Конфедерациялар кубоги ярим финалидан ўрин олган Португалия - Чили ўйини асосий вақти ва қўшимча бўлимларида ғолиб аниқланмагач, Клаудио Браво катта саҳнага бош қаҳрамон сифатида чиқди. Яъни якунланган мавсум «Манчестер Сити»да ишончни унча оқлолмаган кипер пенальтилар сериясида ҳам Европа чемпионларининг гол уришларига йўл қўймади. Аммо у пенальтилар сериясида ўз дарвозасини дахлсиз сақлаган биринчи голкипер эмас. Демак, Чили термаси вакилига тасанно айтиш баробарида йирик турнирларда у каби жасорат кўрсатган дарвозабонларни эсга оламиз.

Дино ЗОФФ («Ювентус»)

Турнир: Европа Чемпионлар кубоги-1977|1978 (чорак финал)

Ўйин: «Ювентус» — «Аякс» - 1:1 (пенальтилар серияси - 3:0)

Биринчидан, «Амстердам-Арена»да ўтказилган ўйинда жамоалар вакиллари 86-дақиқадан кейингина гол уришади. Иккинчидан, Марко Тарделли голига Тшеу Ла Линь финал ҳуштаги янграши арафасида жавоб беради. Бироқ «Аякс» қутқарувчиси якунда қаҳрамондан антиқаҳрамонга айланади - у пенальтилар сериясида омадсизликка йўлиқади. Умуман олганда, итальян футболи афсонаси Дино Зофф «лотерея тортиш» маҳали шу қадар важоҳат уйғотадики, голландлар 3та уринишда ҳам унинг дарвозасини ишғол этолмайдилар. Тўғри, буюк кипернинг бу жасорати якуний ғалабага уланмаганди. Яъни туринликлар ярим финалда «Брюгге»га бас келолмай, ҳал қилувчи баҳсдан четда қолишади.

Хельмут ДУКАДАМ («Стяуа»)

Турнир: Европа Чемпионлар кубоги-1985|1986 (финал)

Ўйин: «Стяуа» — «Барселона» - 0:0 (пенальтилар серияси - 2:0)

Руминия футболи тарихидаги энг асосий зафарлардан бири замирида Хельмут Дукадамнинг хизматлари катта. Чунончи, «Стяуа» дарвозабони Европа даражасидаги биринчи рақамли клуб турнири финалигача ҳам беҳисоб қаҳрамонликлар кўрсатган эди. Ҳал қилувчи ўйиннинг ўзида эса «Барселона» вакилларининг лоақал битта гол уришларига йўл қўймайди, ҳаттоки, пенальтилар сериясида ҳам. Ваҳоланки, каталонияликлар Хельмут дарвозаси томон «нуқта»дан 4 марта зарба йўллашганди. Эътиборлиси, «Барса» кипери - Уррути ҳам 2та пенальтини бартараф этганди, аммо Дукадам жасорати ўлароқ, «шалпангқулоқ» кубок тарихда биринчи ва охирги марта Руминия жамоасига насиб қилганди.

Хуан ЭНАО («Онсе Кальдас»)

Турнир: Либертадорес кубоги-2004 (финал)

Ўйин: «Онсе Кальдас» — «Бока Хуниорс» — 1:1 (пенальтилар серияси - 2:0)

Жанубий Америка футболидаги бош турнир тарихидаги энг драматик финаллардан бири. Аргентинанинг «Бока Хуниорс» ва Колумбиянинг «Онсе Кальдас» клублари ўртасидаги ҳар икки финал учрашуви 1:1 ҳисобида тугагач, «асаблар синови» бошланади. Аслида жавоб учрашувининг бошидаёқ ҳужумчи Жон Виафара «Онсе»ни ҳисобда олдинга олиб чиқади, бироқ танаффусдан кейин Николас Бурдиссо мувозанатни тиклайди. Хуллас, олдинда мухлисларни энг қизиқарли томоша кутиб турганди. «Кальдас» дарвозабони - Хуан Энао серия давомида «Бока» футболчилари йўллаган 2та зарбани ажойиб реакция билан «йўқ»қа чиқарган бўлса, аргентиналикларнинг яна 2та уринишларидан сўнг тўп дарвоза устуни ёнидан ўтиб кетади. Шу тариқа камтарин «Онсе Кальдас» ўз тарихида илк марта Либертадорес кубоги соҳибига айланади.

