«Эндигина жароҳатидан фориғ бўлган Гарет Бэйлнинг яна сафдан чиқиши мумкинлигини ким ҳам ўйлабди дейсиз?». Бу аламли сўзлар журналист Ричард Мартиннинг твиттерида ёзиб қолдирилди. Мазкур битик остидаги изоҳларни мутолаа қилсангиз, Бэйл умуман жароҳатлардан қутулмайдиган омадсиз футболчидек тасаввур уйғотади. Рост-да, ахир дунёнинг собиқ энг қиммат футболчиси замонамизнинг энг муросасиз «Класико»сида бор-йўғи 38 дақиқага яраса, Зиданга алам қилади-да...

Оддийгина рақамлар

ESPN компаниясининг ҳисоб-китобларига кўра, Бэйл Мадриддаги тўрт мавсум давомида 17-бор жароҳатга йўлиқмоқда.

Жароҳатлар туфайли у «Реал»нинг 79та ўйинини ўтказиб юборишга мажбур бўлди.

Муаммолардан кўз юмишнинг иложи йўқ. Ҳаттоки, сизнинг исмингиз Флорентино Перес бўлса ҳам.

17 жароҳат? Бу ахир, жуда кўп-ку!

Дарҳақиқат, сўнгги вақтларда Бэйл ва жароҳат бир-биридан айро тасаввур қилиб бўлмайдиган тушунчаларга айланиб қолди. Лекин келинг, масалага ёндашишдан олдин тарихга бир назар солайлик.

«Атиги беш йил аввал «Тоттен-хэм»нинг захирадаги ҳимоячиси саналган Гарет Бэйл кеча «Реал»нинг афсонасига айланди», - деб ёзганди Daily Mirror мухбири Дейв Кидд ЧЛ-2014 финалидан кейин. Яхши биласиз, бу ўйинда Гарет мадридликларнинг ғалаба тўпини киритган. «Бэйлнинг «Реал»даги илк мавсуми ажо-йиб ўтмоқда. Албатта, ким учундир бу бошқача туюлиши ҳам мумкин, лекин Гарет қийинчиликларни бир зумда енгиб ўтмоқда», - деб ёзганди The Telegraph ходими Пол Хэйуорд. Агар ўша даврлар ёдингизда бўлса, Бэйл Полнинг фикри айтилишидан бир ойча муқаддам, Испания кубоги финалида Марк Бартрани ёш боладек лақиллатди ва бу билан британиялик журналистларнинг мақтанишларига йўл очиб берди. Зеро ҳақиқатан ҳам, «Сантьяго Бернабеу»даги 2013|2014 йиллар мавсуми Бэйл учун кўнгилдагидек ўтганди.

Аммо январь ойига келиб, Гаретнинг жароҳатларга мойиллиги борлиги барчага маълуб бўлиб қолди ва шу боис, испан матбуотида Бэйлни Жонатан Вудгейтга ўхшата бошлашди. Вудгейтнинг машҳурлигига сабаб шуки, у турли жароҳатлар ва кулгули фалокатлар туфайли «Реал» либосида бор-йўғи 14 марта майдонга тушган, холос. Табиийки, бу ўхшатишда маҳобат бироз кўпроқ, лекин Гарет мавсум давомида анча-мунча, яъни 17та ўйинни ўтказиб юборганди. Боз устига, бу вақтга келиб «Тоттенэм»дан ўта юқори нархда сотиб олинган вингернинг умуртқасида муаммолар борлиги барчага ошкор бўлиб қолганди.

Лекин нафсиламрини айтганда, 2014|2015 йиллар мавсуми - Испаниядаги биринчи йил Бэйл учун ёмон ўтмади. У 48 ўйинда 4200 дақиқа ҳаракат қилди. Ўтган мавсумда эса кўрсаткич икки баробар пасайиб кетди. Жорий мавсумда эса ҳолат қандай эканини барча яхши билади...

Бизнингча, Бэйл фаолиятидаги энг ёқимсиз жароҳатларни яқинда орттириб олди. Дейлик, «Спортинг» (Хихон, январь-2016)га қарши ўйин чоғида унинг сон мушаклари узилди. Лиссабоннинг шу номдаги клубига қарши баҳсда эса (ноябрь-2016) болдир пайларидаги чўзилиш сабаб уч ой ҳавога кетди.

Хуллас, Бэйлнинг асосий муаммолари қуйидагилар: сон ва болдир мушаклари, бел, оёқ кафти ва пайлар.

 Бэйл доим шунақамиди?

