«Аргентина таркиб жиҳатидан дунёнинг энг кучли термаларидан бири, лекин ўйин бобида жуда бўш» - «Альбиселесте»ни хуш кўрмайдиган, ҳатто Мессининг маҳорати ҳам жамоага ёрдам беролмайди, деган ақида тарафдорларининг фикрлари бу. Хўш, аслида ҳам шундайми?
Россияда Аргентинадан қандай кароматлар кутиш мумкин? Агар у мундиал йўлланмасини қўлга кирита олса, албатта?!
Жамоанинг ЖЧ-2018 саралашидаги нурсиз ўйинлари ва Колумбия терма жамоасининг собиқ ҳужумчиси Фаустино Аспирилья ўз интервьюсида Месси жамоадошларини уқувсиз эшаклар галасига қиёслагани мавзунинг нақадар жиддий ва долзарб эканига туртки бўлмоқда. Эҳтимол, Россияда ўтадиган мундиал Мессидек ўта ноёб иқтидор соҳиби жаҳон чемпионига айланиши учун сўнгги имкондир? Леонинг буюк афсоналар сафига кўтарилишига ана шу юксак унвоннинг йўқлиги халал беряпти.
Боз устига, аргентиналик тўпурарнинг муносиб рақобатчиси - Роналду ҳам қачондир жаҳон тожини қўлга киритишига ишониш қийин. Таажжубки, кўпчилик мухлис ва мутахассислар фикрича, Аргентина рисоладагидек таркибга эга, омадсизликнинг асосий сабабчиси эса... Месси экан. Биз бу фикрга қўшилмаймиз. Аргентина ЖЧ-2018да ҳеч нарсага эришолмайди, унга на Месси ва на Сампаоли ёрдам бера олади.
Чунки таркиб жуда заиф, мотивация ва руҳият борасида муаммолар талайгина. Уларни бартараф этишга эса вақт жуда оз қолди. Боиси, гап терма жамоа ҳақида кетмоқда - клублардаги каби савияли ўйинчиларни харид қилиш имкнияти йўқ, футболчилар 3-4 ойда бир марта тўпланишади, бир ёки икки учрашувда майдонга тушадилару, ўз клубларига ғойиб бўлишади. Энди кўпчилик наздида кучли деб баҳоланаётган Аргентина терма жамоаси таркибини позициялар бўйича бошқа терма жамоаларга таққослаб кўрайлик.
Дарвозабонлар
Сўнгги чизиқ бобида Аргентина ўзини хотиржам ҳис этиши мумкин. Кутилмаган жароҳатлар юз бермаса, албатта. Ҳозирги пайт «Реал Сосьедад»да ижарада юрган «Ман Сити» посбони Херонимо Рульи, Мексиканинг «Тигрес» клуби дарвозасини қўриқлаётган Науэль Гузман исталган пайт Серхио Ромеро ўрнини тўлдира олади. Асосий посбон эса «МЮ»да «кубоклар мутахассиси» сифатида танилган ва доимий амалиётдан четда бўлсада, спорт формаси талаб даражасида.
Энди етакчи терма жамоалар таркибига қарайлик. Маълум бўлишича улардаги дарвозабонлар маҳорат бобида Ромеродан кам эмаслар, сон жиҳатидан эса устун.
Аргентина: Ромеро, Рульи, Гузман.
Германия: Нойер, Тер Штеген, Трапп, Лено.
Испания: Де Хеа, Касильяс, Рико, Аррисабалага, Рейна.
Франция: Льорис, Манданда, Арсола, Костиль.
Италия: Буффон, Сиригу, Доннарумма, Маркетти, Скуффет.
Бразилия: Алисон, Эдерсон, Вевертон, Диего Алвес.
Кўриб турганингиздек, аргентиналикларда дарвозабонлар сони озроқ. Бу эса танлаш имкониятининг озлиги ва дарвозабонлар ўртасидаги рақобатнинг кучсизлигидан далолат. Хуллас, бу позиция бўйича Аргентина устунлик қилолмайди.
Ҳимоячилар
Қани айтинг-чи, қайси топ-клубда ҳимоя қўрғони вазифасини адо этаётган аргентиналик ўйинчи бор? Отамендидан бошқа ҳеч ким! Маркос Рохо ва Хавьер Маскерано клубдаги мавқеларини бой бериб улгуришди, қандайдир мўъжиза уларни бошланғич таркибга қайтариши мумкин.
