«Челси»дек йирик жамоани бошқариш учун Роман Абрамович кўмакчига эҳтиёж сезади. «Кўклар»нинг директорлар кенгаши йирик, аммо клуб раҳбарининг ҳамюрти Марина Грановскаянинг функционерлар орасида тутган ўрни катта. Ушбу хоним ҳақида кўп маълумот йўқ - 42 ёшда, МГУ (Москва давлат университети)ни тамомлаган, шунингдек, Канада фуқаролигига эга, қарийб йигирма йилдан буён Абрамовичнинг ёнида ишламоқда (ҳамкорлик олигархнинг нефть бизнеси билан шуғулланаётган паллада бошланган). Грановская омма олдида кўриниш беришдан тийилади: ҳеч қандай интервью йўқ, ижтимоий тармоқлардан йироқда. Аммо сир эмаски, клубда муҳим ишлар, аниқроғи, музокаралар ўтказиш унинг зиммасига юклатилган. Грановская - нафақат Абрамовичнинг ўнг қўли, балки унинг овози ва қулоғи ҳамдир. Мисол учун, бу аёл 2013 йили «Челси» раҳбари ва Жозе Моуриньо ўртасидаги алоқани тиклаб, португалиялик мутахассисни «Стэмфорд Бридж»га таклиф қилганди. Ушбу маълумотларни сиз билан баҳам кўраётганимиз бежиз эмас, зеро «СЭ» миллионлар ўйинига ўзгача жозиба бағишлаётган аёллар ҳақида мақола тайёрлаган. Қуйида улар билан яқиндан танишишингиз мумкин.
Нелли ВЬЕННО (Чемпионлар Лигасидаги биринчи аёл ҳакам)
Балки франциялик рефери ишлаган ўйиннинг нуфузи у қадар юқори бўлмагандир, аммо мазкур ҳолат Вьеннонинг ютуғига шубҳа туғдирмайди: Нелли 1999 йилнинг 3 ноябрида «Мельде» ва «Реал» ўртасидаги баҳсда қўлида байроқ тутганча майдон четида ҳаракат қилиб, «офсайд»ларни қайд этган. Бундан ташқари, Вьенно 2000 йиллар ўртасида 2006 йилги жаҳон чемпионатида ишлайдиган ҳакамларнинг кенгайтирилган рўйхатидан ўрин олганди. Лекин фитнес-тестдан ўтолмай, Германияга бориш имкониятини бой берган. Ҳозир у 55 ёшда, ҳакамликдан кетган, Франция шимолидаги осуда шаҳарчадаги хонадоннинг уй бекаси ҳисобланади
Бибиана ШТАЙНХАУС (бош ҳакам)
Вьенно рефери ёрдамчиси сифатида якуний қарор чиқариш ҳуқуқидан маҳрум эди. Штайнхаус эса иккинчи бундеслигада ҳамон бош ҳакам бўлиб ишлаяпти. Олий даврага эса қўйишмаяпти, ваҳоланки, у захира ҳаками сифатида элита ўйинларида фаолият юритишга улгурган. Қизиғи, Бибиана отасининг изидан бориб, ушбу касбни танлаган. Боз устига, Штайнхаус майдон ташқарисидаги ҳаёт тарзини Қуйи Саксония полицияси бошлиғи лавозимида давом эттирмоқда.
Лаура БАРИАТТИ («Сучитепекез» клуби физиотерапевти)
Гватемаланинг бу клуби 2017 йилнинг бошида янги физиотерапевт ёлламаганида жаҳон оммасига танилмасмиди?! Венесуэлалик Лаура Бариатти - футболда ўзига яраша тажриба орттирган мутахассис: «Сучитепекез»га қадар ўз юртида «Метрополитанос» ва «Петар» жамоаларида ишлаган. Гватемалаликлар Бариаттини ўз сафларига қўшиб олишгач, клуб иштирокидаги ҳар бир тадбирда гавжумлик кузатилмоқда: ишқибозлар жозибали Лаурани кўриш учун ҳаттоки, «Сучитепекез»нинг ёпиқ тарздаги машғулотларига ҳам ташриф буюришмоқда.
Мона НЕММЕР («Ливерпуль» диетологи)
«Қизиллар» ҳозирги ҳолатда «Бавария» футболчисини ўз сафларига қўшишда қийинчиликка дуч келишлари аниқ, аммо Мюнхен жамоаси диетологини олиб келишни уддалашди. Ўтган йилнинг ёзида Юрген Клоппнинг талаби билан доимо кулиб юрувчи Мона Неммер «Энфилд»да иш бошлаб, дарҳол футболчиларга янги рацион тайёрлади. «Ҳар ким майдонда кучини турлича сарфлайди, - дейди Неммер. - Масалан, дарвозабонлар ярим ҳимоячилардан фарқли равишда кам югуришади. Шунингдек, ўйинчилар миллатини ҳам инобатга олиш даркор - хусусан, бразилияликлар нонушта пайти инглизлар истеъмол қиладиган таомни ейишга ўрганишмаган. Бундан ташқари, рацион тана тузилишига ҳам боғлиқ бўлади». Неммернинг ўз ишига сидқидил ёндашишини кўрган Клопп унга «ўйинчилар онаси» деб ном қўйган. Албатта, бу борада «Ливерпуль» устози ҳақ.