Сирасини айтганда, Бэйл фаолиятидаги энг оғир дамлар унинг ўсмирлик чоғларига тўғри келади. Дейлик, у 16 яшарлигида футбол билан бутунлай хайрлашиши ҳам мумкин эди. У пайтлари Бэйл 100 метрлик масофага чопишда биргина Тео Уолкотт-га ютқазарди, холос. Бироқ айни чоқда Гаретни ўсмирларга хос муаммо - бўйи пастлиги қийнарди. 15 ёшга тўлганида эса унинг бўйи бирданига, катта тезликда ўса бошлади. Афсуски, бу - болакайнинг фойдаси эмас, зарарига ишлади. Бэйл ўша дамларни қуйидагича эслайди: «Болалигимда мен жуда пакана эдим. Лекин 15 ёшга тўлганимда бўйим тез ўса бошлади. Бунинг оқибатида белимда кучли оғриқлар пайдо бўлди. Суякларим оғирлигимга нисбатан ҳаддан ташқари йирик эди».

- Бу жараён унинг ҳаракатчанлиги ва кучига салбий таъсир кўрсатди. Ўша уч йиллик давр Бэйл учун ниҳоятда мураккаб кечганди, - деб эслайди футболчининг илк мураббийларидан бири Род Раддик.

Тинимсиз жароҳатлар, белдаги оғриқлар, ўтказиб юборилган маш-ғулотлар натижасида «Саутгемптон» мураббийларида Бэйлнинг келажагига боғлиқ гумон уйғонди. Аниқроқ айтсак, клуб мураббийлари уни жамоада олиб қолиш масаласига шубҳа билан қарай бошлашди. Лекин «Норвич»га қарши ўтган назорат баҳсида Гарет кўнгилдагидек тўп сургани учун у севимли машғулотини давом эттирмоқда. Ким билади дейсиз, ўша учрашувни Кардиффдан етиб келган инсонлар - Гаретнинг ота-онаси кузатишгани учун ҳам йигитча ўзидан яхши таассурот қолдира олгандир?!

Футболчи ҳаётидаги бошқа муаммолар ҳақида Харри Реднапп ҳам етарлича маълумотга эга. Чунончи, уэльслик футболчи айнан шу мутахассис қўл остида машҳурликка эришган. Қолаверса, Реднапп бошқа ҳамкасбларидан фарқли ўлароқ, Гаретга бир нечта оталарча маслаҳат беришга ҳам журъат этган. Дейлик, футболчи ўзига оро беришини кўрган Реднапп танбеҳни жуда қойиллатганди: «Бэйл. Бошингда бўлмағур нарсалар яратишни бас қил!».

«Бэйлнинг фаолиятидаги мен сезган ягона камчилик - у бошида жудаям нозик йигит эди. Дейлик, илгарилари у машғулотларда арзимаган баҳона билан йиқилар, шифокорлар дарҳол майдонга чопиб чиқишарди. Охир-оқибат, бу нарса менинг жонимга тегиб, шифокорларга шундай дедим: «Уни ўз ҳолига қўйинглар, ўзи ўрнидан туриб олсин». Фақат шундан кейингина Гарет ортиқча эҳтиёткорликни бас қилди.

Бошқа томондан, футболда ёзилмаган бир ёқимсиз қоида ҳам мавжуд: сен яхши ўйинчимисан, демак айнан сенинг оёғингга кўпроқ зарба беришади. Тезкор футболчини тўхтатиб қолишнинг ягона ва ишончли йўли - уни йиқитиш. Лекин ҳозиргача Бэйл чаққонлиги эвазига мудҳиш тўқнашувларга чап бериб келаётганди. Улғайганидан кейин эса Гарет тушундики, спортнинг бу турида тўқнашувлардан қочиб қутулишнинг иложи йўқ экан. Шунда у якуний қарорга келди: «Кучли оғриқни ҳис қилаётганимни ҳеч кимга билдирмайман».

Ачинарлиси, бугунга келиб, гарчи Бэйл азоб чекаётганини ҳаммадан яширишга уринса-да, аслида унинг ҳолати яхши эмаслигини барча кўриб турибди.

Энди нима бўлади? Муаммо нимада ўзи?

Ўйлашимизча, муаммо жароҳатларнинг турида. Эътибор берсак, 17 жароҳатнинг деярли ярми - 8таси болдир мушакларнинг узилишига боғлиқ экан. Демакки, Бэйлнинг асосий камчилиги танасининг айни шу қисми билан алоқадор.

Таъкидлаш лозим, Бэйл 2013 йилнинг декабридаги машғулотларнинг бирида Альваро Арбелоа билан тўқнашиб кетади ва кейинчалик маълум бўлишича, югуриш ва сакрашда жуда муҳим ўрин тутадиган юқори болдир мушаклари шикастланган экан. Британиялик машҳур енгил атлетикачилар - Мо Фарах ва Жессика Эннис-Хилларни даволаган мутахассис Эд Кларкнинг фикрича, айнан мана шу мушакларнинг жиддий шикастланиши Гаретда кетма-кет муаммоларни юзага келтирган.

