ОФК Осиё Чемпионлар Лигаси ҳамда ОФК кубогида иштирок этиш учун лицензиядан ўтганлар рўйхатини эълон қилганди. Бу йил Ўзбекистондан 17та клуб лицензиялаш бўйича ҳужжатларни ОФКга тақдим этганди.

Улардан 13таси текширувдан муваффақиятли ўтган бўлса, 4та клуб - «Қизилқум», «Сўғдиёна», «Обод» ва «Шўртан» талабни бажара олишмади. Бу жамоаларнинг бари якунига етган мавсумда олий лига баҳсларида иштирок этганди.

Аксинча, биринчи лига чемпиони сифатида элита йўлланмасини қўлга киритган «Цементчи» ҳам текширувдан ўтганлар сафида қайд этилди. Биз ушбу маълумот эълон қилингач, «Қизилқум» бош мураббийи Ҳамид Актамов билан учрашиб, ундан турли масалалар юзасидан интервью олдик.

Ҳамид аканинг айтишича, клуб фақат ОФК лицензиялашидан ўта олмаган ва бунга клуб ходими Самандар Боборажабовнинг ҳужжат топширишда «дедлайн»га улгурмагани сабаб бўлган. Эътиборлиси, раҳбарият бу ходимни дарҳол ишдан бўшатган.

- Ҳамид ака, «Қизилқум» ОФК лицензиялашидан ўта олмади. Айнан қайси йўналишларда муаммолар аниқланган?

- Лицензиялаш масаласида ҳеч қандай камчилик йўқ. Мазкур жараён шу ишларга масъул бўлган ходимимиз Германияга ўқишга кетган вақтга тўғри келиб қолди. Ўша пайт ОФК ойнаси очиқ эди. Афсуски, у олмон ўлкасидан туриб зарур ҳужжатларни интернетга жойлаштиришда бироз кечикди.

Айнан шу, айтиш жоиз бўлса, эътиборсизлик сабаб ОФК лицензиялашидан ўтолмадик. Лекин ПФЛ ўтказган лицензиялашдан муваффақиятли ўтганмиз. Шундан келиб чиқиб айтишим керакки, «Қизилқум» Суперлигада иштирок этади.

ОФКнинг бу қарори ПФЛга таъсир ўтказмайди, чунки у асосан келаси мавсум ОЧЛда иштирок этадиган «Локомотив», «Насаф» ва «Пахтакор»га тегишли. Насиб қилса, 2018 йилнинг март ойида лицензиялашдан ўтолмаган клублар учун қайта текширув ўтказилади. Ўшанда йўл қўйилган камчиликларни бартараф этамиз.

- Жамоангизда ечимини кутаётган муаммолар борлигини жуда яхши биласиз. Кўпроқ нималарга эътибор қаратиш керак?

- Муаммолар йўқ ҳисоби. Ҳамма шароитлар бор. Фақат бош ҳомийимиз келаси мавсум учун сметани тасдиқлаб бериши ҳамоно ишларни бошлаймиз.

- Тахминан қанча маблағ эвазига совринли ўринлар учун курашадиган рақобатбардош жамоа тузиш мумкин?

- Узр, бу саволга жавоб беролмайман.

- Ўтган мавсум жамоа ўз имконияти даражасида ўйнай олмади. Лекин «Қизилқум»нинг ички потенциали юқори эди...

- Бунинг ўзига яраша объектив ва субъектив сабаблари бор. Мавсумга юқори кайфиятда тайёргарлик кўргандик. Таркиб борасида ҳеч қандай муаммо йўқ эди.

Сиз айтгандек, рақобатбардош жамоа шакллантиргандик. Афсуски, 1-турдаёқ «Пахтакор»га ютқазиб, чемпионатни омадсиз бошладик. Илк ўйиндаги мағлубиятдан сўнг футболчиларнинг руҳияти тушиб кетди.

- Жамоанинг омадсиз иштирокига фақат 1-турдаги мағлубият сабабми?

- Қайсидир маънода, шундай деса ҳам бўлади. Ушбу мағлубиятдан кейин футболчиларнинг ўзига бўлган ишончи йўқолди, негадир ички муҳит ўзгарди. Йигитларимиз ўзларига келганда эса «Қўқон-1912»га имкониятни бой бериб қўйдик.

Кейин эса ўзи шундоқ ҳам таранг бўлиб турган вазият янада чигаллашди. Боз устига, мухлисларнинг бироз ўринсиз ҳақоратлари ўйинчиларга руҳий томондан салбий таъсир қилди.

