Қайднома

Қидирув

Ўзгариш вақти етиб келгандир ёҳуд Ўзбек клубларини ҳусусийлаштириш ҳақида

Ўзгариш вақти етиб келгандир ёҳуд Ўзбек клубларини ҳусусийлаштириш ҳақида

  22.04.2017 00:45
  1
  2063
Ўзгариш вақти етиб келгандир ёҳуд Ўзбек клубларини ҳусусийлаштириш ҳақида

Ўтган ҳафта тарқаган хабарлар орасида энг катта шов-шув кўтаргани «Пахтакор» билан боғлиқ маълумотлар бўлди. Шу вақтга қадар Тошкент шаҳар ҳокимияти тасарруфида бўлган клуб ниҳоят хусусийлаштирилиши ҳақидаги гаплар ҳамманинг ақлини шошириши турган гап.

Унинг ортидан «Пахтакор» стадиони қайта реконструкция бўлиши ҳақидагилари эса яна ҳам салмоқли. Аммо ҳозирча бу хабарлар ўз тасдиғини топмади. Биринчиси «Пахтакор» матбуот хизмати томонидан расман инкор этилган бўлса, иккинчиси ҳақида ҳозирча муносабат билдирилмади.

Бироқ халқимизда «Шамол бўлмаса, дарахтнинг учи қимирламайди», деган нақл бор. Шундай экан, балки «Пахтакор» борасида қандайдир янгилик эшитиб қолармиз?! Лекин ҳозир айтмоқчи бўлганимиз фақат бу клуб атрофида бўлмайди.

Ҳозир ўзбек футболи шундай ҳолатдаки, ўзгаришлар қилиш вақти аллақачон келган. Ўзбекистон чемпионатида иштирок этаётган клублар 25 йил муқаддам қандай иш тутган бўлса, ҳозир ҳам шундай давом этмоқда.

Уларнинг фаолияти тўлиғича ҳомийларга қарам. Айтишларича, ҳозирда олий лигада ўз кунини кўра оладиган фақат битта клуб бор -  «Обод». қолганлари эса, ҳатто молиявий жиҳатдан анча кучли кўрингани ҳам ҳомийлардан дарё­дек оқиб келаётган пул ўзани ўзгаргудек бўлса, йўқлик сари сингиб кетиши турган гап.

Ҳозир бу гаплар бироз ғалати эшитилиши мумкин, бироқ бир кун келиб ҳомийлар ҳам клубларга «еб кетар»га пул беришдан зерикмаслигига ким кафолат бера олади? Ахир миллиардлар ҳавога учиб кетаётганини ҳамма кўриб турибди. Клубларимиз ОЧЛда бирор марта ғолиб чиқа олмади, миллий терма жамоа эса ЖЧда иштирок этмади. Шундай экан, бу ҳолат қачонгача давом этади?

Ҳозир ўзбек футболи олдида учта йўл бор. Биринчиси, ҳеч нарсани ўзгартирмай худди шу тахлит давом этиш. Бироқ бу йўл аллақачон эскирган ва бесамар эканини кўриб турибмиз. Албатта, мана шу тизимни ислоҳ қилиб, янгича йўналишда давом эттириш мумкин. Буниси энди иккинчи йўл бўлади.

Аввал ҳам айтганмиз, ПФЛ ишини такомиллаштириб, ҳомийлардан тушаётган маблағ тўғридан-тўғри клублар ихтиёрига ўтмасдан, умумий қозонга ташланиб, кейин олий ва биринчи лига жамоалари ўртасида тенг тақсимланиши адолатдан бўлар эди.

Бундай ҳолатда маблағнинг ярмини ёки бир қисмини чемпионатда эгаллаган ўрнига қараб мукофот тарзида тақсимлаш ҳам мумкин. Бу эса спорт принциплари ортишига сабаб бўлар эди. Модомики, чемпион бўлган жамоа молиявий жиҳатдан ҳеч қандай рағбат олмас экан, бу чемпионатни қандай қилиб профессионал, деб аташ мумкин?

Ҳозир қайсидир клуб бой ҳомийга эга ва ҳеч қийналмай миллиардларни сарфламоқда. Бошқалари эса овқат пулини ҳам тушира олмай ҳалак бўлиб юрибди.  Энди ўйлаб кўринг, мана шу тизим давом этавериши футболимиз ривожига хизмат қиладими?

Ҳомийлар бераётган пул айрим таъмагирлар тасарруфига ўтиб қолаётгани ҳақида ҳам эшитиб турамиз. Токи ўша пулларнинг ҳисобини сўрайдиган одам топилмас экан, бу ҳолат давом этаверса керак. Ҳисоботни эса пулни ўз чўнтагидан чиқараётган одамдан яхшироқ ҳеч ким уддалай олмайди. Айнан шу фактор ўз-ўзидан учинчи таклифни келтириб чиқаради.

Ўзбек футболида клубларни хусусийлаштириш йўлига ўтиш вақти келди. «Пахтакор» борасида келиб чиққан хабарлар эса мана шу давр аста-секин яқинлашаётганини билдирса керак. Биз ҳозир бу янгиликларнинг охири нима билан тугашини билмаймиз. Балки амалга ошар, балки ошмас. Лекин бир нарса аниқ, ҳозирги тизим давом этадиган бўлса, эски ҳаммом эскилигича қолиб кетиши эҳтимоли катта.

Албатта, клубларни хусусийлаштиришга ўтиш оғриқли кечиши турган гап. қайси бири йўқлик қаърига сингиб кетар, бошқалари эса қуйи лигага равона бўлар. Бир вақтлар Италия «А» сериясида «Парма» деган клуб бўларди, Англияда эса «Лидс». Бироқ ҳозир улар йўқ. қуйи лигаларда юришибди. Шундай экан, ўзбек клубларидан қайсидир бири ҳам талафот кўриши турган гап.

Аммо бунинг эвазига қўлга киритиладиган ютуқлар ҳам шунга яраша салмоқли бўлади. Улар орасида энг муҳими эса - соғлом рақобат. Шу вақтга қадар оқсаб келган маркетинг ва бошқарув борасида ҳам ўзгаришлар бўлиши муқаррар. Чунки клуб учун пул тикадиган одам уни қайтариб олиш йўлини ҳам қидиради. Балки ўшанда пойтахт стадионлари ҳам тўлиб қолар.

Нима бўлган тақдирда ҳам бу ишлар бугун ёки эртага амалга ошишини кутиш ноўрин бўларди. Бироқ янги йўлга ўтиш вақти аллақачон келган.

Кўрайлик-чи, балки бу ишни «Пахтакор» бошлаб берар...

Умар БЕК


Манба: www.iff.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Билдирилган фикрлар


uzni futbolchilardan paxta terdirish kerak shunda foydasi tegadi
10.05.2017 02:41

Оммабоп мақолалар

Хабарингиз борми

Чемпионатлар

тўлиқ жадвал »
  • Сиз Эктор Купер миллий терма жамоамизни ЖЧ-2022 (Қатар)га олиб бора олишига ишонасизми?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz