Фарғонанинг «Нефтчи» клуби бой тарихга эга. Аммо ҳозирда жамоа эгалик қилиб турган бор нарса ҳам шу тарихдан иборат бўлиб қолгандек. Жамоанинг аввалги ўйинидан дарак йўқ ва олий лига жадвалида ҳам сўнгги ўринларда бормоқда. Шунга монанд, стадионга мухлислар ташрифи кескин пасайди.

Фарғона футболи учун бундан-да ёмонроқ манзара бўлмаса керак. Албатта, вазият шундай қолиши мумкин эмасди ва клуб раҳбарияти ниҳоят, жиддий ўзгаришга қўл урди - бош мураббий Андрей Фёдоров истеъфога чиқарилди ва ўрнига Вадим Абрамов таклиф этилди. Бу мутахассисни мухлисларга таништириш шарт эмас, у аллақачон кўпчилик қалбидан ўрин олиб улгурган. Хуллас, Вадим Карленовични катта футболга қайтиши билан табриклаш баҳонасида нималарни режалаштираётганига қизиқдик.

- Вадим Карленович, аввало, «Нефтчи»да иш бошлаганингиз билан табриклаймиз. Аммо битта савол - кўп бора пойтахтда қолишни исташингизни айтгансиз. Шунга мувофиқ, вилоятлар жамоалари таклифини рад этиб келгансиз. Қизиқ, бу сафар нима ўзгарди?

- Табрик учун раҳмат. Вилоят клубида ишлашга розилик берганимга келсак, пойтахт жамоаларидан таклиф тушишини жуда узоқ кутдим. Бироқ чорловдан дарак бўлмади. Шундай экан, ниҳоят, танлаш вақти келганди.

- Ўзи «Нефтчи»дан қачон таклиф олдингиз ва қарор қабул қилишингиз учун қанча вақт кетди?

- Ҳеч қанча. Таклиф бўлди ва дарҳол қабул қилдим. Нима учун «Нефтчи»ни танладим? Чунки бу клуб менга бегона эмас. Аввал ҳам Фарғонада ишлаганман ва ўша даврдан фақат илиқ хотиралар қолган. Шундай экан, таклифга жавоб беришда сира иккиланмадим. Боз устига, клуб ҳозир оғир аҳволда, шу боис, ёрдамим тегса, фақат хурсанд бўламан.

- Жамоани элитада олиб қолишга кўзингиз етадими?

- Иш бошлаганимга ҳеч қанча бўлгани йўқ. Бирор ваъда беришдан аввал футболчилар билан танишиб, имкониятларни чамалаб кўришим лозим. Албатта, биз курашамиз. Мен учун «Нефтчи»нинг Ўзбекистон кубогида курашни давом эттираётгани ҳам муҳим аҳамият касб этади. Чунки юқори мақсад сари курашиш учун мусобақа бўлиши керак. Олий лигага келсак, қўлимиздан келган барча ишларни амалга оширамиз. Бир вақтлар, 2003 йили «Трактор»ни деярли шунга ўхшаш ҳолатда қабул қилиб олган ва элитада қолиш вазифани уддаландик. Қизиқ томони, ўшанда «Трактор» бошқарувидаги илк ўйиним Самарқанд «Динамо»сига қарши кечган эди. Адашмасам, биз мағлубиятга учраганмиз. Мана энди «Нефтчи»даги илк ўйин ҳам «Динамо»га қарши. Умид қиламанки, бу сафар тарих такрорланмайди ва биз ғалаба қозонамиз.

- «Нефтчи»нинг ҳозирги таркиби сизни қаноатлантирадими? Масалан, «Трактор»да ўзингиз истаган таркиб бор эди.

- Йўқ, «Трактор»да иш бошганимда, таркиб буткул бошқача эди. Сиз назарда тутаётган футболчиларни эса кейинчалик жамлаганман. «Нефтчи» хусусида эса ҳозирдан аниқ гап айтолмайман.

Аввал футболчилар билан танишиб, уларни яқиндан билишим лозим. Жамоани четдан кузатган бошқа, ичида туриб бошқарган бошқа. Умуман, олдимизда қилинадиган ишлар кўп.

- Ҳозир клубдаги энг катта муаммолардан бири - стадионга мухлислар ташрифи кескин тушиб кетгани. Буни бартараф этиш қўлингиздан келармикин?

- Олдимдаги энг асосий вазифалардан бири ҳам шу - мухлисларни стадионга қайтариш. Фарғоналиклар футболга қизиқмай қўйишганига сира ишонмайман, чунки уларни жуда яхши биламан. Шундай экан, мухлислар албатта, стадионга қайтишади, фақат шунга яраша ўйин намойиш этиш лозим.

Йил охирига қадар стадионимиз яна тўлиб-тошишидан умидворман. Менимча, клубдаги ўзгаришлар уларни қизиқтириб қўйган ва кейинги ўйинларимизга кўпроқ мухлис тушса керак. Бирламчи вазифамиз - сифатли ўйин воситасида шу инсонларни стадионда олиб қолиш. «Нефтчи»га мухлислар билан тўлиб-тошган стадион ярашади. Агар шу ишни уддалай олсам, клубда бежиз иш бошламаган ҳисобланаман.

- Ҳар доим ҳужумкор футболни қўллаб келгансиз. «Нефтчи»да ҳам шу фалсафага содиқ қоласизми ёки...?

- Ўйин услуби ҳар доим футболчилар имконияти билан чамбарчас боғлиқ. Албатта, ўз фалсафамни янги жамоамга ҳам сингдиришга уриниб кўраман, аммо баъзи жиҳатлар барибир, мослашишни талаб қилиши мумкин. Саволингизга тўлиқ жавоб бериш учун эса футболчилар билан яқиндан танишиб, озгина ишлаб кўришим лозим.

Бироқ ҳар қандай ҳолатда ҳам, «Нефтчи» эртами-кеч, албатта, ҳужумкор футбол намойиш этиши лозим. Мен ишлаган барча жамоаларда шундай бўлган - «Трактор», «НБУ-Осиё», «Локомотив» ва Ўзбекистон термасида айнан шундай услубни жорий этганман. Демак, «Нефтчи»да ҳам шундай бўлишига умид қиламан. Зеро, мухлис стадионга келиши учун шунга муносиб ўйин намойиш этиш керак.

НУРУЛЛОҲ суҳбатлашди