Статистика: сермаҳсуллик самараси

31.12.2017 00:22

743

Мавсум якунлари бўйича статистик маълумотларни келтиришда давом этамиз. Хусусан, гол+пас рўйхатида энг яхши кўрсаткичга эга футболчилар натижалари кўпчиликни қизиқтириши табиий.

Шундай экан, ҳам голеадорлик, ҳам ассистентлик борасида мақтовга муносиблар билан таништиришни жоиз билдик. Бундан ташқари, қўшимча тариқасида олий-лига-2017 якунлари бўйича бошқа қизиқарли фактларга ҳам тўхталдик.

ГОЛ+ПАС

Олий лига-2017 тўпурари, жорий йилнинг энг яхши футболчиси номига лойиқ кўрилган Марат Бикмаев бу борада ҳаммадан кўп балл тўплаб, пешқадамга айланди. Чемпионатда 26та гол урган «Локомотив» форварди 4 марта шерикларини самарали узатма билан таъминлаган.

Иккинчи поғонадан «Насаф» ҳужумчиси Драган Черан ўрин эгаллади. Черногориялик легионер рақиблар дарвозасини 19 марта ишғол қилгани ҳолда, жамоадошлари урган 4та голга ҳамммуаллиф бўлган.

«Бунёдкор» вакили Достон Ҳамдамов эса кучли учликка якун ясаб берди. «Қалдирғочлар» вингерининг ҳисобида 14та гол, 8та самарали узатма мавжуд.

Қуйидаги рўйхатдан «гол+пас» бўйича камида 10 ва ундан кўпроқ очко тўплаган футболчилар жой олишди.

«Гол-пас» бўйича энг юқори натижа қайд этганлар
№	Футболчи	Клуби	Гол+пас	Голлар	Паслар
1	Марат Бикмаев	Локомотив	30	26	4
2	Драган Черан	Насаф	23	19	4
3	Достон Ҳамдамов	Бунёдкор	22	14	8
4	Баҳром Абдураҳимов	Насаф	18	10	8
5	Санжар Рашидов	Сўғдиёна	16	14	2
6	Игорь Сергеев	Пахтакор	15	13	2
7	Зоҳид Абдуллаев	Металлург	15	12	3
8	Сардор Мирзаев	Локомотив	15	7	8
9	Жалолиддин Машарипов	Локомотив	15	6	9
10	Суҳроб Бердиев	Қўқон-1912	14	11	3
11	Иван Нагаев	Бухоро	14	10	4
12	Азиз Турғунбоев	Навбаҳор	14	8	6
13	Артур Геворкян	Қизилқум	14	5	9
14	Филипп Райевац	Қўқон-1912	12	7	5
15	Ихтиёр Тошпўлатов	Сўғдиёна	12	5	7
16	Бобур Абдухолиқов	Насаф	11	8	3
17	Мурод Холмуҳаммедов	Қўқон-1912	11	6	5
18	Жавоҳир Қаҳрамонов	Бухоро	11	5	6
19	Отабек Шукуров	Бунёдкор	11	5	6
20	Ҳумоюн Муртазоев	Машъал	10	8	2
21	Мурод Бобожонов	Локомотив	10	7	3
22	Зафар Тўраев	Машъал	10	6	4
23	Ойбек Қиличев	Навбаҳор	10	2	8

БИТТА ГОЛ КАМ

Якунига етган мавсумда 34 нафар футболчи «дубль» муаллифига айланишди. Хусусан, Ҳумоюн Муртазоев («Машъал») ва Мурод Бобожонов («Локомотив») иккита, Игорь Сергеев («Пахтакор») учта, Драган Черан («Насаф») тўртта учрашувда голлари сонини жуфтлаб қўйишган.

«Хет-трик» қайд этиш эса атиги уч нафар ўйинчига насиб қилди. «Металлург» ҳужумчиси Зоҳид Абдуллаев «Обод»га қарши кечган баҳсда шундай натижа қайд этган бўлса, «Қўқон-1912» вакили Суҳроб Бердиев айнан бекободликлар дарвозасини уч марта ишғол қилганди.

