қадар тезроқ бартараф этиб, яна аввалгидек Осиёнинг энг кучли жамоаларидан бирига айланиши лозим. Клуб шунга лойиқ.
АБДУЛЛОҲ
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20