Энди Тошкентнинг «Локомотив» клуби ҳам кетма-кет мамлакат чемпионлигини қўлга киритганлар қаторига қўшилди. Бу билан «темирйўлчилар» мухлисларини муборакбод этамиз.

Ғалабалар қатори содиқ ишқибозлар сафи ҳам кенгайиб боришидан умидвормиз. Ҳар ҳолда, охирги икки мавсумдан буён чемпионатимиз байроқдори бўлиб турган жамоага тўлиб-тошган стадион ярашади.

Бунга қадар фақат «Нефтчи», «Пахтакор» ва «Бунёдкор» шундай натижа қайд эта олишганди. Энди «Локомотив» ҳам уларнинг сафига қўшилди. Ўзбек футболи тарихида чемпионликка эришганидан сўнг йўқлик сари ғарқ бўлган клуб бор - МҲСК. Шунингдек, олий лигада бир мартагина ғолиб чиқиб, кейин ўртамиёналар сафига қўшилган «Навбаҳор»ни ҳам унутмаслик даркор. «Локо»ни ҳозирданоқ табриклаш мумкин, зеро бу жамоалардан фарқли ўлароқ, икки бора чемпионликни қўлга кирита олди. Аммо «темирйўлчилар» бу ишни яна уддалай олишармикан? Қизиқ савол, шундай эмасми? Келинг, унга жавоб қидиришга уриниб кўрамиз.

ЖАВОБ

Бу саволнинг жавобини топиш учун «Локомотив»нинг ғолибликка қандай эришганига эътибор қаратиш лозим.

Жамоа устози Мирко Йеличич ҳам таъкидлаб ўтганидек, «темирйўлчилар» жорий мавсумни барқарор ўтказишди ва чемпионликнинг асосий омили ҳам шунда бўлди.

Тан олиш лозим, «Локомотив»га бу йил қаршилик кўрсата оладиган жамоа кўринмади.

Ўтган йиллар давомида чемпионга кимдир жиддий кураш таклиф этишига кўникиб қолгандик. Масалан, «Бунёдкор» ва «Пахтакор»нинг бир-бири билан мудом рақобатда бўлганини кўп кўрганмиз.

Шунингдек, «Насаф» ҳам чемпионлик учун бўлмаса-да, ҳар ҳолда, совринли ўринларга ҳар доим даъвогарлик қилган. Ўтган йили «Локомотив» илк бора ғолибликни қўлга киритганда ҳам «аждарлар» имкон қадар қаршилик кўрсатишга уриниб кўришганди.

ФАРҚ

Бироқ бу йилги мавсум аввалгиларидан анча фарқ қилди. «Бунёдкор» ва «Пахтакор» биринчи даврани ўртамиёналар қаторида якунлаган бўлсалар, «Насаф»нинг ишлари ҳам у қадар қовушмади.

«Локомотив»га эса аввал «Динамо», кейинчалик эса «Қўқон-1912» ва «Бухоро» рақиб бўлишга уриниб кўришди. Бу номларнинг ўзи ҳам «Локомотив» учун чемпионлик юки у қадар оғир келмаганини кўрсатиб турарди.

Сабаби, ўртамиёна жамоа учун бутун мавсумни бир текис ўтказиш осон эмас. Шу боис ҳам «Локомотив»нинг барчани ортда қолдириши биринчи даврадаёқ аниқ бўлиб улгурганди.

Ҳар ҳолда, 12 очколик фарқ билан олдинга ўтиб кетган жамоани қувиб етиш учун 15та тур ҳам камлик қилиши муқаррар. Боз устига, «темирйўлчилар»ни таъқиб қиладиган клубнинг ўзи йўқ эди.

Мирко Йеличич «Локомотив» чемпионликка эришганидан сўнг фикр билдираркан, муваффақиятнинг асосий омили сифатида барқарор ўйинни кўрсатиб тўғри гапирди. Аммо шу билан бирга, бошқа бир фактни ҳам ёддан чиқариб қўймаслик лозим.

«Локомотив»нинг ғолиблик шоҳсупасига кўтарилишида барқарор ўйиннинг ўрни қанчалик юқори бўлса, асосий рақобатчиларнинг беқарор иштироклари ҳам шунчалик катта аҳамият касб этди.

БЕҚАРОРЛИК

«Пахтакор»нинг ўртамиёналар сафига яқинлашиб қолганига анча бўлди. Жамоа икки йил муқаддам чемпионликка эришгач, кейинчалик ҳатто совриндор ўринларга ҳам даъвогарлик қилолмай қолди.

