Самуэль Юмтитини «Барселона»нинг омадли харидларидан бири, дейиш мумкин. Ўтган мавсум аввалида каталонияликлар сафига қўшилган футболчи, айни кунда жамоанинг мухим бўлагидан бирига айланган.

Хабарингиз бор, «Барса» Юмтитини «Лион»дан харид қилган. У айнан шу клуб тарбияланувчиси ҳисобланади. Яқинда ESPORTS нашри Самуэль билан суҳбат уюштирди.

— Сиз Франциянинг энг яхши клубларидан бўлган «Лион» академиясида тахсил олгансиз. Ўша даврларни эслайсизми? Бу сизга «Барселона» ўйинига мослашишингизга ёрдам бердими?

- Ҳа, ёрдам берди. «Лион»да биз ҳозир «Барселона»даги каби ишлардик. Шунчаки ҳаракатлар сал бош-қачароқ. «Лион» техник ва жисмоний машқларга кўп эътибор қаратади. Айнан шу туфайли каталонияликларнинг ўйинларига тез мослашиб кетдим.

Ваҳоланки, «Барса» сафида энг кучли футболчилар жамланган. Умуман олганда, «Лион»да менинг ўсишимга ёрдам берган инсонларни учратганим, бахтимдир.

Бунинг учун улардан миннатдорман. Албатта, чўққини забт этиш осон эмас. Лекин менга жараён ёқади.

— Ҳамма «Барселона»нинг рамзига айланган «рондо» ҳақида гапиради. Айтишларича, тўп майдонда шунчалик тез ҳаракатланар эканки, уни бўйсундириш қийин экан.

- Худди шундай. Аввалига бу машқни бажаришга чўчирдим. Чунки, бу осон эмас. Биринчи кунлари тўпни тез-тез олдириб қўярдим. Энди эса анча мослашиб олганман.

— Вальверде ва Луис Энрике ўртасидаги фарқни сездингизми?

- Барча мураббий ҳар хил. Гап уларнинг ишлаш усуллари ҳақида кетяпти. Янги мураббийимиз анча хотиржам ва футболчилар билан бошқача усулда иш олиб боради. Бизга ҳам у хотиржамликни тақдим этди.

— Ўтган мавсумда «Барса» фақат мамлакат кубогида зафар қучди. Сиз бу ерга совринларни ютиш учун келганмисиз?

- Бу ерга нафақат ўсиш учун, балки жамоага совринларни ютишда ёрдам бергани келганим рост. Мен ғалаба қозонишни ёқтираман ва хоҳлайман. «Барселона» барча мусобақаларда ғолиб чиқиши керак.

— Жорий мавсумда ҳам «Барса» фақат кубок билан кифояланмайдими?

- Қаторасига икки йил Қирол кубогида зафар қучиш биз учун камлик қилади. Бу етарли эмас ва кўпроғига ҳаракат қилишимиз керак. «Барса»га ҳамма совринларни қўлга киритиш учун келганман. Акс ҳолда, ўртамиёна клубда ўйнаган бўлардим.

— Сиз, ғалабани мухлислар билан нишонлайдиган кам сонли футболчилардан бирисиз.

- Мухлислар билан яхши муносабат ўрнатиш керак, деб ҳисоблайман. Бу менга ёқади. Тарихий камбэк ҳисобланган «Барса»-«ПСЖ» учрашувида айнан улар бизни қўллаб туришганди.

— Сиз учун ҳаммаси тез рўй берди: Европа чемпионати финалидаги мағлубият ва «Барселона» билан шартнома...

- Бу қийин йил бўлди ва мен ўзига яраша сабоқ олдим. Инсон нафақат яхши, балки ёмон хотираларни ҳам эсдан чиқармаслиги керак. Аввалига, якуний рўйхатда Вараннинг ўрнини эгалладим. Кейин финалда имкониятни бой бердик...

Орадан ҳеч қанча ўтмай, «Барселона»да пайдо бўлдим. Бу менинг улғайишимга ёрдам берди. Лекин чақирувдан чўчимадим. Гарчи ёш бўлсамда, керакли тажрибам бор эди ва бу қарорга ўзим келганман.

— Маскерано билан муносабатларингиз қандай? Сиз унинг ўрнини эгалладингиз.

- Барча ўйнашни истайди. Лекин жамоа биринчи ўринда туриши керак. Ҳамиша ўз вазифам ҳақида ўйлайман. Бунда майдонда бўлишим ёки захирада ўтиришимнинг аҳамияти йўқ.

Мухими жамоада сизнинг ўрнингизни боса оладиган футболчининг бўлишидир. Барча билан, жумладан, Масче, Пике ва Вермаленлар билан ҳам муносабатим яхши.

— Пике билан ўйнаш қандай? Ўз ўйинингизда нималарнидир ўзгартирдингизми?

- Марказий ҳимоячилар бир-бирларига мослашишлари керак. Ҳар биримизнинг ўзига яраша муҳим жиҳатларимиз бор.

— Кийиниш хонасида ўз фикрингизни билдира олиш даражасида ўзингизга бўлган ишонч ортганми? Ёки бунга ҳали эртами?

- Андрес, Масче, Пике... каби етакчи футболчиларни тинглаб, улардан нималарнидир ўзлаштиришни хуш кўраман. Улар клубни яхши билишгани учун гапиришади. Шунингдек, кўплаб совринларни қўлга киритишган.

— Самуэль Юмтити Каталонияда нима бўлаётганидан хабардорми? Янгиликларни кузатиб борасизми?

- Ҳа, мен шу клубнинг бир бўлагиман. Демак, Каталониянинг ҳам бир бўлагиман.

ЖАЪФАРАЛИ тайёрлади