Мадриднинг “Реал” клуби ҳужумчиси Альваро Мората футболчилик фаолиятини Лондоннинг “Челси” клубида давом эттиради.

“Челси” раҳбарияти “Реал” вакиллари билан Мората трансфери борасида бир тўхтамга келишди. Бу ҳақида “қироллик” клуби расмий саҳифасида хабар берди.

Альваро Мората тиббий кўрикдан ўтгандан сўнг янги жамоаси балан расман шартнома имзолайди. 24 ёшли футболчи бугун, 20 июль куни “Реал” клубидаги жамоадошлари ва мураббийлари билан маюс ҳолда хайрлашди ҳамда жамоанинг АҚШдаги йиғинини тарк этди.

Аввалги хабарларга кўра, испаниялик футболчи 80 млн евро эвазига “Челси”га ўтиши хабар қилинганди. Воқеалар ривожи шу ҳолда давом этадиган бўлса, Мората футбол тарихидаги энг қиммат испаниялик футболчига айланади.

Мората янги жамоаси билан беш йиллик шартнома имзолайди ва йилига 9 миллион фунт маош олади.

Маълумот учун, Мората ортда қолган мавсум “Реал” таркибида 15 та гол ва 4 голга ассистентлик ишларини амалга оширганди. “Челси” ҳужумчини сотиб олиш учун кечган курашда “Манчестер Юнайтед”, “Милан” ва “Арсенал”ни ютиб чиқди.