Сўнгги пайтларда футбол жамоатчилигининг асосий эътибори Перуга қаратилди.

Тўғри, Швейцария, Шимолий Ирландия, Италия, Швеция, Хорватия, Греция, Австралия ва Янги Зеландия ҳам ўзига яраша фидойи, садоқатли мухлисларга эга.

Аммо ҳаттоки, Гондурас ҳам мағрур Кордильера чўққилари бағрига сингиб кетган кўҳна инклар авлодининг ўзига хос табиати, қадимий урф-одатларига тан беради.

Ҳозирда Перунинг ёшу-қариси телба футбол фанатига айланган. Айниқса, Янги Зеландия билан бўлган тўқнаш баҳслар даврида.

Терма жамоа аъзолари ҳал қилувчи беллашувга пухта ҳозирлик кўришлари учун Перуда ички чемпионат маълум муддатга тўхтатилди. Шу боис 11 соатлик парвоздан кейин Оклендда майдонга тушган футболчиларда ҳорғинлик аломатлари кузатилмади.

Албатта, мезбонлар ҳам перулик футболчиларнинг кўнглига ғулғула солиш мақсадида бор «ҳунар»­ларини кўрасатишди. Бироқ бу уринишлар меҳмонларга заррача таъсир кўрсатмади.

Фарфан ўз жамоадошлари билан дадил олға интилиб, рейдлар уюштирди, савлатли рақибларидан баландроқ сакрашга уринди. Тўп меҳмонлар ярим майдонига ўтганида эса Перу худди ўз майдонида тўп сураётгандек туюлди - иккита улкан секторни тўлдириб ўтирган қизил-оқ либосдаги мухлислар жамоани қўллаб-қувватлаб туришди.

Шу зайлда кечган ўйинда рақиб дарвозасини забт этиш на меҳмонлар ва на мезбонларга насиб этди - Янги Зеландия - Перу - 0:0. Оқибатда Россия мундиалининг сўнгги йўлланмаси тақдири Лимада аниқланадиган бўлди.

ЖОДУГАР ШОМОНЛАР КЎМАКЛАШИШДИ

Перуда футболга ошиқ бўлмаган киши қолмади. Охирги ойнинг ўзида терма жамоа футболкалари 3 млн.дан ортиқ нусхада савдо шахобчаларига етказиб берилди. Талаб эса пасайгани йўқ.

Термага тегишли қандайдир буюмни харид қилиш учун мухлислар узоқ вақт навбатда турадилар. Уларнинг аксарияти Перу охирги марта ЖЧда қатнашган пайт, яъни 1982 йили ҳали дунёга келмаган эдилар. Хуллас, қизиқишнинг бу қадар кучли бўлиши сабабини тушуниш қийин эмас.

Айтишларича, терма жамоанинг охирги тўсиқдан муваффақиятли ўтишида маҳаллий шомонлар яқиндан ёрдам берганлар. Улар Янги Зеландиядаги дастлабки беллашувда ҳам рақиб ўйинчиларини сеҳрлаш учун бор имкониятларини ишга солишганди.

Бундай ҳаракатлар саралаш босқичи арафасида ҳам амалга оши­рил­ганди.

ПРЕЗИДЕНТ РАҚСГА ТУШДИ

Ҳатто мамлакат раҳбари футбол фанатларининг терма жамоани қўллаб-қувватлаш йўлидаги оммавий ҳаракатларидан четда қолмади: Перу президенти Педро Пабло Кучински саройда ташкил этилган тадбирда бош вазир Мерседес Араос билан рақсга тушди.

Ҳарбий оркестр ва иштирокчилар «Перу чемпион!» ҳайқириғи билан жўр бўлиб туришди. Қўшимчасига, саралашнинг ҳал қилувчи баҳсларида жамоа­ни қўллаш учун давлат тасарруфидаги муассасалар хизматчиларга ишдан вақтлироқ кетиш имкониятини берди. Боиси, Колумбия билан бўлган учрашувнинг аҳамияти жуда катта эди.

