Бугун, 21 декабрь куни Ўзбекистон футбол федерациясининг янги раҳбарияти иш бошлаганига роппа-роса 100 кун тўлди. Бу қисқа вақт мобайнида, футболимизда жуда кўп янгиликлар ва ўзгаришларнинг гувоҳи бўлдик. Шулардан бири, Ўзбекистон футбол федерацияси учун янги логотип яратиш бўйича танловнинг ташкил қилинганидир.
Айтиш жоизки, ЎФФ логотипини ўзгартириш учун аввалги раҳбарият ҳам уриниб кўрган, бироқ, тақдим қилинган лойиҳалар талабга жавоб бермаганини рўкач қилиб, бу ғоядан воз кечган эди.
29 ноябрь куни янги танловнинг бошлангани эълон қилинди. 15 декабрь куни эса ЎФФ, Суперлига ва Про-лига логотиплари учун юборилган лойиҳалардан бештадан танлаб олиниб, халқ эътиборига ҳавола қилинди.
Номзодларга ishtirok.uz сайти орқали овоз бериш жараёни йўлга қўйилди. Бу жараён 15 декабрда бошланди ва 29 декабргача давом этади. ЎФФ ғолиб бўлганларни пул мукофоти ҳамда Iphone 7 смартфони билан тақдирлашга ваъда берди.
Танловнинг финал босқичига чиққан логотипларни кўздан кечирарканмиз, улардаги кўчирмачилик-плагиатлари майли (Франция ФФ логоси, Ўзбекистондаги футболга ихтисослашган нашрнинг логотипини дизайнидаги кўчиргани эса — нонсенс) уларда имловий хатоларнинг борлиги эътиборимизни тортди.
ЎФФ логотипи учун ажратиб олинган бешинчи лойиҳага назар соламиз. Унда Ўзбекистон байроғига монанд ранглар, ҳумо қушининг тимсоли ва UFA ёзувини кўриш мумкин. Қолган барча логотипларда UFF (Uzbekistan Football Federation) яъни ЎФФ аббревиатурасининг инглиз тилидаги талқини келтирилган. UFA нима эканини эса билмадик? Балки Uzbekistan Football Association'дир? Сайтнинг русча версиясини очиб кўрдик, ҳа тўғри, унда «Участники конкурса - АССОЦИАЦИЯ ФУТБОЛА УЗБЕКИСТАНА» (Ўзбекистон футбол ассоциацияси) деган ёзувни ўқиймиз.
Ажабо, бу Ўзбекистон футбол федерацияси логотипи танловими ёки биз билмаган Ўзбекистон футбол ассоциацияси?
Қизиғи шундаки, 21 декабрь ҳолатига, сўровномада 500га яқин овоз тўплаб, айнан шу логотип пешқадамлик қилмоқда.
Энди, собиқ Биринчи лига - янги Про-лига логотипларига эътибор қаратамиз.
Дастлабки иккита ва тўртинчи логотипда янги лиганинг номига ҳеч қандай ишора йўқ. Унда Профессионал Футбол Лигаси (ПФЛ) деб ёзилган. Бу олдинги ПФЛдан қайси жиҳатлари билан фарқ қилиши бизга қоронғу. Бундан ташқари, биринчи логотипда Ўзбекистон (O'zbekiston) сўзидаги апостроф тескари қўйилган, агар кириллчага ўгирилса, Оъзбекистон деган ёзувни беради.
Тасаввур қилайлик, агар UFA сўзи туширилган логотип ғолиб бўлса, ЎФФ нима қилади? Номини ўзгартирадими? Про-лига танловида Ўзбекистон сўзи хато ёзилган логотипнинг финалга чиқиши шармандалик эмасми?
Хулоса шуки, ЎФФ, Суперлига ва Про-лига логотипларининг финал иштирокчиларини танлаб олиш қўл учида қилингандек кўринмоқда. Уларнинг хатолардан холи бўлиши ва талабга жавоб беришига эътибор қаратилмаган.
Бугун ЎФФ сайтида янги раҳбариятнинг 100 кунлик фаолияти ҳақида катта мақола берилди. Унда бажарилган ишлар, янгиликлар, режалар тилга олинди. Ўз навбатида, уларнинг худди логотип танлови каби, қўл учида қилинмаганига, талабга жавоб беришига умид қиламиз.
Cардор Юсупов
Манба: www.kun.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20