Александр ШОВКОВСКИЙ (Украина)

Турнир: жаҳон чемпионати-2006 (нимчорак финал)

Ўйин: Швейцария - Украина - 0:0 (пенальтилар серияси - 0:3)

Украина футболининг энг ёрқин саҳифаларидан бири 2006 йил ёзида Германиядаги мундиалда битилди. Хусусан, Александр Шовковский  жаҳон чемпионатлари тарихида пенальтилар сериясида бирорта гол қўйиб юбормаган кипер сифатида тарихдан жой олди. Муҳими, у ақл бовар қилмас ҳаракатлари билан ўз жамоасини чорак финалга бошлади. Ваҳоланки, ўша серияда Андрей Шевченко гол уриш уддасидан чиқолмаганди. Шовковский эса бунга жавобан Швейцария термаси вакиллари йўллаган 2та зарба йўлини тўсди (яна бири хато чиққан). Ўшанда у европалик ўнлаб скаутлар оромини ўғирлаган бўлса, ажабмас.

Эдвин ван дер САР

(«Манчестер Юнайтед»)

Турнир: Англия суперкубоги-2007

Ўйин: «Челси» — «Манчестер Юнайтед» - 1:1 (пенальтилар серияси - 0:3)

Ўзи ван дер Сар пенальти бўйича энг зўр мутахассислардан бири саналарди. Ўша қаҳрамонлигига келсак, эндигина янгиланган «Уэмбли» трибуналари узун қўлли голланднинг «Челси» вакиллари томонидан берилган 3та зарбани қандай «тўсгани»га гувоҳ бўлганди. Яъни Писарро, Лэмпард ва Райт-Филлипс навбати билан унинг олдида ожиз қолишганди. Фердинанд, Кэррик ва Руни эса аксинча, 11 метрли нуқтадан хотиржам зарба йўллаб, кубок «МЮ» мулкига айланишига ҳисса қўшишган. Айтганча, ван дер Сар ўша мавсум охирида Москвада кечган ЧЛ финалида ҳам пенальтини бартараф этади. У бу сафар бечора Анельканинг гол уришига йўл қўймайди.

Киран КЕЛЛИ («Слайго Роверс»)

Турнир: Ирландия кубоги-2010 (финал)

Ўйин: «Слайго Роверс» — «Шемрок Роверс» - 0:0 (пенальтилар серияси - 2:0)

Чинакам «қароқчилар дербиси» - ақлга сиғмас телбалик ва шиддат. Қисқаси, «Слайго Роверс» Ирландия биллур соврини учун курашда савия бобида ўзидан анча устун саналган «Шемрок Роверс»га жиддий қаршилик кўрсатади. Дейлик, «Слайго» кипери  Киран Келли нафақат 120 дақиқа давомида, балки пенальтилар сериясида ҳам ўз дарвозасидан тўп олиб чиқмайди. Энг диққатга сазовор томони, у рақибнинг 11 метрли нуқтадан йўллаган 4та зарбаси йўлига ҳам ғов бўлганди.

Хусто ВИЛЬЯР (Парагвай)

Турнир: Америка кубоги-2011 (чорак финал)

Ўйин: Бразилия — Парагвай - 0:0 (пенальтилар серияси - 0:2)

Моҳиятан олганда, ўйиндан кейинги пенальтилар сериясида катта жасорат кўрсатиш Жанубий америкалик голкиперларга хос иш. Мисол учун, парагвайлик Хусто Вильяр бразилияликларга қарши кечган ўша учрашувнинг қўшимча бўлимларида мўъжиза мисоли «сейв»лар кўрсатиб, жамоаларни «асаблар ўйини»га таклиф этади ва бу бежиз эмас экан. Ҳар ҳолда, серияда асаби жуда мустаҳкамлигини намойиш қилган кипер Тьяго Сильва зарбасидан сўнг тўпни қайтаради. Элано, Андре Сантос ва Фреднинг «нуқта»дан зарба беришда адашишганида ҳам Вильярнинг таъсири бор эди, албатта. Эътиборлиси, парагвайликлар ярим финалда Венесуэла термасини ҳам енгишади - яна пенальтилар серияси орқали.

Клаудио БРАВО (Чили)

Турнир: Конфедерациялар кубоги-2018 (ярим финал)

Ўйин: Португалия - Чили - 0:0 (пенальтилар серияси - 0:3)

Эҳтимол, ўша оқшом Криштиану Роналду ҳам Браво олдида ожиз қоларми-ди? Бироқ португаллар етакчисига навбат етиб келмади. Чунончи, Браво бирин-кетин Рикардо Куарежма, Жоао Моутиньо ва Нанининг йўллаган зарбаларини ажойиб тарзда бартараф қилганча Роналдуга «иш» қолдирмади.

Ўткир УМАРОВ тайёрлади