Шунингдек, чемпионат тўпурари, мавсумнинг энг яхши футболчиси Марат Бикмаев ҳам Самарқандда кечган «Динамо» билан ўйинда рақиб жамоа дарвозабонини уч марта ранжитганди. Бундан ташқари, Абдуллаев ва Бердиев бир мартадан «дубль» қайд этган бўлсалар, Бикмаев тўртта баҳсда иккита гол урган.

ПЕНАЛЬТИЧИЛАР

«Нуқта»дан зарба йўллаш ва ундан унумли фойдаланиш бўйича ҳам Марат Бикмаевга тенг келадигани топилмади. «Локомотив» рақиблари дарвозаси томон белгиланган 7та пенальтини ижро этган маҳоратли ҳужумчи 100 фоизлик кўрсаткичга эришиб, ўз номига голлар ёздириб қўйди.

«Қўқон-1912» сардори Мурод Холмуҳаммедов эса 5 марта 11 метрли жарима зарбасини ижро этиб, барчасини аниқ амалга оширди. Драган Черан ва Иван Нагаев эса бу ишни 4 мартадан самарали уддалашган. Игорь Сергеев, Игорь Йелич, Илҳом Юнусов ҳамда Санжар Рашидов учта пенальтини аниқ амалга оширишган.

Мазкур ҳолатда «Қизилқум» ва «Олмалиқ» вакили бир мартадан, «Сўғдиёна» сардори эса икки марта «нуқта»дан зарба йўллашда адашганини таъкидлаш жоиз. Шаҳзод Шайманов, Сардор Раҳмонов ва Шерзод Ҳакимовда 2тадан самарали пенальти мавжуд.

Шунингдек, 16 нафар футболчи бир мартадан пенальтини аниқ амалга оширган бўлсалар, яна 12 нафари 99 фоизлик имкониятдан унумли фойдалана билишмаган. Эътиборлиси, «Шўртан» ҳужумчиси Игорь Таран 2та ҳолатда «нуқта»дан зарба йўллашда адашган.

ЁШЛИК ВА ТАЖРИБА

Бу жадвалда эса гол уриш, ассистентлик қилиш, сариқ ва қизил карточкаларга муносиб кўрилган энг ёш ва тажрибали ўйинчилар ва уларнинг ёши бўйича маълумот келтирилган.

Кўрсаткич	Ёши	Футболчи
Энг ёш гол муаллифи	16,335	Остон Ўрунов
Энг тажрибали гол муаллифи	35,298	Темур Кападзе
Энг ёш ассистент	19,142	Суҳроб Нуруллоев
Энг тажрибали ассистент	36,104	Даврон Каримқулов
Энг ёш ўйинчи	16,260	Иброҳим Ғанихонов
Энг тажрибали ўйинчи	41,31	Акмал Холматов
«Сариқ» олган энг ёш ўйинчи	17,226	Ислом Кенжабоев
«Сариқ» олган энг тажрибали ўйинчи	37,308	Ҳикмат Ҳошимов
«Қизил» олган энг ёш ўйинчи	19,295	Исломжон Қобилов
«Қизил» олган энг тажрибали ўйинчи	33,353	Камолиддин Тожиев

ГОЛГА БОЙ 5 ДАҚИҚАЛИК

Бутун мавсум давом этган ҳолат чемпионат финишида ҳам сақланиб қолди: футболчилар асосан ўйиннинг сўнгги паллаларида дарвозаларни кўпроқ ишғол қилишди.

Эътиборлиси, 85-90-дақиқаларда урилган голлар сони жами 70тани ташкил этиб, бу борада сезиларли тафовут кузатилган. Қуйидаги инфографика орқали бунга ўзингиз ҳам гувоҳ бўлишингиз мумкин.