Нигериялик Жей-Жей Окоча Африканинг турли даврлардаги энг иқтидорли футболчиларидан биридир. У мамлакат терма жамоасининг олтин даврида ўзини кўрсата олган.

Унинг жамоаси 1996 йили Атланта Олимпиадасида олтин медалларни қўлга киритган. Шунингдек, 1994-2002 йилларда бўлиб ўтган учта жаҳон чемпионатида иштирок этган. 23 октябрь куни Лондонда ФИФАнинг тақдирлаш маросими бўлиб ўтади.

Окоча ушбу ташкилот расмий сайтига берган интервьюсида бу борадаги африкалик футболчиларнинг имконияти ҳақида гапириб ўтди.

- Сиз техник футболчилардан бири бўлгансиз. Ташқаридан футбол ўйнаб роҳатланаётганингиз кўриниб турарди. Шу жиҳатлар кучли ўйинчига айланиш учун етарлими?

- Энг яхшилардан бири бўлиш учун кўпроғи керак. Ўзингизни янги даражага олиб чиқиш учун тинимсиз меҳнат қилиб, бор эътиборингизни футболга қаратишингиз лозим. Агар иқтидорингиз бўлса, рақобатдан асло чўчимаслик керак.

- Бугунги кунда сизга ўхшаш футболчи борми?

- Ўйин услуби ўхшаб кетадиганлардан бири Неймардир. У худди мен каби роҳатланиш учун футбол ўйнайди, касбини яхши кўради. Бу билан ўзи учун ёки мухлисларни шунчаки хурсанд қилиш учун тўп суради, демоқчи эмасман. Албатта, Неймар жамоавий ўйинчи. Яъни ўз иқтидорини жамоа манфаати учун намо­йиш қилади.

- Сизнингча, у Криштиану Роналду ва Лионель Мессига ўринбосар бўла оладими?

- Ҳа. Менимча, бунинг уддасидан чиқади. Месси ва Роналду жаҳон футболида ўн йилдан буён етакчилик қилишмоқда. Эндиликда улар ўринларини кимгадир бўшатишлари керак. Ўйлайманки, бу мақом Неймарга насиб этади.

- Роналду ва Месси охирги ўн йилликда муваффақият қозониб келишмоқда. Уларнинг қай бирини устун қўясиз?

- Бу борада дипломат бўлишим керак. Португалиялик дўстларим кўплигига қарамай, Мессини устунроқ қўяман. Унинг туғма иқтидори бор. Роналду фантастик футболчи, мен кўрган ўйинчилар орасида энг кучлиларидан биридир. Лекин Лео барибир устунроқ.

- Сизнингча, африкалик футболчи ФИФАнинг йил ўйинчиси мукофоти даъвогарлари орасида кучли учликка кира оладими?

- Ҳозир бу ишни эплай оладиган бирор-бир футболчини алоҳида кўрсатиш қийин. Африкаликлар халқаро аренада ҳали етакчи ўйинчилар билан рақобатлашиш даражасига чиқмадилар.

ЖАЪФАРАЛИ тайёрлади