Москванинг «Локомотив» клуби янги видеороликнинг ёпиқ намойишини ўтказди. Унда «темирйўлчилар»нинг Россиядаги сўнгги чемпионлиги қайд этилган мавсум - 2004 йилдан кейин туғилган ишқибозлар ҳақида сўз боради.

«Бу йил жамоамиз 95 йиллигини нишонламоқда ва муҳим санани муносиб тарзда нишонлаб, аудиторияни кенгайтириш ҳақида ўйладик, - дейди клуб президенти Илья Геркус. - Мана, ҳамманинг диққатини тортиш учун биринчи ўринга чиқишни уддаладик.

Ўйинларимизни томоша қилгани кўплаб оилалар, йигит ва қизларнинг ташриф буюраётгани қувонарли, албатта. Ўз навбатида, болакайларга ҳам эътибор қаратяпмиз: кичик ёшданоқ клубга ишқибозлик қилиш муҳим».

Роликнинг ёпиқ намойишига «Локомотив»нинг 7 нафар футболчиси ҳам ташриф буюрди. «Спорт-экспресс» нашри фурсатдан фойдаланиб, ушбу ўйинчилардан бири, Ўзбекистон терма жамоаси ҳимоячиси Виталий Денисовдан интервью олди.

«СЁМИН - АСГАРД ҲУКМДОРИ!»

Денисов кино ихлосманди сифатида «Адолат лигаси» фильмида Супермен ролини ижро этган актёр Генри Кевиллнинг мўйлови туфайли юзага келган тортишув ҳақида сўз юритди. Ҳозирча Виталий бу фильмни кўрганича йўқ, аммо бошқа бир суперқаҳрамон (ўзининг «эгизаги») тўғрисидаги янги блокбастерни ўтказиб юбориши мумкин эмасди.

- «Тор» фильмини кўргани бордим, албатта. Премьерага чақиришмаганидан эса, рости, ажабландим! - дейди Денисов юзида табассум билан. - «Марвел» студиясига тегишли персонажларнинг (комикслар асосида суратга олинган «Ўргимчак одам», «Темир одам», «Тор» ва шу каби бошқа киноасарлар қаҳрамонлари) барини ёқтираман. «Рагнарек» ҳам менга жуда маъқул келди. Ҳа, Асгарднинг (фильм жараёнлари қайд этиладиган тўқима олам) вайрон этилгани ачинарли. Янги қаҳрамонларнинг пайдо бўлгани эса айни муддао. Комикслар орқали Тор ва Локининг синглиси борлигини билардим, аммо уни экранда илк бор кўрдим. Қолаверса, мутойибага бой саҳналар кўпайибди - истеҳзо ва пичингларсиз, фақат қувноқлик. Баъзи ҳолатларда янги «Тор»даги юмор ўринли ишлатилган, айримларида эса ошириб юборилган. Умуман олганда эса, фильм жуда яхши чиққан. Маслаҳатим: киноман ва блогерларнинг қандай фикр билдираётганига эътибор қаратишмасин. Ўзимга қолса, бу фильмни икки ёки уч марта қайта кўришга тайёрман.

- Тор ўзгарибдими?

- Ҳа, соч турмагини қисқартирибди. Режаларимда ундан намуна олиш ҳам йўқ эмас! Саша Коломейцев ҳам бу борада ўз тавсиясини беришга улгурди: «Сен эски Торлигингча қолибсан, энди сочингни кестиришингга тўғри келади!».

- Сиз Тор бўлсангиз, у ҳолда Юрий Сёминни «Марвел» оламининг қайси персонажига ўхшатасиз?

- Катта эҳтимол билан у Асгард ҳукмдори - Один!

«ФАРФАНДА ФУТБОЛ ЎЙНАШ ИШТИЁҚИ КАТТА»

- Сёминнинг сири нимада? 70 ёшда бўлишига қарамай, ҳамон биринчи ўринда бормоқда.

