Миллий чемпионатлар тугади, евротурнирлар ҳам финишга етди. Айни пайт бутун жаҳонда миллий жамоалар иштирокида ЖЧ-2018 саралаш ўйинлари давом эттирилмоқда. Аммо терма жамоалар футболи ҳам эрта-индин таътилга чиқади. Фақат 8та юрт вакиллари учун мавсум яна бироз чўзилади. Тушунгандирсиз, гап шу ҳафта охирида Россияда бошланадиган навбатдаги Конфедерациялар кубоги иштирокчилари хусусида бормоқда. Демак, қуйида ЖЧ-2018 олдидан ўзига хос «машқ» вазифасини бажариб берувчи турнир тарихига боғлиқ маълумотлар билан танишиб чиқамиз.

ТУРНИР ТАРИХИ

Конфедерациялар кубоги (инглизча талқини - FIFA Confederations Cup) — ФИФА томонидан навбатдаги жаҳон чемпионатига мезбонлик қилувчи мамлакат ҳудудида терма жамоалар иштирокида ташкиллаштириладиган турнир. Мундиал стартига 1 йил вақт қолганида ўтказиладиган мусобақада 6та қитъа|ҳудуд - Европа, Жанубий Америка, Шимолий ва Марказий Америка, Африка, Осиё ҳамда Океанияда тегишлича УЕФА, КОНМЕБОЛ, КОНКАКАФ, АФК, ОФК ва ОкФК томонидан ўтказиладиган чемпионатлар ғолиблари иштирок этади. Шунингдек, жаҳоннинг амалдаги чемпиони ва бўлажак ЖЧга мезбонлик қилувчи мамлакат жамоаси ҳам иштирокчилар қаторига қўшилади. Агарда жаҳон чемпиони қитъа биринчилигида ҳам ғолиб чиққан бўлса, унда турнирга ўша ҳудуд чемпионати финалчиси таклиф этилади. Конфедерациялар кубоги «Қирол Фаҳд кубоги»дан келиб чиққан. Ўша мусобақа 1992 ва 1995 йилларда Саудия Арабистонида худди шу тизимда йўлга қў-йилганди. 1997 йилга келиб, ФИФА илк расмий турнирни ташкил этди. Бошида Конфедерациялар кубоги ҳар 2 йилда бир марта ўтказилган. 2005 йилдан эътиборан эса, икки турнир ўртасидаги муддат худди ЖЧники сингари 4 йилга узайтирилди.

2003 йилги мусобақада катта фожиа кузатилган. Яъни камерунлик Марк-Вивьен Фоэ Колумбия термасига қарши кечган ярим финал ўйини пайти юрак хуружи сабаб, оламдан кўз юмганди. Умуман олганда, Конфедерациялар кубоги тарихида 5та жамоа ғолиблик нашидасини сурган - Аргентина, Дания («Қирол Фаҳд кубоги» даврида), Бразилия, Мексика ва Франция термалари. Амалдаги чемпион - Бразилия термаси бу сафар мусобақада иштирок этмайди.

«Қирол Фаҳд кубоги»/Конфедерациялар кубогининг барча асосий ўйинлари

Турнир медаллари тақсимоти

Айтганча...

Европа футбол клублари ассоциацияси (ЕСА) 2016 йили ФИФА билан Клублар ўртасидаги жаҳон чемпионати форматини ўзгартириш масаласида музокаралар жараёнини бошлади. ФИФА президенти Жанни Инфантино қўллаб-қувватлаётган ғояга кўра, клублар мунлиали иштирокчилари сони 6тадан 16та ёки 24тага оширилиши мумкин. Шундай тақдирда, турнир ҳар 2 йилда бир марта - ёзда ташкиллаштирилади. Хуллас, ҳозирги музокаралар натижа берса, Конфедерациялар кубоги-2017 тарихдаги охиргиси бўлиб қолади.

Индивидуал совринлар

Мусобақа якунида 3 нафар энг яхши футболчига «Олтин тўп», «Кумуш тўп» ва «Бронза тўпи» совринлари топширилади. Шахсий мукофот эгалари рўйхатига назар солсак, бразилияликлар анча кўп. Хусусан, аввалги 7та турнирнинг 5тасида «Олтин тўп» айнан тўп афсунгарлари юрти вакилларига насиб этган.

Шунингдек, бош тўпурарга «Олтин бутса» топширилади. Агар бир неча футболчи тенг миқдорда гол урса, ғолиб қўшимча натижа - ассистентликка қараб аниқланади. Айтиш жоиз, «Олтин бутса» масаласида ҳам бразилияликларга тенг келадигани йўқ. Улар бу совринни 4 марта бегона қилишмаган.  Турнир тарихидаги умумий тўпурарлар рейтингига келсак, уни Мексика термаси учун 9та гол урган Куаутемок Бланко бошқариб турибди. Машҳур Роналдиньо ҳисобида ҳам айнан 9та гол бор, аммо у шундан 2тасини пенальти орқали урган. 1-2. Куаутемок Бланко (Мексика) - 9та; 1-2. Ронал-диньо (Бразилия) - 9та (2та -пен.); 3. Фернандо Торрес (Испания) - 8та; 4-5. Адриано (Бразилия) - 7та; 4-5. Ромарио (Бразилия) - 7та (1та - пен.); 6-7. Давид Вилья (Испания) - 6та; 6-7. Марзуқ ал Отайбий (С.Арабистони) - 6та. Эътиборлиси, Конфедерациялар кубогида жами 11 нафар футболчи «хет-трик» қайд этган. Фернандо Торрес (Испания) эса турнирда 2 марта «хет-рик»|«покер»га эришган футболчидир. У 2009 ва 2013 йилги мусобақада ўзини кўрсатган. Шунингдек,  Абель Эрнандес (Уругвай) ҳам битта ўйин давомида 4та гол уришни эплаган.

2007 йилдан эътиборан  «Олтин қўл-қоп» соврини ҳам топширилмоқда. Бу мукофот ҳозирча океан орти вакилларидан ортгани йўқ. Яъни охирги 3та турнирда Мексика, АҚШ ва Бразилия терма жамоалари вакиллари энг яхши дарвозабон сифатида эътироф этилдилар.

«Ҳалол ўйин учун» яъни «Фэйр-плей» соврини эса ҳозирга қадар 6та жамоа мулкига айланган. Диққатга сазовор томони, японлар бу совринни 2 марта қўлга киритишган, боз устига, кетма-кет равишда.

А.ИСРОИЛХОНОВ тайёрлади