Очиғи, ОЧЛ 3-туридан ўрин олган «Бунёдкор» - «Зоб-Оҳан» ва «Истиқлол» - «Локомотив» учрашувларини кузатиб, беихтиёр «Футболда боримиз шу экан-да» қабилида хулосага келгандим. Ахир ўша ўйинларда футболчиларимизда на иштиёқ ва на ғалаба учун шижоат сезилди. Рақибларнинг ҳар томонлама устунлик қилишгани ҳам рост. Умуман, футболимизда тезлик ва жисмоний ҳолат ҳамон катта муаммо бўлиб қоляпти.

Бу борада Осиё миқёсида ҳам анча орқада қоляпмиз. Негадир мураббий ва мутахассисларимиз бу камчиликлар хусусида дангал гапиришмайди. Дейлик, футбол кўрсатувларида танқид йўқ, савия жуда паст. Айрим шарҳловчиларнинг овози умуман эфирга тўғри келмайди.

Журналистнинг вазифаси қайсидир ўйинчининг нега майдонга тушмаганини ўз ҳамкасбидан сўраш эмас («Гол» кўрсатувида шундай бўлди), бунинг сабабини бевосита мураббий орқали аниқлаб, мухлисларга етказишку.

Нима бўлганда ҳам, мухлис эканмиз, ОЧЛнинг 4-тур ўйинларига умид билан боқамиз. Чемпион ва вице-чемпионимиз энди дарз кетган ишончни бутунлай синишига йўл қўймасликлари керак. Бас, шундай экан, уйғонинг, йигитлар!

Тўлқин ШАЙМАНОВ, Хатирчи тумани.