ЧЛ чорак финалидан ўрин олган «Боруссия» - «Монако» (биринчи ўйин) учрашуви аслида 11 апрелга белгиланган эди. Аммо шу куни Дортмундда «Боруссия» футболчилари жойлашган автобус яқинида портлаш содир этилди. Оқибатда ҳимоячи Марк Бартра жароҳатланиб, жарроҳлик амалиётини бошдан ўтказди.

Кўнгилсизлик юзасидан суриштирув олиб борган полиция воқеа жойидан хат топилганини маълум қилган, лекин унинг мазмунини баён этмаганди. Россия матбуотида берилган сўнгги хабарларга қараганда, полициячилар жиноятда гумон остига олинган шахсни ушлашган. У Россия фуқароси ва ёши 28да.

Россия Бош прокуратураси ҳам бу маълумотни тасдиқлади. Терговчилар дастлаб барчасини теракт сифатида баҳолашганди. Аммо кейинчалик бу фойда олиш мақсадида қилинган жиноят эканлиги аниқланди. Қўлга олинган шахс Германия паспортига ҳам эга ва портлаш юз беришидан бир кун олдин интернет орқали клубнинг 15 минг дона акциясини 78 минг еврога сотиб олган.

Хуллас, тахмин қилинишича, у акциялар баҳосига таъсир ўтказиш орқали 4 миллион евро фойда олишни кўзлаган.