Янги Абрамович пайдо бўлдими?

«Милан» клубининг янги хўжайини Йонгхонг Ли россиялик олигарх Роман Абрамович кўрсаткичини янгилади. Эслатиб ўтамиз, Абрамович «Челси»даги дастлабки мавсумида трансферлар учун 167,5 млн. евро сарфлаганди. Хитой инвестори эса ҳозирнинг ўзидаёқ 209,5 млн. евро харажат қилди, деб хабар бермоқда Marca.

Аввалроқ «Милан» Леонардо Бонуччи, Антонио Доннарумма, Андреа Конти, Фабио Борини, Матео Мусаккио, Рикардо Родригес, Ҳоқон Чалҳанўғли, Андре Силва, Франк Кессие ва Лукас Билья билан шартнома имзолаганди. Бундан ташқари, яна икки нафар юлдузни харид қилиш учун 120-130 млн. евро сарфламоқчи экани ҳақида хабарлар чиқди.

Маълумот учун, Йонгхонг Ли 1969 йил сентябрда туғилган. 2003 йилда молиявий пирамида ташкил қилганлиги учун ҳуқуқни муҳофаза қилувчи органлар эътиборига тушган. Ўшанда акаси мамлакатдан чиқиб кетгани сабабли унга нисбатан жиддий айблов қўйилмаганди. 2017 йил 13 апрелда «Милан»ни харид қилди ва эртасигаёқ клубнинг янги хўжайини сифатида таништирилди.

Роман Абрамович ва хитойликларни боғловчи яна бир маълумот: «Челси» хўжайини клуб акцияларининг бир қисмини Хитойнинг HNA Group компаниясига сотишни мўлжалламоқда. The Sun хабарига кўра, клуб раҳбари Брюс Бак хитойликлар билан музокара ўтказиб, акцияларнинг 20 фоизини 240 млн. фунтга сотиш ҳақида келишиб олган. Абрамович бу пулларни «Стэмфорд Бриж» стадионини таъмирлаш учун сарфламоқчи. Эслатиб ўтамиз, Абрамович «Челси» клубини 2003 йилда 140 млн. фунтга тадбиркор Кен Бейтсдан сотиб олган эди.

«Саутгемптон» хитойликларга ўтдими?

Англия премьер-лигаси раҳбарияти «Саутгемптон»ни сотиб олмоқчи бўлаётган Хитойнинг Lander Sports Development компаниясига бошқа даъво қилмайди. Ушбу муассаса бир йилдан буён «Саутгемптон» эгаси Катарина Либхерр билан музокара олиб боради ва ниҳоят, АПЛдан бунинг учун рухсат олди. 2010 йилдан бери клуб хўжайини саналиб келинаётган Катарина Либхерр ўзига тегишли футбол жамоасини 215 млн. еврога сотиши мумкин. Аммо АПЛнинг рухсати «Саутгемптон»нинг сотилишини кафолатламайди. Lander клубнинг 100 фоиз акциясини бирданига харид қилмоқчи, Либхерр эса «авлиёлар» бошқарувини хитойликларнинг катта сармоя киритиш ваъдалари ёлғон эмаслигига тўла ишонч ҳосил қилганидан сўнггина топширмоқчи.

 «Рединг» Хитой инвесторларига сотилса, АПЛга қўйилмаслиги мумкин

Англия чемпионшипи вакили «Рединг» клуби хитойликларга сотилди. Инглиз матбуотида айтилишича, премьер-лигага йўл олиш «Рединг»га деярли 200 млн. фунт даромад келтиради. Ака-сингил Дай Йонг ва Дай Сю Ли жамоани харид қилиш учун олиб борилган музокарани муваффақиятли якунлашди. Англия футбол лигаси ҳам клубни Чин ўлкаси вакиллари қўлига ўтишига эътироз билдирмади. Натижада «Рединг» Англиянинг хитойликлар томонидан сотиб олинган чемпионшипдаги 4-клубига айланди. Аввалроқ «Вест Бромвич» (премьер-лига), «Астон Вилла», «Бирмингем» ва «Вулверхэмптон» клублари Хитой фуқаролари қўлига ўтганди.

Энди «ҳужум» «Бетис»га

Хитой тадбиркорлари «Бетис» клубини харид қилишни режалаштиришмоқда. Canal Sur Radio хабарига кўра, Чин юрти вакиллари «Бетис» акциялари учун 160 млн. евро таклиф қилишмоқда. Яқинда клуб раҳбари Анхел Харо ҳам Хитойга ташриф буюриб, бу борада музокара ўтказганди. Аммо клубнинг собиқ раҳбари Мануэль Руис де Лопера ўзига тегишли бўлган 30 фоиз акцияни сотишни истамаяпти ва хитойликларнинг таклифини рад қилмоқда.

ФИРДАВС тайёрлади