Рэйчел АНДЕРСОН (ФИФАдаги дастлабки аёл-агент)
1993 йили «Вест Хэм» ҳимоячиси Жулиан Дикс ўша пайтда йирик саналган сумма - 3 миллион фунт эвазига «Ливерпул»га ўтганди. Бир қарашда бу факт оддий туюлади, аммо Дикснинг агенти аёл киши экани инобатга олинса... Рэйчел Андерсоннинг фаолияти муваффақиятли кечди, аммо бошқалар каби бошланишида қийинчиликка дуч келди. Мисол учун, 1997 йили футбол ассоциацияси мукофотларини топшириш маросимида унинг қатнашишига йўл қўйишмади, мазкур қарор жинси тўғри келмаслиги билан изоҳланган. Табиийки, ақлли аёл бундай ҳолатда ўзини йўқотиб қўймади, Буюк Британиянинг ўша пайтдаги бош вазири Тони Блэрнинг қўллаб-қувватлаши натижасида футбол ассоциациясини судга берди. Бу ишда ютиб чиққач, агент Андерсон яна олға интилиб, мавсумнинг энг яхши ўйинчиси нафақат эркаклар, балки аёллар ўртасида ҳам танланишини жорий этишга эришди.
Хизер РЭББЕТ (Англия футбол ассоциацияси директорлар кенгаши аъзоси)
Миссис Рэббетс бундай юксак мақомга қисқа муддатда эришди. Фаолиятини Лондондаги муниципалитетларнинг бирида бошлаган хоним 2006 йили ишида кескин бурилиш ясаб, «Миллуолл» клуби ижрочи директорига айланди. Спорт соҳаси ёқиб қолди, чоғи, бирин-кетин сезиларли муваффақиятга эриша бошлади: 2010 йили «Миллуолл» учинчи лигадан иккинчисига кўтарилди, директриса эса футбол ассоциациясида иш бошлади. Англия футболи бош органида Рэббетснинг тутган ўрни беқиёс: тенг ҳуқуқлилик учун курашади, телевидениеда кўриниш беради, хайрия тадбирларида қатнашади.
Корин ДЬЯКР («Клермон» бош мураббийи)
Франциянинг иккинчи дивизионида иштирок этувчи клуб президенти Клод Мишининг аёлларга бўлган ҳурмати шу қадар баландки, бунинг натижасида қўл остидаги жамоа бош мураббийлигига икки марта нозик жинс вакилаларини тайинлаган. Бу клубда эркаклар тўп суришини унутмаслик лозим. 2014 йили футболчиларни португалиялик Элена Кошта шуғуллантирган, аммо кучли босимга дош беролмагани боис, бир ойдан сўнг истеъфога чиққанди. Иккинчи уриниш нисбатан омадли чиқди: Кошта кетиши ҳамоно, бош мураббийликка франциялик Корин Дьякр тайинланди ва у ҳозиргача «Клермон» ўйинчиларига устозлик қилмоқда. Асосийси, бу хоним ўз ишини ажойиб тарзда уддаламоқда: ўтмишда терма жамоа футболчиси сифатида шуҳрат қозонган мутахассис қўл остидаги клубни Лига 2 турнир жадвали ўрталарида олиб юрибди. Ўз навбатида, «Клермон»нинг ўтган мавсум элитага чиқишга яқин келганини қўшимча қилиш даркор.
Эва КАРНЕЙРО («Челси»нинг собиқ шифокори)
Карнейро - жаҳон футболидаги энг машҳур аёл, десак муболаға бўлмас. Айниқса, 2015 йилнинг ёзида, Жозе Моуриньо у ва бутун тиббий ходимларни «ўйинни ҳис қилмаслик»да айблагач, Эва кўпчиликка танилиб қолди. «Суонси»га қарши кечган баҳс якунида испаниялик шифокорнинг Азарга ёрдам бериш мақсадида майдонга тушгани жамоа бош мураббийига ёқмади. Кейинчалик Карнейро «Челси»даги ишидан айрилди ва ҳаммаси шундан сўнг бошланди - «кўклар» 2015|2016 йиллар мавсумини муваффақиятсиз ўтказишди, Рождество байрамигача Моуриньо ҳам истеъфога чиқди. Ҳаттоки, аксарият мухлислар лондонликларни таъқиб этган омадсизликни айнан соҳибжамол тиббиёт ходимининг кетиши билан изоҳлашди.
Каррен БРЭЙДИ («Вест Хэм» вице-президенти)
Англияда Баронесса Брэйдини «футболнинг биринчи рақамли хоними» деб ҳисоблашади. Бунга етарлича асос бор: 1993 йили «Бирмингем» менежерлигига тайинланган бу аёл икки йил ўтиб, футболчи Пол Пескисолидога турмушга чиқди. 2010 йилда эса «Вест Хэм» вице-президенти лавозимига тайинланди. Авваллари Брэйди ҳисоб-китоб ишларига масъул эди. Аммо у нафақат дебет ва кредит масалаларини ҳал этар, балки клубнинг молиявий барқарорлигини таъминлашга уринарди. Масалан, «Бирмингем» баронесса ишлаган кезлари ўз харажатларини ўзи қоплайдиган бўлди ва клубнинг премьер-лигани тарк этиши борасида хавотирга ўрин қолмади. Ҳозирда эса жаҳон футболининг энг обрўли хонимларидан бири «Вест Хэм»нинг асосий музокара ўтказувчи вакиласига айланди. Хусусан, унинг юксак салоҳияти эвазига «болғалар» Олимпия стадионида тўп суриш ҳуқуқини қўлга киритишди. «Вест Хэм» яқинда якунига етган мавсумни айнан шу аренада ўтказди.
А.АҲМЕДОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20