Кримец яна «жойи»га қайтди. Хитой супер-лигаси 16-тури ортда қолди. «Пекин Гуоан» жамоаси чемпионат пеш­қадами бўлиб турган «Гуанжоу Эвергранд»ни қабул қилиб, 2:0 ҳисобида ғалаба қозонди. Афсуски, аввалги турда ниҳоят, майдонга тушган Егор Кримец бу сафар пойтахтликлар таркибидан яна четда қолди. Ҳа, терма жамоамиз асосий ҳимоячиларидан бирининг жорий мавсум «Пекин»нинг бор-йўғи 2та ўйинида қатнашгани ачинарли ҳолат. «Эвергранд»нинг мағлубиятидан сўнг «Шанхай СИПГ» ниҳоят, турнир жадвали карвонбошига айланиши мумкин эди. Бироқ Одил Аҳмедов жамоадошлари сафарда Анзур Исмоиловнинг клуби - «Чанчун Ятаи»дан 3 очко тортиб олиш уддасидан чиқишмади. Ҳар икки вакилимиз тўлиқ 90 дақиқа давомида ҳаракатланган ўйин «Чанчун»нинг 4:2 ҳисобидаги ғалабаси билан якунланди. Ушбу натижадан сўнг жамоа 10-ўринга кўтарилди, «Шанхай СИПГ» эса 2-поғонада қолди.

«Ивата» 7-ўринга чиқди. «Жубило Ивата» Япония чемпионати 18-турида «Кофу»ни 1:0 ҳисобида енгди. Ҳамюртимиз Фозил Мусаев доимгидек, жамоанинг асосий таркибида майдонга тушиб, тўлиқ вақт ўйнаш асносида ғалабага муносиб ҳисса қўшди. Умуман олганда, Фозилнинг жорий чемпионатдаги статистикаси чакки эмас - 16та ўйин, 2та гол. Алоҳида айтиш керак, «Ивата» охирги ғалаба ҳисобига очколари сонини 31тага етказиб, 7-ўринга кўтарилди.

Денисов шу ой сафга қайтади. Москванинг «Локомотив» клуби ва Ўзбекистон терма жамоаси ҳимоячиси Виталий Денисов июль ойи давомида сафга қайтади. Бу ҳақда москваликлар бош мураббийи Юрий Сёмин хабар берди: «Ведран Чорлуканинг октябрда сафга қайтишидан умид қилмоқдамиз. Виталий Денисов эса июль ойидаёқ тикланиб, машғулотларга киришиши лозим».

Иккиси ҳам курашдан чиқди. «Ордабаси» ЕЛ биринчи саралаш раундидаёқ курашдан четга чиқди. Қозоғистонликлар жавоб баҳсида ҳам Александр Гейнрихсиз ўйнаб, «Широки Бриег» (Босния) дарвозасига йўл топа олишмади - 0:0. Натижада илк учрашувни 2:0 ҳисобида ўз фойдасига ҳал қилган «Широки» кейинги раундга чиқди. Ҳусниддин Ғофуровнинг янги клуби - «Младость Лучани» ҳам кейинги раундга ўтолмади. Биринчи учрашувда «Интер» (Озарбай­жон)дан 3та жавобсиз гол қабул қилишган сербияликлар меҳмондаги жавоб баҳсида ҳам ютқазишди - 0:2. Ҳамюртимиз бу сафар ҳам майдонга тушмади.

Қозоғистонда нима гап? «Атирау» мамлакат супер-лигаси 19-турида «Тараз»ни қабул қилиб, 1:3 ҳисобида ютқазди. Жамоа сафидаги легионеримиз Шавкат Саломов мазкур учрашувни бошланғич таркибда бошлаб, 68-дақиқада захирага чиқди. Александр Гейнрих эса «Ордабаси»нинг «Шахтёр» билан ўйини (1:0)да иштирок этмади.