Испания чемпионатининг 31-туридан ўрин олган «Реал» ҳамда «Атлетико» клублари ўртасидаги Мадрид дербисидан сўнг ташкиллаштирилган матбуот анжуманида мураббийлар ўз фикрларини билдириб ўтдилар.

Зинедин Зидан: «Атлетико» яхши ўйнади деб айта олмайман

Ўйиндаги натижа ҳақида

«Бугунги кўрсатган ўйинмизни ҳисобга олиб айтадиган бўлсам, қўлга киритган очкодан хурсанд эмасмиз. Ҳозир дам олишимиз ва бошқа мусобоқа доирасида чоршанба куни кечадиган ўйинга тайёргарлик кўришимиз керак – унда ғалаба қозонишга ҳаракат қиламиз. Бугунги ўйинга келадиган бўлсак, бу – футбол, унда ҳамма нарса бўлади».

Ёмон якун ҳақида

«Бугун яхши ўйин намойиш этдик, аммо сўнгги беш дақиқада концентрацияни йўқотиб қўйдик. Бугун «Атлетико» яхши ўйнади деб айта олмайман, биз иккинчи голни кирита олмадик, ҳимояни мустахкам ушлай олмадик ва ўйин охирида гол қўйиб юбордик».

Пепенинг жароҳати ва Тони Крооснинг алмаштирилиши ҳақида

«Мураббий футболчини алмаштирар экан, демак у ўйин натижасидан қониқмаётган бўлади, аммо Пепенинг ўзгартирилиши мажбурий эди. Искони туширишимдан мақсад: у чап қанот ҳимоясига ёрдам бериши керак эди, чунки у тўпни ўзида яхши ушлай олади. Афсуски, ўйин сўнггида ҳимояда яхши ҳаракат қилолмадик».

Ёқимсиз дуранг ҳақида

«Биз бугун дуранг қайд этдик, аммо ҳақиқатда икки очко йўқотдик, бугунги ўйинда ҳотиржамлик билан уч очкони қўлга қиритишимиз мумкин эди. Ҳаммаси бир-бирига боғлиқ масалан: майдондаги ўйиндан келиб чиқиб айтадиган бўлса, «Алавес»га қарши баҳсда биз йирик ҳисобда ғалаба қозонмаслигимиз керак эди. Бугун дуранг қайд этдик, энди буни ўзгартириб бўлмайди. Чемпионлик учун кураш сўнгги лаҳзаларгача давом этади».

Ўтказиб юборилган гол ва руҳий ҳолат борасида

«Мен ўша вазиятда нима содир бўлганини билмайман, уни таҳлил қилишимиз керак. Умуман ҳимоялана олмадик деб айта олмайман, бироқ шуниси аниқки ушбу вазиятда яхши ўйнамадик ва майдонда нотўғри жойлашган эдик. Албатда, ҳозир бироз жаҳлим чиққан. Тушкунликка тушиб қолдим дея олмайман, аммо жаҳлим чиққани аниқ. Ҳар қандай вазиятда ҳотиржамликни сақлашга ва оптимистик фикрлашга ҳаракат қиламан».

Клуб билан шартнлма борасида

«Бу саволни менга берманг, мен ҳар жиҳатдан максимал куч билан ишламоқдаман ва «Мадрид»ни кўпроқ бошқаришни кўзламоқдаман. Ҳар хил миш-мишлар келиб чиқмаслиги учун, бошқа бу ҳақида гапиришни истамайман».

Чарчоқ аломатлари ҳақида

«Муаммо жамоанинг жисмоний тайёргарлигида, деб ўйламайман. Эътиборни йўқотганимиз учун гол ўтказиб юбордик, бу ерда жисмоний ҳолаттнинг алоқаси йўқ».

Антуан Гризманн борасида

«У ўз ишининг устаси ва ушбу мавсумда кўплаб голлар урмоқда. Шунингдек, бугун ҳам майдонни голсиз тарк этмади».

