Юртимиздаги миллионлаб футбол мухлисларининг талаб ва истакларини инобатга олиб ҳамда уларнинг футболга бўлган катта қизиқишларидан келиб чиққан ҳолда, UZREPORT TV телеканали футболга ихтисослашган янги FUTBOL TV телеканалини ташкил этишга қарор қилгани ҳақида аввал хабар бериб ўтгандик.

Шуни мамнуният билан маълум қиламизки, FUTBOL TV телеканали бугун 22:00дан бошлаб тест режимида иш бошлайди!

Бугун тунда, соат 23:00да бошланадиган Испания чемпионатидан ўрин олган “Реал” – “Барселона” жамоалари ўртасидаги “Эл-Класико” ўйини UZREPORT TV телеканали билан параллел равишда FUTBOL TV телеканалида ҳам жонли эфирда намойиш қилинади.

Тест режими пайтида FUTBOL TV телеканали соат кундузги 14:00дан тунги 03:00гача, 12 соат давомида эфирга узатиб борилади. Тест режимидан муваффақиятли ўтгач, FUTBOL TV телеканали 24 соатлик эфир дастурлари билан ўз фаолиятини давом эттиради.

Шу билан бирга UZREPORT TV телеканалида футбол ўйинлари трансляцияси тўхтаб қолмайди.

Реклама берувчилар олдидаги мажбуриятларни бажариш мақсадида жорий мавсум охирига қадар Европа Чемпионлар лигаси, Англия Премьер-лигаси ва Испания чемпионати ўйинлари UZREPORT TV телеканалида ҳамда, FUTBOL TV телеканалида параллел тарзда жонли равишда кўрсатилади.

Европа Лигасининг ярим финал ва финал баҳслари фақат FUTBOL TV телеканалида намойиш этилади. Шунингдек, ЕЧЛ, АПЛ ва Ла лигадан ўрин олган учрашувлар ёзиб олинган ҳолда ва такроран FUTBOL TV телеканалида эфирга узатиб борилади.

Европанинг энг кучли чемпионатлари трансляцияси келаси мавсум ҳам UZREPORT TV ҳамда FUTBOL TV телеканалларида давом этади.

Бундан ташқари, FUTBOL TV телеканалида жаҳон ва ўзбек футболига оид бўлган турли қизиқарли кўрсатувлар, бадиий ва ҳужжатли фильмлар эфирга узатиб борилади.

Шу ўринда УЕФАнинг талабига кўра, UZREPORT TV ва FUTBOL TV телеканалларидаги футбол ўйинлари бундан буён сунъий йўлдош орқали эфирга узатилмаслигини маълум қиламиз. Сабаби, UZREPORT TV телеканали футбол ўйинлари трансляциясини фақат Ўзбекистон ҳудудида намойиш қилиш ҳуқуқига эга.

Юртимиздаги футбол мухлислари UZREPORT TV ҳамда FUTBOL TV телеканалларини бепул рақамли телеканаллар пакетида томоша қилишлари мумкин.

UZREPORT TV ҳамда FUTBOL TV телеканаллари орқали жаҳон ва Европа футболининг қизиқарли баҳсларини жонли эфирда томоша қилишда давом этинг!

Сюрпризлар мавсуми давом этади...