Россия терма жамоасининг собиқ ярим ҳимоячиси Марат Измайлов «Советский спорт» нашрига интервью берди. 35 ёшли футболчи суҳбат чоғида «Арарат»да ўйнаган даври ва иккинчи дивизиондан олган таассуротлари ҳақида гапириб ўтди.
- «Арарат»дан кетгандан сўнг, кейинги ойларда нима билан машғул бўлдингиз?
- Футболга алоқадор бўлмаган ишлар билан. Агар профессионал шартномага эга бўлсангиз, бошқа ишга вақтингиз бўлмайди. Ҳар холда менда шундай. Бор эътиборимни ишга қаратаман ва берилиб кетаман. Қолганлари эса иккинчи, учинчи ўринларда. Натижада, қолган ишлар йиғилиб қолади. Айни пайтда шу масалаларни ҳал қилиш билан овораман. Эрталабдан кечгача югураман. Ҳеч нимага улгурмаяпман.
- Агентингиз Пауло Барбоза билан алоқалар борми? Фаолиятингизни давом эттиришингиз учун таклифлар-чи?
- Ҳа. Пауло ва футбол дунёсининг бошқа инсонлари билан ҳам алоқаларим бор. Таклифлар етарли. Ҳар доим бўлиб турибди.
- Айтишларича «Арарат»ни жароҳат туфайли тарк этибсиз.
- У ердан жароҳат туфайли кетганим йўқ. Кетишимнинг асл сабабини айтишим ноўрин. Чунки, бу нафақат менга, балки мен ҳурмат қиладиган клуб раҳбарларига ҳам боғлиқ. Биз илиқ хайрлашдик. Бу бизнинг орамизда қолгани маъқул. Фақат шуни айтишим мумкин: бу жамоада ҳеч қандай можаролар бўлмади. Барчасини замонавий одамлардек ҳал қилдик. Бундан хурсандман.
- Демак, кетиш сабабчиси ўзингиз.
- Ҳа.
- Сиз «Арарат»да уч ой ўйнадингиз. Келишув эса бир йилга тузилганди. Шартномани бекор қилиш осон бўлдими?
- Албатта, йўқ. Профессионал футболчи шартномаси якунланмай кетмоқчи бўлса, ҳеч қачон осон бўлмайди. Келишувни бекор қилиш учун маълум вақт кетди. Лекин муҳими, бир-биримизни тушундик.
- Ўн йиллик танаффусдан сўнг сиз яна Москва клубида ўйнадингиз ва уни тарк этдингиз. Ота-онангиз хафа бўлишмадими?
- Ота-оналар ҳамиша фарзандлари учун яхши бўлишини исташади. Бу борада улар менга ишонишади. Тўғри, отам бироз асабийлашди. У киши яна стадионда ўйинимни жонли кўришни бошлагандилар. Ҳозир эса бундай имкониятга эга эмаслар.
- Сиз тўртта ўйин ўтказиб, иккита гол урдингиз. Аммо кам ўйин ўтказдингиз. Бунга жароҳатлар сабабми?
- Жамоага бошқалардан кейинроқ қўшилдим. Мавсум аввалида формамни тиклаб олишимни ва жамоа сафида ўйнашимни айтишди. Бошқа футболчилар йиғинлар чоғида бир-бирларини яхши тушуниб олишганди. Аста секинлик билан ўйин схемасига, жамоага мослашиб кетаётгандим. Бир нечта ўйин ўтказгандан сўнг Белгородда жароҳат олдим. Бир ойча даволандим ва яна жамоа билан машғулотларда қатнаша бошладим. Лекин бахтга қарши ўша пайтга келиб жамоа билан хайрлашишимга тўғри келди.
- «Арарат»ни аввалига Сергей Булатов бошқарди. Августда эса унинг ўрнини Александр Григорян эгаллади. Уларнинг қай бири билан ишлаш осонроқ эди?
- Ҳозиргача мураббийлар билан деярли муаммога дуч келмаганман. Булатов ва Григорян ҳам шулар жумласидандир. Уларнинг ҳар бири билан ишлаш қизиқарли эди.
- Александр Григорян сиз ҳақингизда илиқ фикрлар билдирди. Унинг ўзи қандай мутахассис?
- Олдин уни танимасдим. «Арарат»да танишдик. У билан бирга ишлаб, ажойиб инсон эканлигига гувоҳ бўлдим. Унинг ҳақида фақат илиқ фикрларни билдиришим мумкин.
- Унинг ўйин учун энг кутилмаган кўрсатмаси қандай бўлган?
- Гап мураббийнинг гапиришида эмас, қандай гапиришида. Эхтирос катта аҳамият касб этади. Мисол учун, битта гапни икки киши айтса, икки хил туюлиши мумкин. Бир сўз билан айтганда, Александр Витальевич билан бирга ишлаганимдан мамнунман.
- Нима учун у «Арарат»да икки ярим ой ишлаб, клубни тарк этди?
- Бир нарса дейишим қийин. Чунки, у пайтда жамоада эмасдим.
- Сентябрь аввалида клубда нималар рўй берди? Ҳақиқатдан ҳам, жамоа йўқ бўлиб кетиш арафасида эдими?
- Билишимча, «Арарат»ни ёпиш ҳақида гап-сўз бўлмаган. Аммо шундай вазият юз бердики, қисқа вақт орасида ҳамма нарса рўй бериши мумкин эди.
- Айнан ўша пайтда кетишга қарор қилдингизми?
- Ўшанда, биринчи бор шу ҳақда ўйладим. Умуман, ҳаммаси ўшандан бошланди.
- Сиз билан тўлиқ ҳисоб-китоб қилишдими?
- Биз тинчгина хайрлашдик. Бир-биримизга ҳеч қандай эътирозимиз йўқ.
- Ўша даврлар учун афсусланмайсизми?
- Бундай тажриба олганимдан хурсандман. Футболни бошқа томондан кўришга муваффақ бўлдим. Иккинчи дивизион премьер-лигадан умуман бошқа дунё экан.
Ж.БОБОХОНОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20