ЖЧ-2018 йўлланмасидан қуруқ қолганимиз нақадар аламли бўлмасин, битта ҳақиқатга тик боқиш керак: миллий жамоамиз мундиалга тўлиқ тайёр эмасди. Охирги саралаш босқичини олайлик,  футболчиларимиз 10та ўйинда 6тагина гол уришди. Агар эътибор бермаган бўлсангиз, айтиб ўтаман, учинчи раундда қатнашган жамоалардан биргина Таиланд термаси шунчалик оз гол урди, қолганлар рақиблар дарвозасини камида 8 марта ишғол қилишди. Менимча, шунинг ўзи умумий картинага яққол далил. Ҳа, тўғри, барчаси мураббийнинг қарашига боғлиқ. Аммо футболчиларимизнинг қандай яхши имкониятлардан гол ура олишмаганини ўйласак... Яна бир томони, тарихга қарасак, миллий жамоамиз ЖЧ-2018га йўл олганлардан фарқли ўлароқ, Осиё чемпионатида ҳали бирор марта сов-риндорлар қаторига кирган эмас. Демак, аввало, ОКни забт этайлик, кейин мундиал бир гап бўлар. Ҳар ҳолда, ҳозир ўзимизни шундай овутиб туришдан бошқа чорамиз йўқ. Жиддий гапирганда, муносиб мураббий танлаш баробарида футболчиларни тайёрлашга ҳам жиддий эътибор қаратилиши шарт.

Шавкат МИРЗАЕВ, Бухоро шаҳри.