Шахсий фикримча, футболчиларимизнинг охирги йилларда ўйин бобида ўсишдан тўхташгани аввало, мураббийлар цехига боғлиқ. Айниқса, ёш йигитларимиз янгича ёндашувга эҳтиёж сезишмоқда.

Бу билан маҳаллий мутахассисларни ерга урмоқчи эмасман. Лекин хоҳлаймизми-йўқ, футбол ривожи учун хориж тажрибаси ҳам жуда зарур. Бунинг исботи сифатида ўша футболи энг юксак чўққига чиққан мамлакатлардан ҳам мисоллар келтириш мумкин.

Яъни ҳамма жойда легионер мураббийлар хизмати ўзгача қадрланади. Чунки турли-туман тажрибалар уйғунлиги муҳим саналади. Ўзимиздан ёрқин битта мисол: Луиз Фелипе Сколарининг юртимизда ишлагани маълум даражада ўз самарасини берганди. Айтайлик, Жасур Ҳасановнинг бирданига бошқача ўйнай бошлагани эсингиздадир.

Менимча, унинг футболга умумий қарашини айнан бразилиялик мутахассис ўзгартирганди. Шу маънода «Олмалиқ» сиёсатини тўла қўллаб-қувватлайман. Эҳтимол, клубнинг натижалари кескин яхшиланмас, аммо тажрибали мутахассис Виктор Кумиков туфайли йигитларимиз футбол ва машғулотларга бошқача ёндашишларига ишонаман.

Бу аввало, миллий футболимизнинг умумий равнақи учун муҳимдир. Қанийди, олий лиганинг камида 5-6та жамоасида хорижлик мураббий ишласа....

Дадажон КАМОЛИДДИНОВ, Ангрен шаҳри.