Ўз вақтида «Бунёдкор», «Навбаҳор» ва «Шўртан» клубларида тўп суриб, «қалдирғочлар» таркибида Ўзбекистон чемпионлигига эришишдан ташқари, тўпурарлар баҳсида ғолиб чиққан Олександр Пишур Sports.uz сайтига берган интервьюсида Ғузордан кетиш сабаблари ва «Бунёдкор»даги фаолияти ҳақида гапириб ўтди.

- Саша, нима учун «Шўртан»дан кетишга қарор қилдингиз?

- Атрофдагилар ва ўзимнинг асабимни бузмаслик учун.

- Бош мураббий Александр Волков кетганидан сўнг машғулотларда қандай янгиликлар кузатилди?

- Кўп нарса ўзгарди. Мураббийлар Волковнинг конспектларини олиб, машғулотлар учун шу етарли, деб ўйлашди. Лекин айнан нима қилиш кераклигини ҳеч ким тушунтириб беролмади.

- Александр Волков билан бирга ишлаш жараёнида қандай таассуротлар олдингиз?

- Фақат ижобий. У талабчан мураббий, футболни тушунади, шогирдидан керакли пайтда унумли фойдаланишни билади.

- Олдинги мураббийлар штаби ишлаганида «Шўртан» Ўзбекистон чемпионатида қандай ўринларга даъвогарлик қилган бўларди?

- Агар Александр Геннадьевичнинг ишига ҳеч ким аралашмаганида, молиявий ҳолат стабил бўлганида, ғузорликлар кучли олтиликка даъвогарлик қилишлари мумкин эди.

Унинг машғулотлари мавсум давомида натижаларни яхшилаб боришга қаратилганди. Волковнинг ўз системаси бор, Европанинг етакчи мутахассислари методикаси бўйича иш олиб боради. Менимча, у Ўзбекистоннинг энг кучли мураббийларидан бири. Бундай кадрларни қўлдан чиқармаслик лозим.

- Ўзбекистон чемпионатида бир неча мавсумни ўтказиб, турнирда ўсиш бўлганини сездингизми?

- Албатта. Бу шундоқ кўриниб турибди. Кучли тўртликка киришга ҳаракат қиладиган жамоалар сони ошди. Айни пайт «Қўқон-1912», «Олмалиқ» ва «Бухоро» каби клублар юқори олтиликдан жой эгаллашган.

Айтайлик, «Шўртан»нинг иккинчи ўриндаги жамоа билан очколари фарқи 12тани ташкил қиляпти, холос. Кураш анча қизғин кечяпти. Бугунги кунда ўйинлар натижасини олдиндан тахмин қилиш қийин.

Барча ўз вазифасини бажаришга интилмоқда. Лекин чемпионат етакчиларига қарши курашиш учун малакали мураббий ва футболчилардан ташқари, жиддий молиявий сармоялар керак.

Шунингдек, болалар футболига ҳам эътиборни ошириш лозим. Аксарият футболи ривожланган мамлакатларда болалар ва ўсмирлар футболини ривожлантириш асосий вазифа қилиб белгиланган. Бунинг самарасини «Аякс», «Барселона», «Реал» ва «Бавария» каби клублар мисолида кўришимиз мумкин.

- Сўнгги йилларда Марказий Осиё, жумладан, Ўзбекистон чемпионатига келаётган легионерлар сони ошмоқда. Сизнингча, хорижликлар лиганинг ўсишига ёрдам беришадими?

- Менимча, бундай ташриф нафақат чемпионатнинг ўсиши, балки турнирнинг томошабоп бўлишига ҳам таъсир ўтказади. Ҳар бир легионер ўз мактабидан ниманидир олиб киради. Ўзбекистон клубларида хорижликларнинг кўпайиши фақат фойда келтиради, деб ўйлайман.

- Ўзбекистон чемпионатида ўйнаётган футболчилардан қай бирини алоҳида ажратиб кўрсатган бўлардингиз?

- Юртингизда иқтидорли футболчилар кўп.

- Жисмоний ҳолатингизни ушлаб турибсизми?

- Албатта. Профессионал даражада ҳали ўйнаш ниятим бор.

- Қаерда машқ қиляпсиз?

- Уйда, Черниговда. «Десна» бош мураббийи Александр Рябоконядан жамоа билан машқ қилиб туришни сўрагандим, розилик берди.

- Бўш вақтингизда нималар билан машғулсиз?

- Олдинлари асосан сафарларда бўлардим. Айни пайт рафиқам Виктория ҳам мамнун. Уй ишларида унга ёрдам беряпман, фарзандлар тарбияси билан шуғулланяпман. Оилам катта, ҳаммага тенг вақт ажратяпман. Уларга етишмаганимни ҳис қиляпман. Айниқса, ўғлим Саша ва қизим Настяга. Тўнғичим Алина эса ўзини-ўзи эплайдиган бўлиб қолган.

- Сир эмаски, «Бунёдкор»даги фаолиятингиз муваффақиятли кечган. Айтайлик, Миржалол Қосимов жамоа-га таклиф қилса қайтармидингиз?

- Катта иштиёқ билан қайтаман. «Бунёдкор» билан кўплаб совринларни қўлга киритдик. Жамоа ва мураббийлар штаби туфайли чемпионат тўпурари бўлдим.

Осиё Чемпионлар Лигасида ҳам ёмон қатнашмадик, гуруҳимизда ғолиб чиқдик. Бир сўз билан айтганда, Тошкентда фаолиятимнинг гуллаган даврини ўтказдим. Бундай мураббийлар билан ишлаш футболчи учун фойдали. Қосимов ва Волков қўл остида ҳар томонлама ўсишингиз табиий.

- Ўзбек жамоаларидаги энг муҳим голингиз қайси?

- Ҳар бири ўзига хос аҳамият касб этади. Чемпионат, кубок ва ОЧЛда тўп киритганман. Аммо мен учун энг муҳими - 2013 йили кубок финалида урган голим. Ўшанда рақиб дарвозасини 85-дақиқада ишғол қилганман ва у «Бунёдкор»га ғалаба келтирган. Натижада биз бош соврин эгасига айланганмиз.

- Нима учун ўшанда жамоадан кетишга қарор қилгансиз?

- Лушаннинг услубини тушунмаганман. Унинг даврида асосий таркибга кирмай қолганман. Айрим ўйинлардан кейин рақиб жамоалар мураббийлари «Саша, хайрият, бугун сен ўйнамадинг», дейишган.