Шу йилнинг 20-30 июль кунлари Вьетнамнинг Хошимин шаҳрида футзал клублари ўртасидаги Осиё чемпионати бўлиб ўтади. Мазкур мусобақада Ўзбекистон кубоги ва чемпионатида ғолиб чиққан «Олмалиқ» ҳам иштирок этади. Таркибида термамизнинг 10га яқин аъзосини жамлаган бу жамоа бугун юртимизда, сўзсиз, энг кучлиси. Хитой чемпионатида тўп сураётган Дилшод Раҳматовни ўз сафига қўшиб олган олмалиқликларнинг Осиё чемпионатида ҳам жиддий мақсадларни кўзлашаётгани кундек равшан. Тошкент мезбонлигида ўтган қитъа биринчилигида ёрқин ўйин кўрсатиб, эътиборга тушган футзалчини «Олмалиқ» билан Вьетнам сафарига йўл олишидан олдин суҳбатга чорладик.

-       Дилшод, сиз футзалимиздаги камсонли легионерлардан бирисиз. Хитой клубига ўтишингиз қандай кечди?

-       Юртимизда ўтган Осиё чемпионатидан сўнг Хитойнинг «Дальян Пуван Анбо» клуби вакиллари қизиқарли таклиф билан чиқишди ва мен бажонидил рози бўлдим. 2016 йил Ўзбекистон чемпионати тугагач, кейинги мавсумни Чин юртида ўтказиб, мамлакат чемпионлигини нишонладим.

-       Хитойда бугун футболга миллионлаб пуллар сарфланмоқда, эътибор кучайган. Футзалда-чи?

-       Чин юртида футбол жадаллик билан ривожланиб бормоқда ва бу жараённи футзалда ҳам кўришимиз мумкин. Чемпионатдаги барча жамоалар ўз таркибига бразилиялик, япониялик, эронлик легионерларни жалб қилишган. Ўзбекистондан эса уч кишимиз: Шуҳрат Тожибоев, Тўйчибой Бердиев ва мен.

-       Дунёнинг турли нуқталаридаги футболчи ва футзалчиларни Хитойга боришга нима ундамоқда?

-       Албатта, молиявий манфаат. Хитойда бразилиялик легионерлар билан кўп суҳбатлашдим. Айтишларича, уларнинг юртида футзалчиларга катта маблағ тўлашмас экан. Европада тўп суриш учун эса даража шунга яраша ўта юқори бўлиши керак. Шундай экан, Хитой чемпионати - ҳар томонлама фойдали таклиф.

-       «Дальян Пуван Анбо» билан шартномангиз қанча муддатга тузилган?

-       Дастлаб бир йиллик битим имзоладик. Юқорида айтганимдек, бу мавсум чемпионликни нишонладик. Раҳбариятга ўйинларим маъқул бўлгач, муддатни яна бир йилга узайтирдик. 2018 йил ёзида футзал клублари ўртасидаги Осиё чемпионатида иштирок этамиз. Барчаси кутганимдек кечса, яна бир неча мавсум Хитой чемпионатида ўйнамоқчиман.

-       Маош катта бўлгач, легионерларга қўйиладиган талаблар ҳам шунга яраша бўлса керак? Хитой ва Ўзбекистон чемпионатларининг фарқи нимада?

-       Хорижда италиялик мураббий қўл остида ўйнадим. Унинг услуби европача, яъни биз ўрганган Хосе Мария Мендез услубига яқин. Испаниялик мутахассисдан жуда кўп нарса ўргандик, футзалчи сифатида шаклланишимда унинг хизматлари катта. Фурсатдан фойдаланиб, Мендезга алоҳида раҳмат айтаман. Хитойда унинг тавсиялари жуда асқотди, чунки у ерда ҳар бир ўйинчининг ҳаракатларини махсус гуруҳ вакиллари таҳлил қилиб, бош мураббийга маълумот етказиб туришади. Майдонда аниқ рақамларга таяниб кўрсатмалар берилади. Сиз ютуқ ва камчиликларингизни аниқ билиб, шу асосда ишлайсиз!

-       «Дальян Пуван Анбо» билан 2018 йилга қадар шартномангиз бўлсада, бугун «Олмалиқ» сафидасиз...

-       Давралар оралиғидаги танаффусда жамоа раҳбариятига «Олмалиқ» билан клублар ўртасидаги Осиё чемпионатида иштирок этмоқчи эканлигимни маълум қилгандим, эътироз билдиришмади. Шу тариқа, икки ой ижара асосида «Олмалиқ» сафида тўп сурадиган бўлдим.

-       Клублар ўртасидаги қитъа биринчилиги - 10 кун давом этадиган йирик мусобақа. Мукаммал жисмоний тайёргарликсиз керакли натижага эришиб бўлмайди. «Олмалиқ»да эса бир неча ойдан буён расмий ўйин амалиёти йўқ. Турнирда бу панд бериб қўймасмикан?

-       Мазкур жиҳат бўйича мураббийлар иш олиб боришмоқда. Ҳар куни икки маҳалдан машғулотлар ўтказяпмиз. Шунингдек, бир нечта назорат учрашувлари ҳам ташкиллаштирилди. Ўйлашимча, бу ҳолат бизга муаммо туғдирмайди.

-       Гуруҳ босқичида «Олмалиқ»қа Таиланднинг «Чонбури Блювейв» ва Ливаннинг «Банк оф Байрут» жамоалари рақиблик қилишади. Имкониятларни қандай баҳолайсиз?

-       «Чонбури»да Таиланд, «Банк оф Байрут»да Ливан терма жамоасининг бир қатор футзалчилари тўп суришади. Улар билан жуда кўп бор майдонда тўқнаш келганмиз, қандай кучга эга эканлигидан хабардормиз. Бир нечта ўйинларининг видеоёзувини ҳам кўриб чиқдик. Етакчиларининг дриблингига таянадиган «Банк оф Байрут»ни жамоавий ўйин эвазига мағлубиятга учратишимиз мумкин. Хосе Мария Мендез ҳозир Таиландда фаолият олиб бормоқда. Эшитишимча, «Чонбури»нинг тайёргарлик жараёнида испаниялик мутахассис маслаҳатларидан фойдаланишаётган экан. Демак, «Чонбури»га қарши томошабоп баҳс кечиши турган гап.

-       Рақиблар сафида бир қатор легионер футзалчилар бор. Юқори мақсадни кўзлаган жамоаларда бу табиий ҳолат. «Олмалиқ»да эса биргина сиз «легионер»!

-       Бизнинг йигитлар ҳар қандай легионерларга рақобат қила олишади. Юқорида айтганимдек, Хитой чемпионатидаги 10та клубда ҳам бразилиялик футзалчилар тўп суришади. Холис айтаман, ўзбек йигитлари иқтидор борасида улардан қолишмайди. Буни Вьетнамда бўлиб ўтадиган мусобақада ҳам исботлаб, мухлисларни хурсанд қилмоқчимиз.

Зуҳриддин БЕК суҳбатлашди