Ҳа, «Реал» клуби ва Испания терма жамоаси сардори ёруғ дунё билан хайрлашган мухлис хоҳишини бажариб, чиндан ҳам, буюк қалб соҳиби эканлигини исботлади.

Тўнғич фарзанд исми

Серхио Рамос аслида шахсий мухлислари орасида табассум улашганча суратга тушиш ёки уларни дастхат билан сийлашга одатланмаган.

Бироқ Қуддусда олинган битта фото бошқалари олдида алоҳида ажралиб туради. Унда испан футболчисининг Рамос исмли кичик болакайни кўтариб тургани акс эттирилган. Асосийси, бу оддий ўхшашлик эмас.

Кичик Рамос - 14 июль куни Қуддусдаги террорчилик ҳаракати оқибатида шериги билан ҳаётдан кўз юмган исроиллик полициячи Хаил Сатауининг ўғли. Марҳум Хаил «Реал»нинг ашаддий мухлиси эди, айниқса, Мадрид клуби сардорига ўзгача меҳр билан қарарди.

Шунчалик даражадаги ҳаттоки, тўнғич фарзандига айнан унинг исмини берган. Афсуски, ўғли туғилганидан атиги 3 ҳафта ўтиб, Хаил террорчилар томонидан ўлдирилди...

Икки орзу

- Хаилнинг икки орзуси бор эди - «Сантьяго Бернабеу»да севимли жамоаси ўйинини бевосита томоша қилиш ва янги туғилган ўғилчаси билан бирга ўз кумирини кўриш.

Биринчи орзуси май ойида амалга ошди, иккинчисига келсак, афсуски, у энди орамизда йўқ. Фожиа юз бергач, кичик Рамосни Серхио билан учраштириш уддасидан чиқсаккина айрилиқ азобини бироз енгиллатишимиз мумкинлигини тушундик.

Бахтимизга, мақсадга эришдик ва ўйлайманки, бу билан Хаил руҳини шод қилдик, - дейди марҳум полициячининг акаси Хусам.

Хуллас, Сатауилар оиласи Хаилнинг иккинчи орзусини рўёбга чиқариш учун барча имкониятларни ишга солди.

Оила аъзолари хусусан, Исроил спорти олий мутасаддиларидан тортиб, сиёсий раҳбарларгача мурожаат этишди. ЖЧ-2018 саралаши охирги туридан ўрин олган Исроил - Испания ўйини эса бу ҳаракатлар самарасини кўриш учун ягона имконият эди.

Тўғри, Хулен Лопетеги жамоасининг Исроил сафаридан олдин Аликантеда албанларни 3:0 ҳисобида енгиб, саралаш турниридаги вазифани бажариб бўлгани бироз хавотир уйғотганди.

Зеро, бу ҳолатда Серхио Рамос «Реал»нинг навбатдаги ўйинини ўйлаб, Испанияда қолиши ҳеч гап эмасди. Ҳар ҳолда, Қуддусдаги учрашув испанлар учун айтарли ҳеч нарсани англатмасди.

Олижаноблик намунаси

Муҳими, сардор Исроилга борди ва ўйиндан сўнг марҳум мухлиси ҳурмати унинг хонадонига ташриф буюриб, ўз адаши билан танишди. Бу ҳолатни Хусам қуйидагича ҳикоя қилди:

«Очиғи, уни хонадонимиз остонасида кўриб, беихтиёр йиғлаб юбордик. Бу вақтда барча ҳиссиётларимиз ўз-ўзидан юзага қалқиб чиқди. Зеро, Серхиога кўзимиз тушгач, дарҳол укамни ва айнан шу футболчи билан танишишни орзу қилганини эсладик.

Таърифланмас даражадаги таъсирчан учрашув...». Ўз навбатида, футболчи ҳам бундай қабулдан сўнг ўз ҳиссиётларини яшириб туролмади.

Якунда Рамос бир неча соат аввал майдонга кийиб тушган футболкасига дастхат қўйиб, уни кичик адашига совға тариқасида берди.

«Террорчилик ҳужуми қурбонига айланган ўғлим «Реал» ва Серхио Рамосни жонидан ҳам ортиқ кўрарди. Энди биламанки, у танловда адашмаган - Серхионинг олижаноб инсон ва буюк қалб соҳиби эканлигига  амин бўлдим.

Уни ўз уйимизда кўргач, ўғлим шундоқ ёнимизда турганини, учрашувимизга гувоҳ бўлаётганини ҳис қилдим. Муҳими, унинг орзуси амалга ошди», - деди Хаилнинг отаси Афиф Сатауи.

Бу оила масофадан туриб, «Реал»га ва унинг сардорига мухлислик қилишда давом этади - футболчининг буюк қалби ва марҳум Хаил ҳурмати учун, албатта. Кичик Рамос эса бунинг моҳиятини бироз улғайгач билиб олади...

А.АБДУВАЛИХЎЖАЕВ тайёрлади