- Агар бошқа мураббийлар сирдан воқиф бўлишганида, ундан ибрат олишарди! Ўйлашимча, ҳамма гап жамоа билан тўғри муносабатни йўлга қўйишда. Қолаверса, тажриба ҳам катта роль ўйнайди. Сёмин бугунги кунда Россиядаги энг кекса мураббийлардан бири. Ундан фақат Гаджиев катта бўлса керак. Шунингдек, у жуда ҳис-ҳаяжонга берилувчан. Жоиз топса, ҳамманинг таъзирини беришга тайёр туради. Хабаровскда ҳам бунга гувоҳ бўлишингиз мумкин эди.

- Ўтказиб юборилган гол учун танбеҳ олгандирсиз?

- Ҳа, ушбу ҳолатда бор айб менинг зиммамда. Тўпни марказ томон тепмаслик учун бошқа бир чора ўйлаб топишим керак эди, аммо уддалай олмадим: ортимда СКА ўйинчиси турганди. Бу гол - мени қийнаётган хатолар занжирининг бир қисми. Лекин барибир, уч очко бизга насиб қилди. Муҳими шу.

- Узоқ вақт захирадан чиқолмадингиз. Мана учта ўйиндирки, Сёмин сизга ишонч билдирмоқда. Бунинг сабабини биласизми?

- Бу саволингизга қуйидагича жавоб бераман: бугун ким ўйнашини, эртага қайси футболчи майдонга тушишини мураббий ҳал қилади. Эҳтимол, у янги тактик услубларни қўллаш пайида бўлган. Мен эса унга мос келгандирман. Жароҳат сабаб мавсум бошида кўплаб ўйинларни ўтказиб юбордим. Бу ҳолатнинг мураккаб эканлигини барча биларди ва сафга қайтганимдан сўнг майдонга туширишга бироз чўчишди.

- Сизнинг позициянгизда Михаил Лисов тўп сурди. 19 ёшли футболчи сизда қандай таассурот қолдирди?

- Миша ёш иқтидор соҳибларидан бири, ўсишда давом этиши зарур. Бунинг учун эса кўпроқ ўйин амалиёти керак бўлади.

- Фарфан уч ҳафта мобайнида дунёнинг ярмини кезиб чиққанига қарамай, ҳамон гол урмоқда. Буни қандай уддалаяпти?

- Жефдан «Аҳволинг яхшими?» деб сўрасам, у «Ҳаётимда биринчи марта шундай ҳолатга тушяпман», деди. Фарфанда футбол ўйнаш учун катта иштиёқ бор. Ўз навбатида, «Анжи»га қарши баҳсдан олдин унга дам олиш имконияти берилгани яхши бўлди. Узоқ парвозлардан сўнг майдонга тушиш машаққатли иш, ҳаттоки, Фарфан сингарилар учун ҳам. Ўзим шундай ҳолатга тушганман ва бу каби қийинчиликлардан хабардорман.

«ИСИНИШ ПАЙИДА БЎЛИШ ДАРКОР: АЁЗ ЯҚИН!»

- «СКА-Хабаровск» билан ўйиндан (2:1) қайтгач, неча соат ухладингиз?

- Ҳисоблаганим йўқ! Ҳа, ўша учрашув биз учун жуда қийин ўтди. Уйғонгач, худди уйқуга тўймаган айиқ сингари юрдим. Ҳамон турбулентлик ҳолатидан чиқиб кетолмаётгандек сездим ўзимни. Москвага қайтаётганимизда, самолётда атайин ухламасликка интилдим, вақт фарқини йўқотмаслик учун шундай қилдим.

- Ҳаво ҳарорати -30 бўлган пайтда футбол ўйнаш маъқулмикан?

- Афсуски, йўқ. СКА ва унинг ишқибозларини ранжитмоқчи эмасман, лекин бу ҳақиқатан жуда қийин. Биринчидан, узоқ вақт парвоз қилинади, бу пайтда танангиз ноодатий ҳолатга тушади. Иккинчидан - об-ҳаво. Бундай совуқда ўйнаш соғлиқ учун хавфли. Алексей Березуцкийдан сўраш керак, унинг аҳволи қандай экан? ЦСКА билан солиштирганда, биз тузукроқ шароитда тўп сурдик.

- Бундай ўйинлар ўтказилмаслиги керакми?

