Виталий  Капустянский - «Пахтакор» ташкил этилган йиллар жамоа сафида ўйнаганлар орасида бугун Тошкентда кексалик гаштини сураётган 4 нафар собиқ футболчидан бири. Ундан ташқари, Владимир Трошин, Искандар Фозилов  ва Манноп Ёқубов ҳам пойтахтимизда истиқомат қилмоқдалар. Виталий футболга 50-йиллар бошида Тошкентдаги «Пишевик» стадионида қадам қўйган. Кейинчалик  Геннадий Красницкий, Владимир Тожиров, Мақсуд Шарипов, Риваль Зокиров каби футболчилар қатори «Пахтакор» таркибида жой олди. У балоғат ёшига етгач, ҳарбий хизматни армия клублари сафида ўтади. Фаолиятини «Чирчиқ»да якунлагач ҳам, футбол билан хайрлашмади. Махсус ҳакамлик курсларида таҳсил олиб, малакали реферилардан бирига айланди. Капустянский хусусан, Ўзбекистон чемпионати, собиқ иттифоқ биринчилиги иккинчи ва биринчи лигаларида ишлади. 1970 йилга келиб, Республика тоифасидаги ҳакам мақомини олди. Виталий Капустянский ўзбек футболининг буюк намояндалари хотирасига бағишланган кўплаб турнирлар ташкилотчисидир. Айнан унинг ташаббуси билан ҳомийлар ёрдамида машҳур футболчиларимиз шарафига ёдгорликлар ўрнатилганини алоҳида айтиш ўринли. Яқинда футбол фахрийси ҳаётида унутилмас воқеа рўй берди: унинг қаламига мансуб ««Мне есть что вспомнить...» номли китоб нашрдан чиқди. Муаллиф унда ўз ҳаётидаги муҳим воқелар, фаолияти, дўстлари, ҳамкасбларида ҳақида ҳикоя қилган. Ўз ўрнида, Виталийни туғилган куни билан чин юракдан табриклаймиз ва унга мустаҳкам соғлик-саломатлик, узоқ умр тилаймиз.

Владимир Сафаров