Табиийки, мушаклар - жуда нозик аъзо бўлиб, уларнинг қачон тўлақонли тузалишини олдиндан аниқ айтиб бўлмайди. Бэйл эса майдонга тушиш, мухлислар, мураббий ва раҳбарият ишончини оқлаш учун ҳаддан ташқари интилмоқда. Натижа шуки, унинг майдонга муддатидан олдинроқ қайтиши - фожиа билан тугамоқда. Қаранг, «Бавария»га қарши сафардаги баҳс (мушаклардаги тортишув), кутилмаган алмаштириш ҳамда «Сантьяго Бернабеу»даги нурсиз қайтиш орасида атиги 11 кун ўтди, холос.

«Реал» ҳақида SB Nation учун мақолалар ёзадиган Gerry physio никли фойдаланувчи жамоадаги жароҳатланганлар ҳақида фикр билдира туриб, Рафаэль Варанга боғлиқ ҳодисани эслайди. Унда айтилишича, Вараннинг деярли мажбурий тарзда муддатидан олдин сафга қайтиши атиги 10 дақиқа иш берди, холос: «Алавес»га қарши ўйинда ҳимоячи барибир, кутилганидан анча эртароқ майдондан олинди.

Мақолада шунингдек, сонинг орқа мушаклари ҳақида ҳам батафсил маълумот берилган бўлиб, унда айтилишича, тананинг бу қисми бирданига тезлик олиш ва тўхташ чоғида асосий ишларни бажаради. Бироқ оғир атлетика билан шуғулланиш, ортиқча юкламалар билан ишлаш бу мушакларнинг жароҳатланишига сабаб бўлар экан. Гарет эса маълумки, ўтган ёздан бери тренажёр залида ҳаддан ташқари кўп вақт ўтказмоқда. Ваҳоланки, унинг «темир-терсаклар мухлиси» эмаслиги кўп бора такрорлаганди. Хўш, унда айтинг-чи, бундан беш йиллар олдин «Тоттенхэм»да тўп сурган ориққина, чаққонгина йигитнинг елкалари нега бирдан шунчалик кенгайиб кетди? Хулоса ўзингиздан...

***

Гарет Бэйл - кўз ўнгимизда улкан мақсадлар сари интиладиган, бунинг учун ҳар бир майда-чуйдаларгача жиддий эътибор қаратадиган йигит сифатида гавдаланади. Дейлик, у Роналду босимини енгиб ўтиш учун ўз вақтида руҳшуносга мурожаат қилишдан тортинмаган. Шунингдек, у уйқу бўйича мутахассислар билан ҳам бамаслаҳат иш тутади. Яқинда эса инстаграмдаги саҳифасига юқори баландликда тушган суратини жойлади. Эътиборлиси, Гарет махсус ниқобда эди. Қолаверса, у жисмоний машқларни куни кеча Владимир Кличкони енгган боксчи Энтони Жошуа билан бирга ўтаяпти. Дарвоқе, «Кристал Пэлас» клуби футболчилари ҳам премьер-лигада «жон» сақлаб қолиш ва жисмоний тайёргарликни ошириш мақсадида худди шундай ниқоблардан фойдаланишганди (муҳими, бу усул иш беряпти ва Сэм Эллардайс ойнинг энг яхши мураббийи, деб тан олинса ҳам, ажабмас).

Аммо шуни ёддан чиқармаслик керакки, Гарет 27 ёшга тўлди. Бу пайтда ақлли одамлар ортиқча ишларни бир четга суриб, жароҳат тузалишини кутишади. Гарет эса буни ҳали тушуниб етмаган, чоғи...

***

Яқинда Ғарб ОАВларида «Манчестер Юнайтед» ҳужумчиси Златан Ибрагимович ва унинг жароҳатига боғлиқ кичик бир хабар тарқалди. Унда айтилишича, «қизил иблислар» гарчи ҳужумчи оғир жароҳат олиб, 9 ой муддатга сафдан чиққан бўлса-да, унга янги шартнома таклиф қилишган. Бироқ мағрур швед йигити майдонга чиқмай туриб, йилига 13 миллион фунт пул ишлашни ўзи учун номуносиб билиб, таклифни рад этганмиш. Агар Ибранинг феъл-атворини, ҳалоллигини инобатга олсак, бу хабар рост эканига ишониш мумкин. Ҳақли савол туғилади: Бэйл Златаннинг ўрнида шундай қила олармиди?! «Реал» мухлислари ундан хафа бўлишларини тушуниш мумкин...

Исроил РАҲИМОВ тайёрлади