«Бунёдкор» эса Сергей Лушан бошқаруви остида ўз олдига қандай мақсад қўйганини англолмаётгандек тасаввур уйғотарди. Бир вақтлари «қалдирғочлар» олий лига тугул, ОЧЛда ҳам етакчилар қаторига киришга интилардилар.

Тўғри, бу жамоаларнинг ҳар иккисида раҳбарият ўзгаргач, аста-секин ғалабалар ҳам кела бошлади. Аммо бу вақтга келиб анча кеч бўлиб қолган, «поезд», аниқроғи, «Локомотив» анча илгарилаб кетганди.

Буни қарангки, халқ орасида урфга айланган мана шу ўхшатиш ҳам якунланган мавсум чемпионлик учун кечган курашга анча мос келар экан...

Агар «Пахтакор» ва «Бунёдкор»даги ўзгаришлар анча илгари, масалан, мавсум бошланишидан олдин амалга оширилганда, «Локомотив» бу қадар осонликча чемпион бўлармиди?

Жавоби йўқ савол беришдан осони бор эканми? Аммо мана шу саволнинг ўзиёқ (унинг жавоб талаб қилмаслиги ҳам) «темирйўлчилар» учун келаси мавсум қай даражада мураккаб кечишини англатса керак...

ЯНГИ МАВСУМ

Ўзбекистон чемпионатининг келгуси мавсуми буткул бошқача ўтиши кутилмоқда. Бундай фикр билдиришнинг ўзига хос сабаблари бор. Биринчидан, энди олий лига деб номланадиган мусобақанинг ўзи йўқ. Бундан буёғига Суперлига баҳсларини томоша қиламиз.

Нима фарқи бор, дейсизми? Фарқ кўп. Масалан, янгича форматдаги турнирда 12та жамоа иштирок этиши белгилаб қў-йилган. Ғолибликка даъвогарлар эса аввалгидек икки эмас, тўрт марта ўзаро тўқнаш келишади.

Аммо «Локомотив»нинг яна ғолиб чиқиш эҳтимолини шубҳа остига қў-йишимизга сабаб фақат бунда эмас. Ҳаммамиз билиб турганимиздек, энди чемпионлик учун даъвогарлик қиладиган жамоалар анча кўпроқ бўлади.

Демак, ўз-ўзидан қизиқарли кечадиган ўйинлар сони ва рақобат ҳам ошади. «Локомотив» мухлисларидан узр сўраган ҳолда айтиш лозимки, бу клуб айнан шу борада жуда ҳам кучли эмас.

Айтайлик, бир йўла тўрт ёки бешта жамоа олтин медаллар учун курашса, «темирйўлчилар» анча қийналишади. Янги мавсумда эса чемпионликка даъвогарлар сони анча кўп бўлиши кутилмоқда.

«БУНЁДКОР»

Мана шундай даъвогарлардан бири - «Бунёдкор». Клуб узоқ йиллик янглиш қарорлардан сўнг яна Миржалол Қосимов билан «топишди».

Бу мураббий эса бир вақтлари энг номдор юлдузлар жамоадан кетганда ҳам «қалдирғочлар»ни Осиё Чемпионлар Лигаси ярим финалига қадар олиб чиқа олгани билан ёдда қолган.

Ривалдо, Луизао ва Жепаровсиз ҳам бу ишни уддалаш мумкинлигига бизни айнан Қосимов ишонтира олган. «Бунёдкор» ҳозир ҳам деярли шундай вазиятда. Миржалол Қўшоқовичда эса оғир ҳолатлардан чиқиб кетиш тажрибаси бор.

«Бунёдкор»нинг ҳозир молиявий қийинчиликлар гирдобида экани ҳақида гап-сўзлар юрибди. Бу хабарлар эса жамоага бўлган ишончга путур етказиши мумкин.

Аммо бир жиҳат - бошқарув Миржалол Қосимовга топширилганининг ўзиёқ кўп нарсани англатади. Ушбу мутахассис келдими, демак кураш ҳам шунга яраша бўлади.

Сергей Лушан даврида «Бунёдкор» жуда кучли ўйин намойиш этганини кўрганмиз, аммо ўша жамоанинг бир айби бор эди - битта ўйинни яхши ўтказса, кейинги учтасини барбод қиларди. Миржалол Қосимов эса барқарорликка эришиши орқали танилган.

