Аввалроқ, хабар берганимиздек кеча 23 октябрь куни Буюк Британия пойтахти Лондонда ҳалқаро футбол ташкилоти (ФИФА) томонидан “The Best FIFA Football Awards 2017” совринини топшириш маросими бўлиб ўтди.

Маросимда йилнинг энг яхши эркак ва аёл футболчилари билан бирга энг моҳир мураббийлар номи эълон қилиб ўтилди. Унга кўра, Криштиану Роналду энг яхши футболчи номига лойиқ кўрилган бўлса, унинг “Реал”даги устози Зинеддин Зидан ФИФА талқинига кўра энг яхши мураббий унвонини қўлга киритди.

Бундан ташқари, “Барселона” аёллар футбол клуби аъзоси Лике Мартенсга энг яхши футболчи соврини топширилди, Голландия аёлар терма жамоаси устози Сарина Вигман мавсумнинг энг яхши мураббийи бўлди.

Маълумки, ФИФА энг яхшиларни танлаб олишда ўз таркибидаги футбол федерацияларнинг терма жамоалари мураббийи ҳамда сардорлари овозидан фойдаланади. Шунингдек, ФИФАга аъзо мамлакатдан бир нафар журналист овоз бериш ҳуқуқига эга бўлади.

Бундан икки ой аввал ўтказилган сўровномада терма жамоанинг собиқ мураббийи Самвел Бабаян, терма жамоа сардори Одил Аҳмедов ва таниқли шарҳловчи Даврон Файзиев иштирок этишган.

Аёллар футболида терма жамоа устози Шерали Бобоқулов ва терма жамоа сардори Маҳлиё Сариқова овоз беришган бўлиб, овоз берганлар орасида Даврон Файзиев ва Самвел Бабаяннинг тахминлари ўзини оқлаган. “UzReport” TV телеканали шарҳловчиси Даврон Файзиев энг яхши футболчи ва мураббийни аниқ топган.

Шу билан баробар Самвел Бабаян ҳам энг яхши бўлган футболчи ва мураббийни тўғри танлай олган. Одил Аҳмедов эса аргентиналик ҳамкасби Лионель Мессини энг яхши футболчи сифатида эътироф этган бўлса, Зинеддин Зиданни энг яхши мураббийлар учлигида биринчи ўринга жойлаган.

Қуйида Ўзбекистон вакилларининг кимларга овоз бергани келтириб ўтилган.

Самвел Бабаян

Энг яхши футболчи: Криштиану Роналду, Лионель Месси, Эден Азар.

Энг яхши мураббий: Зинедин Зидан, Антонио Конте, Массимилиано Аллегри.

Одил Аҳмедов

Энг яхши футболчи: Лионель Месси, Криштиану Роналду, Неймар.

Энг яхши мураббий: Зинедин Зидан, Массимилиано Аллегри, Хосеп Гвардиола.

Даврон Файзиев

Энг яхши футболчи: Криштиану Роналду, Лионель Месси, Жанлуижи Буффон.

Энг яхши мураббий: Зинедин Зидан, Леонардо Жардим, Массимилиано Аллегри.

Аёллар футболи

Шерали Бобоқулов

Энг яхши футболчи: Хардер Пернилле, Женифер Марозсан, Лиеке Мартенс.

Энг яхши мураббий: Сарина Виегман, Нильс Ниельсен, Ральф Келлерманн.

Маҳлиё Сариқова

Энг яхши футболчи: Лике Мертенс, Женнифер Марокан, Вивианн Мидема.

Энг яхши мураббий: Нильс Ниельсен, Сарина Виегман, Ральф Келлерманн.

Даврон Файзиев

Энг яхши футболчи: Лиеке Мартенс, Хардер Пернилле, Женифер Марозсан.

Энг яхши мураббий: Сарина Виегман, Нильс Ниельсен, Жерар Прешьер.

Эслатиб ўтамиз, “The Best FIFA Football Awards 2017” сўровномасида овозлари тўғри келган мутахассис Самвел Бабаян Ўзбекистон терма жамоасини жаҳон чемпионатига олиб чиқиш вазифасини уддалай олмасдан ўз лавозимидан озод этилгани ҳақида хабар бергандик.

Акмалхон Эшонхонов