Кеча, хабар бериб ўтганимиздек, бугун, 27 август куни боксчи Флойд Мэйвезер ҳамда UFC аралаш қоидалар жанги етакчиси Конор Макгрегор тўқнашуви бундан бир неча дақиқа олдин якунига етди.

Профессионал боксда 49 та жанг ўтказиб, уларнинг барчасида зафар қучган, 26 бор рақибларини нокаутга учратган Флойд Мэйвезер, ўзининг 50-жангида ҳам муваффақият қозонди. UFC орқали боксга кириб келган, профессионал рингда ўзининг илк жангини ўтказган Конор Макгрегор Мэйвезерга қарши 10 раунд чидаб берди.

Дастлаб Макгрегор жангни анча фаол бошлаганди, стартнинг илк 4 раундида ҳатто Мэйвезердан устунроқдек кўринди. Бироқ Конор кучни тежаш борасида барибир Мэйвезерчалик бўла олмади.

10-раундда кетма-кет зарбалар қабул қилиб олган Макгрегорнинг ҳолати жанг реферисини қаноатлантирмади ва мана шу раундда Мэйвезернинг техник нокаут орқали ғалаба қозонилгани эълон қилинди ва шу тариқа, Флойд Мэйвезер ўзининг 50-жангида 50-ғалабасини нишонлаб, бошқа рингга қайтмасликка ваъда берди.

Маълумот ўрнида, Конор Макгрегор жангдаги иштироки учун 30 миллион доллар ишлади. Флойд Мэйвезернинг гонорар пуллари эса 100 миллион долларни ташкил қилади.

Чипталар, трансляциялар ва ғалабаси учун бериладиган суммалар гонорар пуллари ҳисобидан ташқарида бўлиб, улар учун яна қўшимча мукофот пуллари тўланади.