Воқеалар ривожи 2006 йилга бориб тақалади. Ўшанда ўн беш ёшли оддий болакай Бразилиядаги кичик бир мактабда таҳсил оларди. Отаси пляж ва концерт заллари ёнида ичимлик сотар, онаси уйда ўтирарди. Бўлажак футбол юлдузи эса қашшоқ оиласига имкон қадар ёрдам бериш мақсадида Атлантика океани соҳилида кокос савдоси билан шуғулланарди. Мана, йиллар ўтиб, у Англияда тўп суриш орқали бутун дунёда мухлис орттиришга эришди. Бугун «Ливерпуль» ўйинчиси Роберто Фирмино ҳамда унинг тақдирига таъсир кўрсатган стоматолог ҳақида сўз юритмоқчимиз.
Робертонинг ота-онаси фарзандларининг тўп ортидан қувмаслиги, ўқишдан чалғимаслиги ва бир неча йилдан сўнг Масейога нисбатан анча тараққийлашган, хавфсиз шаҳарга кўчиб ўтишини хоҳлашарди. Аммо бу режа амалга ошмади. Фирминони математика китоби билан холи тарзда уйга қамаш ҳам наф бермади, у дераза орқали ташқарига чиқарди.
Хуллас, унга маълумот олиш насиб қилмади, аммо шунга қарамай, халоскорини учратди.
Роберто КРБ («Клуб Регатас Бразил») мактабида шуғулланди, бироқ вақт ўтгани сари мураккабликлар ортаверди: клуб молиявий муаммоларга йўлиқди, мураббийлар ойлаб маош олишмади, академиядаги ёшлар ҳам зўрға кун кўришарди. Мазкур ҳолатда Фирминонинг жонига КРБда стоматолог бўлиб ишловчи Марселлуш Портелла оро кирди.
- Илк бор унинг ўйинини кўрганимда нақадар юксак иқтидор соҳиби эканини тушунгандим. Аммо Роберто ҳеч кимда қизиқиш уйғотмаётганди, - дея эслайди Портелла. - Вақти келиб Фирминонинг терма жамоада ўйнашини айтганимда, мени тентакка чиқаришган. Ҳозир эса ўша кишилар болакайнинг истеъдодини пайқашмагани учун ўзларини койишмоқда.
Робертонинг стоматолог билан танишувидан сўнг рўй берган воқеалар афсонага ўхшайди, ваҳоланки, буларнинг бари ҳақиқат. Портелла инқироз арафасида турган КРБда қолиш нотўғри экани, бошқа ерда ўзини синаб кўриши лозимлигини айтганди.
Шу тариқа Марселлуш Фирминонинг оиласи билан танишиб, барчанинг қалбига ишонч уруғларини сепди. «Атрофдагиларнинг ишончини қозона олмаётганимда у мени қўллаб-қувватлади. Турли маслаҳатлари билан катта ёрдам берди», - дейди Роберто.
***
Гўёки, стоматолог Фирминонинг руҳий кўмакчиси, агенти ва ҳақиқий дўстига айлангандек эди. Тиббиёт вакили эски алоқаларини ишга солиб, Роберто учун «Сан-Паулу»да кўрик ташкил этди, лекин икки ҳафталик машғулотлар самара келтирмади. Биринчидан, ёш футболчига тўпни ишониб топширишмади, иккинчидан, у бирор-бир янги нарса ўрганмади, учинчидан эса, уни уйига қайтариб юборишди. Хуллас, қидирувлар қайтадан бошланди.
2008 йили Робертога «Фигейренсе» қизиқиш билдирди. КРБда ундан деярли мунтазам равишда таянч чизиғида фойдаланишарди, кўрик жараёнида эса Фирмино ҳужум уюштириш жараёнида ҳақиқий шоу кўрсатди.
- Илк машғулотда у икки марта чалқанча услубда гол урди. Робертонинг қандай даражага эга эканлиги тушунарли эди, - дея эслайди «Фигейренсе» мураббийи Эмерсон Мария. - Ҳа, унинг етарлича маълумотга эга эмас, аммо майдонда ҳамиша ақлли ўйин кўрсатарди. Тезкор қарор чиқариши кишини ҳайратлантиради, тактикага тезда мослашди. У ҳақиқий даҳо».
***
Фирмино «Фигейренсе»га ўтганида дастлаб ҳеч ким билан суҳбатлашмади, жамоадошлари уни ҳазиллашиб «соқов» деб аташарди. Вазият шу қадар ғалати эдики, айрим ўйинчи ва мураббийлар Робертонинг исмини ҳам билишмасди. Бўлажак юлдуз эса нотўғри ном билан чақираётганларнинг хатосини тўғрилашдан ийманарди.
- У жуда камгап эди, чунки илк бор уйидан йироқда узоқ вақт қолиб кетганди, онаси ҳар куни йиғларди, - дейди мураббий Эмерсон Мария. - Одатда, исмларни эслаб қолишда қийинчиликка дуч келмасдим, бироқ Роберто билан бутунлай бошқача ҳолатга тушдим. Бир ҳафта мобайнида уни Альберто деб чақирдим, кўрсатма бердим. Фирмино эса айтганларимни сўзсиз бажарарди.
Футболчининг номи аслида қандай эканлигини билиш ҳам қизиқ бўлди. Жисмоний тайёргарлик бўйича мутахассис бош мураббийга шогирдининг исми Альберто эмаслигини айтди.
- Ҳой, Альберто, буёққа кел, - деди жамоа устози шундан сўнг.
Фирмино дарҳол мураббий қаршисида пайдо бўлди.
- Демак, сен Альберто эмас экансан-да?
- Ҳа, сэр, менинг исмим Роберто, - деди Фирмино.
- Сени қара-ю, бир ҳафтадан буён бошқа ном билан чақирсам ҳам жим юрибсан-а.
Икковлон кулиб юборишди.
Фирмино «Фигейренсе»да тезда ўсишга эришди. Бир йил мобайнида U-17 жамоасининг энг камгап йигитидан асосий таркиб етакчисига айланиб, 10-рақамни олди.
Эмерсон Мария шогирдининг иштиёқидан ҳайратланганини яширмади: «У керагидан ортиқ ишларди, бир йил мобайнида клуб базасидан бошқа ерга бормади».
***
2010 йили Фирмино «Фигейренсе»нинг Бразилия чемпионати олий дивизионига чиқишига кўмаклашди ва дарҳол Европани забт этишга отланди: «Хоффенхайм» унинг учун 4 млн. евро сарфлаб, кейинроқ 41 млн.га «Ливерпул»га сотиб юборди. «Айни пайт ўйин услубимнинг ярми Бразилия, ярми Германия футболига хос, деб ўйлайман», - дейди Фирмино.
Робертонинг инқироз ёқасидаги академиядан жаҳон футболига йўл олишига катта ҳисса қўшган Марселлуш Портелла ҳозир стоматолог бўлиб ишламаяпти - эндиликда у Фирминонинг дўсти ва яқин ёрдамчиси ҳисобланади. Ўзини агент деб аташ фикридан йироқ, иши билан боғлиқ маълумотларни ошкор этишни истамайди - у мураккаб тизим яратмаган, катта пул ишлашни режалаштирмаган. Шунчаки, бир болакайга ёрдам берган.
Ў.УМАРОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20