Сербия миллий жамоаси 8 йиллик танаффусдан сўнг жаҳон чемпионати йўлланмасини қўлга киритди. Бироқ узоқ кутилган муваффақият асосчиси - бош мураббий Славолюб Муслин истеъфога чиқарилди.
Табиийки, Сербияда маҳаллий футбол иттифоқининг ушбу кескин қарорини ҳеч ким тушунмаяпти. Championat.cоm сайти айни шу ҳолатга алоҳида эътибор қаратди.
НИМА БЎЛДИ?
Сербларнинг орадан 8 йил ўтиб, яна жаҳон чемпионатига йўл очишганида, миллий жамоа бошқарувини қўлга олган Славолюб Муслин катта роль ўйнагани айни ҳақиқат.
Айнан у еврофутбол юлдузларини ягона мақсад сари бирлаштирди, уларни муайян суръатда ишлашга мажбурлади ва шу аснода жамоа ўйинида ўзига хос балансни таъминлади.
Бунинг самараси тезда кўринди - серблар бутун саралаш раундини бир текисда ўтказишди. Ҳарқалай, биттагина мағлубият қайд этилганию, якунда жамоанинг ўз гуруҳида 1-ўринни эгаллагани кўп нарсадан далолат.
Ҳа, ҳаммаси ажойибдек кўринганди. Зеро, футболчилар олдида нафақат ҳар тўрт йиллик, балки ўз фаолиятларидаги асосий турнирга муносиб шайланиш учун вақт етарли.
Мураббий эса тактик чизмаларини тўлиқ шакллантириш ва тайёргарлик режасини ишлаб чиқиш имкониятига эга эди. Бироқ...
Хуллас, 20 октябрь куни Муслин ва Сербия футбол иттифоқи ўртасидаги шартнома икки томоннинг розилиги билан бекор қилингани ҳақида хабар берилди.
Миллий жамоага вақтинча бош мураббий ҳам тайинланди - Младен Крстаич. Айтиш жоиз, у бунгача Муслин томонидан тузилган мураббийлар штабида ишлаётганди.
НЕГА БУНДАЙ БЎЛДИ?
Четдан қараганда, бу охирги ойларда футбол оламида кузатилган энг мантиқсиз ва ёввойи қарордек кўринади, албатта. Энг қизиғи, Муслин каби федерация вакиллари ҳам келишув нега тўхтатилгани юзасидан оғиз очишмаяпти.
Ҳаттоки, энг майда-чуйда сирларни аниқлаштирувчи серб матбуоти ҳам ҳеч қандай расмий маълумотга эга эмас. Шундай бўлсада, сербларда бу масала бўйича бир неча тахминлари бор.
Ҳар ҳолда, истеъфо ҳақидаги гап-сўзлар қарор эълон қилинишидан бир ҳафтача аввал урчиганди. Айтишларича, мамлакат футбол иттифоқига мураббийнинг ёш иқтидор Сергей Милинкович-Савичдан бош тортгани сира ёқмаган.
Ҳаттоки, раҳбарлар Муслиндан уни таркибга қайтаришни ошкора талаб ҳам қилишган. Лекин истеъфо сабаби бўйича биринчи тахмин бошқа - саралаш босқичида кўрсатилган «хира» ўйин.
Аслида Муслин ўз фаолияти давомида доимо очиқ футболга таяниши билан ном қозонган. Аммо у терма жамоада натижани биринчи ўринга қўйиб, ўз фалсафаларидан бироз чекинди.
Яъни аввало, ўз дарволзаси олдида масъулият билан ишлайдиган бақувват жамоа тузди. Ҳа, серблар квалификация доирасидаги 10та ўйинда 20та гол уришди - бу чакки кўрсаткич эмас. Бироқ федерация бошқача фикрда, шекилли.
Агар ушбу тахмин чиндан ҳам, тўғри бўлса, Сербия термаси бошқаруви четда турганча футболчиларни тинмай олдинга чорлайдиган мутахассисга топширилади.