- Биз учун энди фарқи йўқ: келдик ва ғалаба қозондик. Аммо Хабаровскдаги баҳс яна шундай қаҳратонга тўғри келса, яхшиси, ўйнамаган маъқул. Чунки бу ёмон оқибатларга олиб келиши мумкин. Мен-ку, ҳар қандай шароитда тўп суришга тайрман. Аммо бундай ноқулай об-ҳаво ҳукм сурадиган минтақалардаги учрашувларни ёпиқ стадионда ўтказиш ёки захира ареналардан фойдаланишнинг наҳотки иложи топилмаса?!

- Сёмин ўйиндан сўнг Мануэл Фернандешнинг нафас йўлларини шамоллатиб қўйиши мумкинлигидан чўчиётганини айтганди. Худди Акинфеев сингари шарфлардан фойдаланиш ҳақида ўйламадингларми?

- Эҳтимол, дарвозабонларга бу борада тақиқ қўйилмагандир, аммо майдондаги ўйинчиларга шарф тақиш мумкин эмас. Учрашувдан сўнг нафақат Ману, балки жамоамизнинг бошқа аъзоларини ҳам йўтал қийнади. Бундай совуқда битта футболка ва шортикнинг ўзида югуриб кўрган ҳар қандай одамнинг нафас олиши қийинлашиши аниқ.

- Ўйиндан сўнг шароитнинг нақадар мураккаб эканлигини англаб етгандирсизлар?

- Албатта, қўллар, оёқлар, бурун «музлаб» қолди. Аммо мен яхшигина исиниб олдим, қўшимчасига термокийимда эдим. Махсус патак кийишни эса ўзим хоҳламадим, улар фақат халақит беради. Нима ҳам қила олардик, об-ҳавони назорат қилишнинг имкони йўқ. Москвада ҳам ҳозир жуда совуқ, исиниш пайида бўлиш керак. Аёз яқин!

«МАВСУМНИ «СПАРТАК»ДЕК ЯКУНЛАСАК, ХУРСАНД БЎЛАРДИМ»

- «Спартак» - «Зенит» баҳси ўтказилаётган паллада сизлар самолётдамидингиз?

- Ҳа, лекин у ерда воқеалар қандай ривож топаётганини билиш жуда қизиқ эди. Учувчи бизга ўша ўйин натижасини ошкор қилгач, ҳамма телефонини ёқиб, голларни кўришга ошиқди.

- «Локомотив» - чемпионми?

- Ҳар гал бу ҳақда сўрашганда кулгим қистайди. Ҳали ҳеч нарса ҳал бўлгани йўқ. Ҳозир экстрасенсларгина мавсумни биринчи поғонада якунлайдиган жамоа ҳақида сўз юритишлари мумкин. Қачонки, олтин медалларни тақсак, ўшанда бу мавзуда гаплашаверамиз.

- Қишки танаффусга чемпионлар сифатида чиқиш қандай экан?

- Агар бу ҳақда ўйлайверсак, хотиржамликка берилиб, ўйинимизни сусайтириб юборишимиз мумкин. Қолаверса, олдинда барча етакчиларга қарши ўзаро учрашувлар кутиб турибди. Имкон қадар турнир жадвалига қарамасликка интиляпман. Асосийси, ўз ўйинимизда ғалаба қозонсак бўлгани, қолганлар бир-бирлари билан беллашаверсинлар.

- «Локомотив» биринчи ўринни сақлаб қолиш учун нима қилиши керак?

- Жимгина шу йўсин ўйнашда давом этиши лозим. Яна бироз кучайса ҳам қарши эмасман. «Зенит» пешқадамлик қилаётганида, ҳамма Санкт-Петербург жамоасининг аниқ чемпионга айланиши ҳақида гапираётганди. Ҳаттоки, мавсум якунланишига икки-учта тур қолганда ҳам хотиржамликка берилиш асло ярамайди.

- Худди ўтган мавсум «Спартак»да бўлгани сингари, «Локомотив»нинг ҳам омади келяптими?

- Агар мавсумни «Спартак» каби кўтаринки кайфиятда якунлай олсак, бундан фақат хурсанд бўламан!

Ў.УМАРОВ тайёрлади