Диего Симеоне: Ғалабага яқин эдик

Ўйин ҳақида

«Биринчи бўлимда рақиб тўпни назорат қилган бўлсада, уларда хавфли вазиятлар бўлмади. Иккинчи бўлим бошидаги 20-25 дақиқа бизга осон бўлмади, бироқ ундан сўнг ўзгартиришлар натижасида майдон марказида ишончлироқ ҳаракат қилдик. Биз Анхел Корреанинг ҳужумда эркин ҳаракат қилишига замин яратдик, ўйин сўнгида ғалабага яқин эдик».

Фернандо Торрес борасида

«У катта кўламли ишни бажарди ва кўп курашди. Торресда голли вазият бўлди, бироқ рақиб дарвозабони яхши ҳаракат қилди. Сўнгги дақиқаларда бизга ҳужумда «янги қон» керак эди, шунинг учун Корреани майдонга туширдим ва у Гризманн билан биргаликда жуда яхши ҳаракат қилди».

Антуан Гризманн ҳақида

«Гризманн – жуда истеъдодли футболчи, унинг тўп билан ишлашини кўриш шунчаки ёқимли. Бошида унга осон бўлмади, аммо ҳозирги даражага чиқа олганидан жуда шодман. Бугун у ажойиб ҳаракат қилди, шунингдек Стефан Савич, Диего Годин ва Филипе Луислар ҳам яхши ўйнашди. Ўйин сўнггида ғалабани илиб кетишимиз мумкин эди».

Чарчоқ ҳақида

«Ўйлайманки, жамоа яхши формада. Биринчи бўлимда тезлик эвазига рақибга туриб бердик. Комбинацияларимиз ўхшай бошлаганидан сўнг бизга осонроқ бўлди».

ЕЧЛдаги рақиб - «Лестер» борасида

«Ҳозирда улар аввалги муаммоларини ҳал қилиб улгурдилар. «Лестер» ЕЧЛ чорак финалидаги бошқа жамоаларга ўхшамайди: улар қийин ва оғир рақибдирлар».

Шунингдек баъзи футболчилар фикрлари билан ҳам танишинг.

Серхио Рамос

«Шундай яхши ўйин билан бир очко олиш аламли. Ҳа, бизга сўнгги дақиқаларда диққат етишмади, аммо биз баҳснинг кўп вақтида устунликка эга бўлдик. Рақиб ўзининг кучли томонларини яхши билади ва улар ўйин сўнггида бундан фойдаландилар. Охирида ўтказиб юборилган гол ҳар доим аламли бўлади, бундан керакли хулосаларни чиқаришимиз ва бундай ҳолат бошқа қайтарилмаслигига ҳаракат қилишимиз керак.

Энди бизни Мюнхенда «Бавария»га қарши ўйин кутиб турибди, у ерда сўнгги қонимиз қолгунича курашамиз ва ундан кейин «Барселона»ни қабул қиламиз. Ҳал қилувчи Класико бизнинг майдонда бўлади, бу эса бизга катта устунлик беради. Бу мавсум Ла Лигада чемпионлик учун кураш жуда қизғин кетмоқда ва ҳар қандай хато жамоага қимматга тушиши мумкин.

Бизда ажойиб таркиб бор ва футболчилар ўртасидаги рақобат бизни кучайтиради. Биз ҳаммамиз ўйнашни хоҳлаймиз ва алмаштиришлар ҳеч кимга ёқмайди, шунинг учун Зидан Хамеснинг ҳиссиётларини тўғри тушунишини айтиб ўтди. Шунчаки ўз терма жамоасида етакчи бўлган футболчилар «Реал»да қандай рол ўйнашларини тушуниб олишлари керак.

Агар Антуан Гризманн ёки шундай даражадаги футболчилар бизнинг жамоага келмоқчи бўлсалар, муаммо йўқ, «Реал»нинг эшиклари барча учун очиқ».

Марсело

«Биз 85 дақиқа давомида катта устунликка эга бўлдик, аммо сўнгги дақиқаларда эътиборни йўқотдик ва бунинг учун жазоландик. Хатолар устида ишлашимиз ва «Бавария»га қарши ўйинга тайёргарлик кўришимиз керак. Умид қиламанки, Пепенинг жароҳати жиддий эмас».