Аммо бу ҳолатда мухлислар ҳар бир ўйинни аввалгидек таҳликада кузатишади. Чунончи, Сербия термаси олдинлари ҳужумкор ўйнасада, кўпинча рақибларнинг қарши ҳужумини ўтказиб юбориб, аросатда қоларди.
Иккинчи тахминий сабаб эса айнан Сергей Милинкович-Савичга боғлиқ. «Лацио»нинг 22 ёшли ярим ҳимоячиси айни пайт Сербиянинг энг истиқболли футболчиси сифатида тилга олинмоқда.
Бироқ у саралаш давомида бирор ўйинда иштирок этиш тугул, ҳаттоки, йиғинларга ҳам чақирилмади. Сербия ОАВ вакиллари ва мухлислар бундан ҳайрон қолишганида, Муслин қисқа ва лўнда гапириш билан чекланди:
«Мен бош мураббий эканман, Милинкович-Савич терма жамоада ўйнамайди». Мураббий бу гапларига қўшимча тарзда ҳар қандай иқтидорли футболчидан кўра, жамоанинг ички муҳити муҳим эканлигини таъкидлади.
Шу тариқа ҳамма бу қарорни қабул қилди. Ҳар ҳолда, 22 ёшли Сергей «А» сериясининг бош юлдузи эмас. Боз устига, 12та турдаги 2та голи ва 1та самарали узатмаси даҳшатли статистика саналмайди.
Муҳими, Милинкович-Савичсиз Сербия термаси марказий чизиғи ғариблашгани йўқ, олдинда тўп сурувчи Адем Ляич ва Душан Тадич ижросидаги ўзгача ҳаракатлар эса бутун жамоага етиб-ортди.
Шунга қарамай, футбол федерацияси ёш иқтидорнинг четда қолишидан норози, шекилли. Эҳтимолки, айни шу масала Славолюбни истеъфога чиқарилишига сабабдир...
МУСЛИННИНГ ЎЗИ НИМА ДЕДИ?
Айтарли ҳеч нарса: «Ҳа, ҳамкорликни тўхтатдик, чунки федерацияда миллий жамоа Россия мундиалида қандай кўриниш олиши хусусида умумий тасаввур ҳам йўқ.
Фақат айтишим мумкинки, жамоада масъулият билан ишладим ва натижани таъминладим. Менда ўз қарашим ва қоидаларим борки, ҳар қандай ҳолатда улардан воз кечмайман».
МУСЛИН ЎРНИНИ КИМ ЭГАЛЛАЙДИ?
Сербияликлар хорижлик мураббийларга ишонч билдирмоқчи эмаслар. Асосий номзодлар - Драган Стойкович (бунгача Япония ва Хитой чемпионатларида ишлаган, холос) ва Велько Паунович (Сербия ёшлар термаси ва АҚШнинг «Чикаго Файр» клубини шуғуллантирган).
Улар Муслиндан кучлими? Етарли маълумотга эга бўлмаган мухлис ҳам бу саволга жавоб беришда қийналмаса керак. Энг ёмони, энди Сербияда миллий жамоани Россия мундиалида катта омадсизлик кутаётганига ишонувчилар сафи кенгаймоқда.
«Федерациядаги одамлар ҳаётлари давомида футбол ўйнашмаган, бироқ миллий жамоа тарихидаги энг яхши ўйинни йўлга қўйган Радомир Антични бемалол истеъфога чиқараверишди. Энди ўша воқеалар яна такрорланмоқда.
Бир ўйинчининг йўқлиги ҳеч қачон бутун терма жамоага салбий таъсир қилмайди Муслинга жавоб берилгани - жамоани нишонга тўғрилаб қўйишдир.
Эҳтимол, айрим радикал кайфиятдаги фанатлар ҳақдирлар - мамлакатимизда чиндан ҳам, профессионал футболни ёпиб қўйиш керакка ўхшайди...» - Сербиянинг «Спутник» газетаси вазиятга шундай муносабат билдирди.
Ж.БОБОХОНОВ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20