Аргентина: Маскерано, Отаменди, Меркадо, Фасио, Пинола, Пареха, Куэста, Ронкалья, Фунес Мори.
Бразилия: Тиаго Силва, Маркиньос, Филипе Луис, Марсело, Миранда, Дани Алвеш, Кайо.
Германия: Боатенг, Хуммельс, Киммих, Хектор, Мустафи, Хёведес, Рюдигер, Та, Гинтер, Зюле.
Испания: Рамос, Пике, Альба, Карвахаль, Аспиликуэта, Начо, Монреаль, Бартра, Бельерин, Хуанфран.
Италия: Бонуччи, Кьеллини, Барцальи, Де Шильо, Дармиан, Огбонна, Конти, Астори.
Франция: Умтити, Варин, Косьельни, Кимпембе, Курзава, Сидибе, Динь, Мангала.
Тан олайлик, бошқа жамолардаги ҳимоячилар аргентиналиклардан маҳоратлироқ.
Ярим ҳимоячилар
Сампаолининг фикрича, Маркос Акунья ва Гвидо Писарро каби «буюклар» шундай оғир паллада жамоага ёрдалашишлари керак. Очиғи, бу қарор таажжубдан бошқасига ярамайди. Мантиқан олганда, ҳужумкорлик аргентиналикларга хос фазилатдек. Ярим ҳимоя ҳамда ҳужум чизиқлари яшиндек тезкор бўлиши керак. Бироқ амалда ўртамиёна гулхан ҳарорати ундан юқорироқ.
Аргентина: Ди Мария, Фернандес, Гайтан, Пасторе, Банега, Билья, Краневиттер, Ламела, Паредес, Акунья, Писарро.
Бразилия: Каземиро, Фабиньо, Коутиньо, Виллиан, Фернандиньо, Паулиньо, Ренато Аугусто, Габриэл, Лукас Лима, Лукас Моура.
Германия: Кроос, Озил, Хедира, Дракслер, Жан, Гюндоган, Демирбай, Руди, Горецка, Штиндель.
Испания: Иньеста, Давид Силва, Коке, Бускетс, Фабрегас, Алькантара, Сориано, Сан Хосе, Сауль.
Италия: Верратти, Де Росси, Мотта, Жаккерини, Флоренци, Кандрева, Пароло, Стураро, Бернандески
Франция: Матюиди, Канте, Погба, Лемар, Толиссо, Рабьо, Пайе, Кабай, Коман, Сиссоко, Шнейдерлин.
Кўриб турганингиздек, бу позицияда ҳам Аргентина устун эмас. Италия ҳам бу борада мақтана олмайди. Жамоавий ўйин ва тактика жиҳатидан Аргентинадан кучлироқ, шу сабабли савия ҳам анча юқори.
Ҳужумчилар
Пауло Дибала - Аргентинанинг асосий умиди. Шу билан бирга жамоанинг улкан омадсизлиги. Бир қарашда ҳужум чизиғи «альбиселесте»нинг асосий устунлигидек туюлади. Бироқ бу масалага қайси томондан ёндашишга боғлиқ.
Аргентина: Месси, Агуэро, Игуаин, Дибала, Икарди, Корреа.
Бразилия: Неймар, Жезус, Фирмино, Халк, Жонас.
Германия: Гомес, Вернер, Мюллер, Шюррле, Гётце, Вагнер, Сане, Беллараби.
Испания: Иско, Диего Коста, Мората, Асенсио, Давид Вилья, Адурис, Педро, Васкес, Деулофеу, Аспас, Алькасер.
Италия: Белотти, Инсинье, Пелле, Заза, Иммобиле, Эдер, Сансоне.
Франция: Гризманн, Мбаппе, Жиру, Ляказетт, Фақир, Мартиаль, Жиньяке, Дембеле.