«Бунёдкор» жорий мавсумнинг иккинчи ярмидаёқ анча рақобатбардош ўйин намойиш эта олди. Демак, келаси мавсумдан ҳам умид катта.

«НАСАФ»

Чемпионлик ҳақида гап кетаркан, нима учундир «Насаф» номи кўп тилга олинмайди. Аммо қаршиликларни ҳеч қачон ҳисобдан чиқариб қўймаслик лозим.

Тўғри, бу клуб ўз тарихида ҳали элитада ғолибликка асосий даъвогар сифатида кўрилмаган. Шунга монанд Рўзиқул Бердиев шогирдлари нари борса кумуш медалларни қўлга кирита олишган.

Аммо олий лига-2017нинг 29-турида «Насаф» ва «Пахтакор» ўртасида кечган ўйинни томоша қилган мухлислар келаси мавсумга бошқача назар билан қарашлари турган гап.

Зеро улар бир нарсага гувоҳ бўлишди - Қаршида ҳам чемпионликка даъво қила оладиган жамоа бор экан.

«Насаф»нинг ўйинига нима таъсир кўрсатишини айтиш қийин. Бир қарашда унинг таркибида бир неча йилдан буён елкама-елка тўп суриб келаётган футболчилар бор. Қолаверса, чемпионатнинг энг яхши легионерлари ҳам айнан Қаршида тўп суришган.

Бироқ барибир, «Насаф» энг асосий ўйинларни бой бериб қўяверади. Агар мана шу муаммони бартараф эта олса, ким билади дейсиз, балки Суперлиганинг дастлабки кубоги айнан воҳага кетар?!

«ПАХТАКОР»

«Пахтакор»нинг молиявий қийинчиликлари яқин тарихда қолиб кетди. Бир вақтлари унинг футболчилари ярим мавсум маош олмай ўйнаши мумкин эди. Аммо ҳозир вазият анча ўзгарган. Энди юртимизда «Пахтакор»дан қудратлироқ клуб бўлмаса керак.

Жамоа сармоядорлари барча муаммоларни бартараф этишди. Камига замонавий ва кўркам стадион қурилиши ҳақида расман хабар берилган. Бу эса «Пахтакор»нинг келажагига ишонч билан қараш имконини беради.

Албатта, ўзгаришлар фақат янги стадион барпо этиш билан чекланмайди. «Пахтакор» ёзги давралар оралиғидаёқ таркибни анча кучайтирганди.

Қишда ҳам қараб турмаслиги турган гап. Узунқулоқ гапларга қараганда, янги мавсум бошланиши олдидан жамоанинг деярли ярим таркиби алмашади.

Ҳар доимгидек, чемпионатнинг энг кучли футболчилари молиявий жиҳатдан қудратлироқ жамоа таркибида жам бўлишса керак. Кимдир бунга шубҳаланса, «Бунёдкор» ва «Локомотив» босиб ўтган йўлга қарасин.

Қолаверса «Пахтакор» учун ҳам бу тажриба бегона эмас, 2000 йиллар бошида мамлакатнинг энг кучли ўйинчилари айнан унинг сафидан ўрин олгандилар.

Боз устига, ПФЛ томонидан легионерлар лимити «3+1»дан «4+1»га ўзгартирилиши ҳам «Пахтакор»га қўл келиши муқаррар. Гўёки, бу қарор айнан «шерлар» манфаатини кўзлаб қабул қилингандек.

Боиси, ҳозир Суперлигада кучли легионерларни таклиф эта оладиган клублар у қадар кўп эмас. Демак, «Пахтакор» таркибига Европа ёки Жанубий Америкадан яна бир футболчи келиб қўшилишини ҳозирданоқ кутиш мумкин.

Бу эса келаси мавсум ғолиблик учун курашда катта ўрин тутишини тахмин қилиш қийин эмас.

ЯКУНДА

Хуллас, келаси мавсум «Локомотив» яна чемпионликни қўлга киритса, ишонинг, нафақат биз адашган бўламиз, балки чемпионатимиз савияси ҳам анча ошгани ойдинлашади.

Чунки «темирйўлчилар» бу ғолибликка «Бунёдкор», «Пахтакор», «Насаф» ва яна бошқа клубларга қарши кечадиган шиддатли курашда эришган бўладилар. Бу эса ўзбек футболи учун фақат фойда келтириши турган гап.

АБДУЛЛОҲ