Ростовликлар Европада анча шов-шув кўтаришди, аммо жамоа ҳамон қарзлардан қутулолмаяпти. «Советский спорт» ушбу клубнинг ҳозирги пайтдаги молиявий аҳволини атрофлича муҳокама қилиб, бу борада пайдо бўлаётган саволларга жавоб топишга уринди.

«Ростов»нинг солиқлардан ва меҳнат фондидан қарзи – 360 миллион

Европа Лигаси доирасидаги «Манчестер Юнайтед»га қарши кечган жавоб учрашуви куни Ростов области губернаторининг биринчи ўринбосари Игорь Гуськов «сариқ-кўклар»­нинг қарзлари хусусида бор ҳақиқатни айтди.

Унинг сўзларига кўра, умумий ҳисобда клубда 360 миллион қарздорлик мавжуд: меҳнат фонди солиқларидан 250 млн., асосий таркиб футболчилари ва мураббийларнинг мукофот пулларидан 110 млн. Маошлар ҳақида гап кетганда, ўтган йил учун ҳисоб-китоб яқиндагина тўлиқ амалга оширилди. Бошқа ходимларнинг иши бироз енгил - база ва офис ишчилари кунига пул олишган.

Қизиғи, Гуськов ўтган йил декабри­да берган интервьюсида «Ростов»нинг қарзи йўқлигини таъкидлаганди. Кейинги икки ярим ой мобайнида вазият бирдан ўзгариб кетдимикан? Афтидан, област раҳбарларидан бири Янги йил байрами арафасида шунчаки, ҳаммасини яхшидек кўрсатишга уринган. Бошқача айтганда, эртак тўқиган.

ЕВРОКУБОКЛАРБЎЛМАГАНДА...

Жорий мавсум еврокубокларда Россия клублари орасида энг кўп даромад орттирган жамоа айнан «Рос­тов» бўлди. Бу борадаги маълумот махфий тутилмайди, ҳаммаси очиқ-ойдин кўрсатилган. Ростовликлар ЕЧЛ саралаш раундида 2 миллион, гуруҳ босқичига чиқишгани учун 12,7 миллион, «Бавария» устидан қозонилган ғалаба учун 1,5 миллион, ПСВга қарши кечган 2та баҳсдаги дуранглар учун 1 миллион евро олишди. Бундан ташқари, Европа Лигаси 1|16 финалига йўл олингани учун 500 минг, нимчорак финалдаги иштирок учун 750 минг ажратилди. Жами - 18,2 млн. евро, яъни «Ростов» клуби бюджетининг 75 фоизи.

Хўш, шунча пул қаерга кетди? «Советский спорт»нинг маълумотларига кўра, ушбу маблағнинг 30 фоизи футболчи ва мураббийларнинг мукофот пулларига ажратилган. қолгани аввалги раҳбарият даврида йиғилиб қолган эски қарзларни узишга сарфланган.

Ўтган мавсум якунида «Ростов» турли ташкилотлардан бир миллиард рубл­га яқин қарз бўлиб қолган. Бу Россия футболи учун фантастик сумма. Агар еврокубоклар бўлмаганида, ростовликлар бошига «Том»нинг тақдири тушиши аниқ эди.

ҲОЗИРЧА ЛОГОТИПСИЗ

Бир ой аввал «Ростов»нинг бош директори лавозимига Павел Лошилов тайинланганди. Унинг зиммасига иккита вазифа юклатилди. Биринчиси - харажатларни назоратга олиш. Иккинчиси - клубнинг тузукроқ ҳомийга эга бўлишини таъминлаш.

Дастлабки пункт бўйича ишлар жадал давом этмоқда. Жумладан, аксарият ходимларнинг маоши миқдори камайди. Янги шароитга кўнмаганлар билан меҳнат шартномаси бекор қилинди.

Ҳомийлар масаласига тўхталсак, жорий йил бошида йўловчи ташишга ихтисослашган компания «Ростов» билан жиддий қизиққанига қарамай, келишув амалга ошмаганди. Шунингдек, клуб Вадим Варшавскийга тегишли корхоналар назарига тушиб қолди. Машҳур бизнесмен 2007 йили ҳам жамоага пул ажратган, унинг собиқ компанияси логотипи футболчилар либосига муҳрланганди. Манбанинг хабар беришича, Варшавский «Ростов» учун йилига 300 миллион рубль беришга тайёр. Бу эса ўйинчи ва мураббийлар штабининг йиллик маошларини қоплаш учун етарли.

Яқинда ростовликлар яна бир кичик ҳомийга эга бўлишди - «Мишкино» қандолатчилик фабрикаси билан шартнома тузилди. Албатта, йўқотишлар ҳам учради. Янги йилдан эътиборан «Ростов» футболкаларида «ТНС Энерго» логотиплари олиб ташланди. Ушбу компания сўнгги икки мавсум клубнинг титул ҳомийси саналган. Эҳтимол, ҳамкорлик кейинроқ давом эттирилар, аммо ҳозирча «сариқ-кўклар» «қуруқ» либосда майдонга тушишмоқда.

САВВИДИ ҚАЙТАДИМИ?

Яқин вақтларда «Группа Агроком» хўжайини Иван Саввиди яна Ростов жамоасига пул ажратиши мумкин. Маълумотларга кўра, клубнинг янги раҳбарияти бу ишбилармон билан музокарани бошлаган. Саввиди ўйлаб кўриш учун вақт сўраган. Ҳозирча «Ростов»ни «МЮ» билан ўйин учун мақташ билан чекланди.

- Ростовликларнинг ўйинлари, биринчи навбатда, ҳурматга лойиқ. Бу шаҳар тарихида катта ўсиш кузатилди, маҳаллий аҳоли 6-8 ой мобайнида футбол билан яшади, - деди Саввиди ОАВга берган интервьюсида.

Иван Игнатьевичнинг фикрида жиддий ўзгариш кузатилди. Октябрда «Ростов»ни «қурбон номидаги клуб» деб атаган ишбилармон энди жамоа манзилига мақтовлар ёғдирмоқда. Бундай гапдан сўнг янги ҳомийлик шартномаси тузилмасмикан?

ЭНДИ НИМА БЎЛАДИ?

Вазиятга баҳо бериш учун эксперт бўлиш шартмас: «Ростов»нинг келажаги чемпионат финишига бевосита боғлиқ. Еврокубокларда қатнашиш ҳуқуқи қўлга киритилса, деярли барча етакчилар катта эҳтимол билан жамоада қолишади. Акс ҳолда, «сариқ-кўклар»ни жиддий ўзгаришлар кутмоқда. Бош мураббийликка кимнинг тайинланиши сўроқ остида. қурбон Бердиев турнир жадвалининг ўрта поғоналари ёки «жон» сақлаш учун курашишга кўнмаса керак.

Ўткир УМАРОВ тайёрлади