InterFutbol анъанага мувофиқ, ой лауреатларини аниқлади. Бу галги рўйхатда рақиб жамоа киперларини аямаётган тўпурар ҳам, ўзининг «қуруқ» серияси билан кўпчиликни ҳайратлантирган дарвозабон ҳам бор. Мураббийлар учлигидан эса шо-гирдларини барқарорлик сари етаклаб, грандларни мағлубиятга учратишни уддалаган мутахассислар ўрин эгаллашди. Умуман, апрель мухлисларга бир-биридан қизиқарли ўйинлар, кутилмаган ҳисоблар, ҳақиқий сенсацияларни тақдим этди. Қуйида баҳорнинг иккинчи ойида энг яхши деб топилганлар билан танишишингиз мумкин.
Эҳтимол, апрель «Локомотив» учун унчалик муваффақиятли келмагандир. Ҳар ҳолда, Мирко Йеличич шогирдларининг ОЧЛда икки марта ғалабани қўлдан чиқаришлари гуруҳдаги вазиятни янада мураккаблаштирди. Бироқ «темирйўлчилар» сафида танқиддан холи футболчи бор - Марат Бикмаев.
Тажрибали ҳужумчи «Локо»нинг ҳар бир ўйинида ўзидан фақат илиқ таассурот қолдирмоқда ва агар ҳимоячилар бироз фаолроқ ўйнашганида, ушбу форвард аллақачон жамоадошлари билан кейинги босқич тараддудини бошлаб юборган бўларди. Дарҳақиқат, Маратнинг статистикасига назар ташласангиз, унинг юқори спорт формасига кириб олганини пайқаш қийин эмас. Анчадан буён бир футболчининг 6та ўйинда 9та гол ургани кузатилмаганди. Иккинчи ёшлигини ўтказаётган Бикмаев сўнгги олтита баҳснинг учтасида энг яхши ўйинчи, деб топилди. Пайқаганингиздек, бу сафар ўйинчилар орасида ғолиблик «Локомотив» форвардига насиб этди. Шубҳасиз, у шундай эътирофга лойиқ.
Аслида, биринчи ўринга яна бир асосий даъвогар бор эди - Филипп Райевац. «Қўқон-1912» барқарорликни таъминлаб, кетма-кет қозонилган ғалабалар эвазига турнир жадвалининг юқори ўринларини эгаллаб турибди.
Бунда албатта, сербиялик легионернинг ҳиссаси катта бўлмоқда. Эндигина яшил майдонга кўникаётган ёшлар ҳақиқий ҳужумчи қандай ҳаракатланиши лозимлигини Қўқон клуби форвардидан ўрганишса арзийди. Дарвоқе, Филипп рақиб дарвозасини забт этишдан ташқари, ассистентликни ҳам қойиллатмоқда. Бироқ апрель ойи кўпроқ Бикмаевга аталди, акс ҳолда, биринчи ўринни ортиқча иккиланишларсиз Райевацга топширардик. Ҳозирча эса у иккинчи поғона билан чекланди.
«Навбаҳор» тўртта ўйинда дарвозаси дахлсизлигини сақлаб қолди, фақат 8-турга келибгина «Пахтакор» бу серияга барҳам берди. Аниқроғи, автогол «лочинлар»га қимматга тушди. Акс ҳолда, «қуруқ» ўйинлар сони яна биттага ошарди.
Хуллас, шундай натижа қайд этилишида асосий сабабчига айланган Асилбек Омонов лауреатлар рўйхатида учинчи ўринни эгаллади. Маҳоратли посбоннинг ишончли ҳаракатлари «Навбаҳор» ҳимоячиларига ҳам қўшимча куч бағишламоқда. Шуни инобатга олган ҳолда, кейинги поғонани Омоновга ажратдик. Ишонамизки, у кейинги баҳсларда ҳам ўз манзилига йўлланаётган мақтовлар бежиз эмаслигини исботлайди.
Албатта, апрелда энг яхшилар қаторидан ўрин эгаллашга даъвогарлар кўпчиликни ташкил этди. Хусусан, Кахи Махарадзе, Жалолиддин Машарипов, Суҳроб Бердиев, Ғиёс Комилов, Ойбек Қиличев, Жавоҳир Қаҳрамонов, Зафар Тўраев, Игорь Таран сингари футболчилар ўз жамоаларида ҳақиқий етакчиларга хос тарзда ҳаракат қилишди.
Мураббийлар орасидан лауреат танлашда ортиқча қийинчиликка дуч келмадик. Қўл остидаги таркибни ҳар бир баҳсга ажойиб тарзда тайёрлаётган Нўъмон Ҳасанов бошқа ҳамкасбларидан фаолроқ кўринмоқда.
Акс ҳолда, апрель якунига кўра, «Қўқон-1912» олий лига турнир жадвалида иккинчи ўринни эгаллаб турмасди. Дарҳақиқат, қўқонликларнинг ўйинига жозиба кирган, тактика танлови бўйича ҳам муаммо йўқ, футболчилар барча учрашувларни юқори кайфиятда ўтказишмоқда. Бундай ютуқлар замирида, албатта, жамоа устозининг меҳнатлари ётибди.
