ЧЛ чорак финалининг дастлабки беллашувлари олам-олам таассуротлар уйғотгани айни ҳақиқат. Важоҳатли «Барселона»нинг яна бир бора мутлақ «тиз чўкиши», аёвсиз «Бавария»нинг бош эгиши, «сенсация»чи «Монако»нинг дадиллиги... Хуллас, кутилмаган натижалар кутилганидан кўп. «СЭ» нашри айни шу ўйинлар юзасидан суҳбатлашиш мақсадида «Барселона»нинг собиқ ярим ҳимоячиси Александр Глебни безовта қилди. Марҳамат, қуйида Беларусь футболининг энг сара вакилларидан бирига тегишли фикр-мулоҳазалар билан танишиб чиқишингиз мумкин.

- «Барса»нинг Туриндаги омадсизлигига асосий сабаб Бускетснинг майдонга тушмаганлигими?

- Менимча, бунинг мағлубиятга алоқаси йўқ. Ҳарқалай, Бускетс майдонга тушганида ҳам, жамоага ёрдам беролмасди...

- Нима учун?

- Аслида «Барселона» сафар учрашувларини кўпинча анча суст ўтказади. Ҳаттоки, ўртамиёна жамоаларга қарши ўйинларда ҳам роса қийналганини кўп кўрганмиз. Шу туфайли «ПСЖ»дан тарсаки қабул қилиб олганди, энди «Ювентус» ҳам жамоани «насиба»сиз қолдирмади.

- Каталония клубининг инқирозга юз тутганини таъкидлашга асос борми?

- Ҳа, «Барса» дарҳақиқат, аввалгидек эмас. Раҳбарият янги мавсум олдидан айниқса, ҳимоя чизиғини кучайтириши шарт. Акс ҳолда, ҳеч нарсага эришолмайди. Яна шуни эътиборга олиш керакки, рақиблар «тики-така» услубига мослашиб улгуришди. Қаранг, каталонияликлар учун ҳужум уюштириш тобора қийин кечмоқда. Зеро, уларга қарши ўйинда очиқ футбол намойиш этадиган рақиб қолмади, ҳисоб. Хуллас, кўплаб жамоалар «Барса»га қарши зич, уюшқоқ ўйин кўрсатишни ўзлаштириб олди.

- Сизнингча, Дортмундда юз берган портлаш «Монако»га қарши учрашувнинг биринчи бўлимида «Боруссия» футболчиларига руҳий таъсир кўрсатмадимикан?

- Бу каби ёқимсиз хатти-ҳаракатлар таъсири билинмаслиги қийин, менимча. Нафақат «Боруссия», балки «Монако» вакилларига ҳам руҳан оғир эди. Аслида менга дортмундликлар ижросидаги ўйин ёқди, лекин омад улардан юз ўгирди. Боз устига, мезбонлар кўплаб вазиятларда гол уролмаслик баробарида  ҳимоявий ҳаракатларда ҳам хатоларга йўл қўйишди ва шунга яраша жазоланишди.

- Мбаппе жаҳон даражасидаги янги ёрқин юлдузми?

- Тўғрироғи, порлай бошлаган юлдуз, у ноёб иқтидор. Мавсум тугагач, қайсидир гранд таркибидан жой олса, ажабмас. Ҳозирча келажагини башорат қилиш ноўрин. Ёш бўлишига қарамай, «Монако»да етарли ўйин амалиётига эга, мураббий унга тўлиқ ишонмоқда. Янги жамоада эса қандай муносабатга дуч келиши номаълум. Кучли рақобатга дош беролмаса, захирада қолиб кетиши ҳеч гап эмас.

- Хави Мартинес майдондан четлатилгунга қадар «Бавария» ҳам, «Реал» ҳам космик даражада футбол намойиш этди. Бу фикрга қўшиласизми?

- Юксак савияли футбол, бу хусусда ортиқча гапга ҳожат йўқ. Агар Мартинес майдонни барвақт тарк этмаганида, «Бавария» ғалаба қозонарди. Мюнхенликларга асоссиз қоидабузарликлар панд берди. Ахир «Реал»дек грандга қарши озчилик бўлиб тўп суриш осон-ми? Мадридликлар бу каби устунликдан самарали фойдаланишни жуда яхши билишади.

- Ҳакам Мартинесга иккинчи сариқ карточкани кўрсатган вазиятда бироз ошириб юбормадими?

- Аслида футболчини оғзаки огоҳлантириш билан чекланиши мумкин эди. Лекин у «Реал» дарвозасига пенальти белгилашда ҳам катта хатога йўл қўйди - такрорий лавҳада тўп қўл билан ўйналмагани яққол кўринди. Видаль «нуқта»дан зарба беришда адашмаганида, «Бавария» эҳтимол, якуний натижани 3:0га етказарди... Албатта, энди яққол фаворит тайин - «Реал».

- Учрашувда «дубл»га эришган Криштиану Роналду дунёнинг энг яхши футболчиси эканлигини исботлай олдими ёки ҳамон собиқ жамоадошингиз - Мессини кучлироқ, деб биласиз...?

- Бу масалада холис гапиришга уриниб кўраман. Криштиану жорий мавсум чиндан ҳам, Мессидан ёрқинроқ кўринмоқда. У айни пайт дунё бўйича тенгсиз. Аргентиналик ҳужумчининг ишлари эса доим ҳам силлиқ кечмаяпти. Назаримда, Мессининг иқтидори юқорироқ. Фақат Роналду жисмоний тайёргарлиги ва техник маҳорати эвазига устунлик қилмоқда.

- Мессининг «Барса» билан шартномаси муддатини узайтирмаслиги ҳақидаги хабарлар унинг ўйинига таъсир кўрсатмаяптимикан?

- Юксак савияли футболчи доимо ғалабага чанқоқ бўлади, совринлар ютиш илинжида тўп суради. Месси эса клуб мунтазам совриндорлар қаторида юриш учун таркибини кучайтириши кераклигини яхши тушунади. Бир қарашда, аргентиналик учун ҳозирги «Барса»да ўйнаш унча мароқли эмасдек. Ахир кўплаб хатоларга йўл қўяётган ва ЧЛдек нуфузли мусобақада йирик ҳисобли  мағлубиятларни қайд этаётган жамоа кимга ҳам ёқади?

- Хуллас, айтмоқчисизки, Леонинг тақдири кўп жиҳатдан жамоадаги селекция ишларига боғлиқ...

- Месси таркиб савияли ўйинчилар орқали кучайтирилишига амин бўлса, ҳеч қаёққа кетмайди, аксинча, юксак марраларни забт этиш йўлида янада кучлироқ иштиёқ билан тўп суради. Бордию, ижобий ўзгаришлар эҳтимоли сезилмаса, ҳар қандай воқеа юз бериши мумкин.

С.РАҲМОНОВ тайёрлади