Дарҳақиқат, номлар бўйича Аргентина жуда қудратли кўринади. Асосий муаммо шундаки, ҳал қилувчи баҳсларда Агуэро ва Игуаин ўта суст ҳаракатланишди: яратилган вазиятлардан унумли фойдалана олишмади, жамоадошларини қўллаб-қувватлашмади. Дибала билан Икарди эса ҳали дебютант мақомидан воз кечишмаган - жуфтлик ҳисобида бирорта ҳам гол йўқ! Айниқса, Дибаланинг «муваффақияти» ҳайратланарди - 7та ўйин, гол йўқ, битта қизил карточка ва атиги биргина самарали узатма. У ҳам Сингапур билан ўртоқлик учрашувида қайд этилган. Бу икки ҳужумчи бир-икки йилдан сўнг суперюлдузга айланишар, лекин ҳозир жамоани ЖЧга олиб чиқишларига ҳам ишониш қийин. Мундиалда муносиб иштирок этишни қўя турайлик. Биринчидан, Аргентинанинг фақат ҳужум чизиғи рисоладагидек. Улар терма жамоада клубларидагидек ишончли тўп сура олишмаяпти. Жамоавий ўйин савияси тушиб кетган, анчадан буён бирорта малакали мураббий топишнинг иложи бўлмаяпти. Сампаолининг муаммога дахли йўқ - бинойидек таркибга эга бўлган Чили термасини икки йил рисоладагидек бошқарди, лекин «Севилья»да ҳеч нарсага эришолмади. Ҳозирда «Челси» мухлислари уни эмас, Антонио Контени афзал кўрганликлари учун мутасаддилардан миннатдор эканликларига шубҳа йўқ.
«Альбиселесте»нинг топ-термалар сирасидан эмаслигига яна бир далил - ўртамиёна савиядаги ўйинчилар миқдори. Таркибда «Севилья»нинг 5, «Зенит»нинг 2 вакили бор, «Реал Сосьедад», «Сельта», «Эвертон», «Рома», «Милан» аъзоларига ҳам жой топилган. Терма жамоанинг етти нафар вакили Жанубий Америка ва Мексика чемпионатларида тўп суришади. Гранд клублар улуши 50 фоиздан кам, уларнинг кўпчилиги захира ўйинчилари.
35га яқин футболчи орасида атиги 6 нафари - Отаменди, Ди Мария, Месси, Агуэро, Игуаин ва Дибала топ-клубларнинг асосий таркибларида. Қизиғи, 6 футболчининг 4 нафари ҳужумчи. Масаланинг энг хавотирли жиҳати шундаки, Аргентина термасининг порлоқ келажагига умид йўқ. Таркиб анча «кексайиб» қолган, айниқса, асосий футболчилар. Ёш иқтидорлардан эса ҳамон дарак йўқ. Саралашга жалб этилган ўйинчиларнинг ўртача ёшлари 28,4га тенг. Ҳимоя чизиғи 33 ёшли Маскерано етакчилигидаги «қариялар»дан иборат.
Келинг, яхшиси ёши 25га етмаган ўйинчиларни санаб чиқа қолайлик: Паредес, Краневиттер, Дибала, Корреа, Икарди. Хуллас, Дибала билан Икардидан ўта қисқа вақт ичида янги Месси даражасига кўтарилиш талаб этилади. Акс ҳолда, Аргентинанинг ҳолига вой. Қизиқ, наҳотки ер юзида 10-15 нафар аргентиналик ноёб иқтидор соҳиблари бўлмаса?
Бор, лекин уларни нима учундир терма жамоага жалб этишмаяпти. Иккинчидан, аргентиналик ёшларнинг аксарияти «Зенит»да тўп суришмоқда. Учинчидан, кўпчилиги ҳужумчи амплуасида.
Термадан таклиф олмасликларининг асосий сабаларидан бири ҳам шу. Энди ёшларнинг йирик мусобақаларидаги иштирокларига эътибор қаратсак: 20 ёшгача бўлган терма жамоа ЖЧда гуруҳдан чиқолмади, 3та ўйинда 3 очко жамғаришди. U-17нинг натижаси янада аянчлироқ - очко умуман йўқ, турнинг энг «қолоқ» жамоаси «унвон»ига сазовор бўлди.
Ҳатто Гондурас ва Сурия терма жамоалари ҳам муваффақиятлироқ иштирок этишди. Дарвоқе, айни шу Гондурас термаси Олимпиада ўйинларида Аргентинани гуруҳдан чиқиш имкониятидан маҳрум этганди. Хуллас, Аргентинанинг барча терма жамоалари учун сўнгги халқаро турнирлар шармандали якунланди. Ваҳоланки, жамоа ўз вақтида Месси билан ЖЧда, Ди Мария билан эса Олимпиадада шоҳсупага кўтарилганди.
Шу тариқа жамоатчиликда «Аргентина кучли таркибга эга» деган ақида юзага келди. Қизиғи, ана шу гап сўнгги пайтда тез-тез такрорланмоқда. Гўё бу билан Аргентинанинг ишлари юришиб кетадигандек. Месси ва унинг жамоадошлари эса яқинда Голландия қайд этган омадсизликни такрорлаш арафаси туришибди.
Ў.УМАРОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20