Иккинчи ўринни ёшлик шижоати ва тажрибани уйғунлаштиришни уддалаётган Александр Хомяков эгаллади. Тан олайлик, «Машъал»нинг бугунги таркиби унчалик кучли эмас. Аммо тажрибали мутахассис ихтиёридаги футболчиларни бир мақсад йўлида бирлаштириб, жамоа ўйинига ранг-баранглик бахш эта оляпти.
Муборакликлар апрелда фақат Наманганда мағлубиятга учрашди, ваҳоланки, «Навбаҳор»га қарши кечган баҳсда ҳам «газчилар» ҳамжиҳатликда тўп суриб, мухлисларга хуш ёқадиган футбол намойиш этишганди. Хомяков эса ҳар бир баҳсни майдон четида тик турган ҳолда кузатиб, шогирдларига керакли кўрсатмаларни беришдан чарчамайди. Мана, унинг меҳнатлари аста-секин самара келтирмоқда.
Мураббийлар кучли учлигини Илҳом Мўминжонов якунлаб беради. Аввалги мавқеини тиклашга уринаётган «Навбаҳор»нинг ишлари ҳозирча чаккимас. Ҳар ҳолда ўтказилаётган учрашувларда «лочинлар» қимматли очколарни қўлга киритишмоқда, ўйинга ҳам анча мазмун кирган.
Дарвоқе, Хомяков ҳақида айтганларимиз Мўминжоновга ҳам тегишли: ўйин бошланганидан то ҳакамнинг финал ҳуштаги чалингунга қадар майдон четидаги энг фаол шахсга айланади. Албатта, мураббийнинг клуб манфаати йўлида шундай жон куйдириши маҳаллий ишқибозларни ҳам бефарқ қолдирмаяпти.
Шунингдек, Олег Тюлькин ва Илҳом Шарипов бошчилигидаги «Динамо» мураббийлар штаби, «Локомотив» билан янги марраларни кўзлаётган Мирко Йеличич ва Андрей Микляев тандеми, «Насаф» устози Рўзиқул Бердиевлар ҳам ёмон натижа қайд этишмади. Ўз навбатида, бош мураббийликка эндигина кўникаётган Улуғбек Бақоевнинг «Бухоро»да эришаётган натижалари ҳам чаккимас. Аммо бу мутахассислар айрим жиҳатлар бўйича кучли учликдаги ҳамкасбларидан ортда қолишди. Умид қиламизки, кейинги ой лауреатлари сафида уларнинг ҳам номларига мурожаат этамиз.
Футболчиларнинг ой давомидаги натижалари
№ Футболчи Ўйин Дақиқа Гол Энг яхши
1. Марат Бикмаев 6 507 9 3
2. Филипп Райевац 4 303 2 1
3. Асилбек Омонов 4 360 -1 -
Изоҳ: фақат расмий ўйинлар ҳисобга олинган.
------------------------------------------------
Энг яхши мураббийлар
Февраль
1. Мирко Йеличич («Локомотив»)
2. Илҳом Мўминжонов («Навбаҳор»)
3. Нўъмон Ҳасанов («Қўқон-1912»)
Март
1. Рўзиқул Бердиев («Насаф»)
2. Олег Тюлькин («Динамо»)
3. Александр Хомяков («Машъал»)
Апрель
1. Нўъмон Ҳасанов («Қўқон-1912»)
2. Александр Хомяков («Машъал»)
3. Илҳом Мўминжонов («Навбаҳор»)
------------------------------------------------
Энг яхши футболчилар
Февраль
1. Марат Бикмаев («Локомотив»)
2. Мурод Зуҳуров («Бунёдкор»)
3. Темурхўжа Абдухолиқов («Ал-Сайлия», Қатар)
Март
1. Одил Аҳмедов («Шанхай СИПГ», Хитой)
2. Драган Черан («Насаф»)
3. Шоҳруз Норхонов («Обод»)
Апрель
1. Марат Бикмаев («Локомотив»)
2. Филипп Райевац («Қўқон-1912»)
3. Асилбек Омонов («Навбаҳор»)
------------------------------------------------
Умумий натижа
Мураббийлар
1. Нўъмон Ҳасанов - 6 очко
2-3. Мирко Йеличич - 5 очко
2-3. Рўзиқул Бердиев - 5 очко
4-5. Илҳом Мўминжонов - 4 очко
4-5. Александр Хомяков - 4 очко
6. Олег Тюлькин - 3 очко
------------------------------------------------
Футболчилар
1. Марат Бикмаев - 10 очко
2. Одил Аҳмедов - 5 очко
3-5. Мурод Зуҳуров - 3 очко
3-5. Драган Черан - 3 очко
3-5. Филипп Райевац - 3 очко
6-8. Темурхўжа Абдухолиқов - 1 очко
6-8. Шоҳруз Норхонов - 1 очко
6-8. Асилбек Омонов - 1 очко
------------------------------------------------
Изоҳ: 1-ўрин - 5 очко, 2-ўрин - 3 очко, 3-ўрин - 1 очко.
Ўткир УМАРОВ
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20