“Шумбола” фильмидаги Қоравой  ролини билан элга танилган Абдураим Абдуваҳобов Ўзбекистон терма жамоасига жаҳон чемпионатига чиқиш учун нима етишмаётганини айтди.

«Суюнчи» бадиий фильмидаги Шермат аканинг оиласи ҳамманинг ёдида. Уларнинг оилавий футбол жамоаси ғалаба қозониши учун бир футболчи камлик қилади. Ҳозирги ўзбек футболининг жаҳон чемпионатига азалий бесамар уринишлари, доим муҳим ўйинлардаги мағлубияти ҳақида ўйласак, шу фильм эсга тушади.

«Суюнчи»да Абдулла ролини ижро этган актёр Ўзбекистонда хизмат кўрсатган артист, «Дўстлик» ордени соҳиби Абдураим Абдуваҳобов “Оила даврасида” нашри билан суҳбатини айни шу мавзуда бошлади.

“Бир отахон билан гаплашганимда «мана ёшим етмишга бориб қолди, терма жамоамизнинг жаҳон чемпионатига чиқишини ҳали ҳам кутяпман», деган эди. Назаримда, футболчиларимизга виждон етишмаяпти.

Тўғри, қарашимда айрим хатоликлар бўлиши мумкин, лекин уларнинг яратиб берилган шундай шароитда футболни қойиллатмасликка ҳаққи йўқ.

Майдонга тушганда ўйинчи ўзидан кечиб, ҳамма нарсани унутиб, фақат футболнинг ичида яшаши керак. Бизнинг ўйинчилар футболни эмас, ўзини кўпроқ яхши кўради”, – дейди санъаткор.