ЧИЛИ ЧЕТДА ҚОЛДИ

Перулик футболчилар дастлабки топшириқни уддалашди - охирги турда Колумбия билан сулҳ имзолаб, Чили терма жамоасини Россия мундиалида қатнашиш имкониятидан маҳрум этишди. Тўғри, майдон текис, тўп думалоқ - истаган томонига думалаши, истаган дарвозадан жой олиши мумкин.

Бироқ томонлар дурангга эришиш учун майдоннинг ўзида очиқдан-очиқ келишиб олиши камдан-кам учрайдиган ҳодиса. Хуллас, колумбияликлар етакчиси Радамель Фалькао оғзини кафти билан беркитган ҳолда рақиб футболчиларига бирма-бир яқинлашиб, нималарнидир куюниб тушунтирди.

Бу пайт 1:1 ҳисоби қайд этилаётган, мазкур натижа Колумбияга ЖЧ йўлланмасини тўғридан-тўғри нақд қиладиган, Перу эса тўқнаш учрашувида иштирок этиш ҳуқуқини қўлга киритарди. Фалькао билан мулоқотдан кейин мезбонлар сардори Хосе Паоло Герреро жамоа­дошларини хотиржамликка чақирди.

Шундан ке­йин перуликлар кўпчилик бўлиб тўпни ўз назоратлари остига олишга ҳаракат қилишди. Меҳмонлар эса уни эгаллаб олишга ортиқча уринмадилар. Оқибатда, таблодаги ҳисоб ўзгаришсиз қолди. Учрашув якунлангач, дурангга онгли равишда эришилганини аксарият футболчилар тан олишди.

Ана шу келишилган ўйин Чили терма жамоасини мундиал иштирокчисига айлантириши мумкин эди.

Бироқ ФИФА унга ортиқча эътибор қаратмади. Перуликларни тўқнаш учрашувига олиб чиққан Хосе Гарреро эса Янги Зеландияга қарши баҳсларда иштирок этмади - Аргентина билан бўлган учрашувдан кейин допинг текширувидан ўтолмаган 33 ёшли ҳужумчи ФИФА томонидан 30 кунга дисквалификация қилинди.

Жазо янада қатъийлашиши мумкин. Герреро кокаин истеъмол қилганликда айбланмоқда. Дарвоқе, кокаин - Перу учун янгилик эмас. Март ойида ҳуқуқ-тартибот ходимлари 1,5 тонна оғуни қўлга олишганди.

ЭҲТИЁТ ЧОРАЛАРИ ЁРДАМ БЕРМАДИ

Тасодифий нохушликлардан йироқ бўлиш мақсадида Перу терма жамоаси имкон қадар эҳтиёт чораларини кўрганди. Айнан Аргентинага қарши баҳсга жамоа ҳатто ўз суви билан ташриф буюрди - заҳарланишдан қўрққани учун.

Қизиқ, уларни кимдир заҳарлаши мумкинлиги хусусидаги хавотир перуликларда қаердан пайдо бўлди? Бу борада ҳеч қандай маълумот йўқ. Лекин жамоа мундиал иштирокчисига айланиш учун астойдил интилгани аниқ.

АШАДДИЙ МУХЛИСЛАР

Перулик ишқибозлар учун шунчаки «ашаддий» иборасининг ўзи камлик қилади - улар чинакам телба фанатлар!

Ахир унчалик йирик бўлмаган мамлакатдан минг-минглаб мухлислар Оклендга келишди, 11000 км. йўл босиб! Ўз уйларидаги беллашувлар учун ажратилган 10000та чипта 700 000 киши ўртасида лотерея кўмагида тарқатилди.

Лимадаги 45000 ўринли стадион чинакам дошқозон кўринишини олди. Унга киролмаганлар эса телеэкран қаршисида михландилар. Ҳа, перуликларга қойил қолмасликнинг иложи йўқ.

Барча аҳолининг сўнгги беллашувдан баҳраманд бўлиши учун ҳатто дафн маросимлари иштирокчиларига ҳам шароит муҳайё этилди!