- Бош мураббий сифатида вазиятни ижобий томонга ўзгартиришга интилдингизми? Балки бу йўлда сизга бирор нарса тўсқинлик қилгандир?

- Қўлимдан келганича ҳаракат қилдим. Қатор мағлубиятлардан сўнг «Бунёдкор»ни ўз уйида енгишни уддаладик. Бунинг натижасида оз бўлсада ўзимизга келиб олгандик. Аммо аксарият футболчилар юлдузга айланиб қолишди. Ана шундан кейин омад яна биздан юз ўгирди. Боз устига, ҳар куни босим остида ишладик.

- Мавсум якунлари жамоада муҳокама қилиндими? Бошқаларга ўрнак бўлиши учун ўша сиз айтган «юлдузлар»га нисбатан жазо қўлландими?

- Йиғилиш қилдик, йигитлар билан гаплашиб олдик. Фойдаси бўлади, деган умидда уларга вазиятни тушунтирдик. Лекин машғулотда бошқа муҳит, ўйинда эса мутлақо бошқа муҳит сақланиб қолаверди.

Ҳозир ўшанда бажарилган ҳар бир ишимизни таҳлил қиляпмиз. Ҳа, хатоларимиз ҳам йўқ эмас. Йилдан-йилга тажрибамиз ошиб боряпти. Насиб қилса, 2018 йилда ҳаммаси бошқача бўлади.

- Балки қайсидир футболчилар ички муҳитни бузишгандир?

- Ҳа, шунақаси ҳам бор. Қисқача айтганда, бизга кўз тегди. 2016 йили 6-ўринни эгаллагандик. Ўшанда йигитлар жуда яхши ўйин намойиш этишганди. Бу мавсум эса улар нима учун ўйнаётганликларини унутиб қўйишди.

Аксарият футболчиларимизнинг таъби нозик бўлиб қолган. Қисқаси, меҳнатни ташлаб қўйишган. Бундай бўлишига ёшликдаги тарбия сабаб, деб ўйлайман. ЎФФнинг янги раҳбарияти айнан шу жиҳатга эътибор қаратяпти. Яъни, клублардан футболчиларни ёшликданоқ янгича руҳиятда тарбиялашни талаб қилмоқда.

Федерация жуда тўғри иш тутди. Жуда кўп нарса ёшликдаги тарбияга боғлиқ эканлигига ўз тажрибамда гувоҳ бўлдим. Бу йил зўрға кучлилар сафидаги ўрнимизни сақлаб қолдик. Мана шундай ҳолатда кимга қийин, албатта, клуб раҳбарлари ва мураббийлар штабига.

- Жамоа ўша таъби нозик футболчилар билан хайрлашдими?

- Бу саволингизга ҳозир жавоб беролмайман.

- Якунига етган мавсумда «Қизилқум» ҳакамлардан азият чекмадими?

- Бизда бу мавзуда гапириш учун ҳуқуқ йўқ. Хатони ҳамиша ўзимиздан излаб келганмиз. Қайси ўйинларда ютқазган бўлсак, унда ҳакамларнинг хатосини кўрмадим. Демак, жиддий эътироз йўқ.

- Артур Геворкяннинг ўйини ҳақида қандай фикрдасиз? «Қизилқум» сардори ўз имконияти даражасидан паст ўйнамадими?

- Артур тажрибали, ўз ишига профессионал тарзда ёндашадиган футболчи. Шуни айтишим керакки, унинг ўтган мавсумда бизга кўп ёрдами тегди.

- У билан шартнома узайтириладими?

- Агар битим бандлари бўйича келишиб олсак, узайтирилади.

- Бу масалада унинг ўзи билан гаплашдингизми?

- Ҳа. Насиб қилса, у янги мавсумда ҳам «Қизилқум» шарафини ҳимоя қилади.

- Легионерлар ишончни оқлашдими?

- Фақат Артур!

- Қолганларда адашдик, деб ўйлайсизми?

- Шундай деса ҳам бўлади.

- Умуман, легионерларни сизларга ким тавсия қилади?

- Бу масала билан бош мураббий сифатида ўзим шуғулланаман.

- Келаси мавсум учун кўз остингизга олиб қўйган хорижлик футболчилар борми?

- Бор. ПФЛ томонидан легионерлар учун жорий қилинадиган 4}1 лимитидан тўлиқ фойдаланмоқчимиз.

- Ўтган мавсум ёшлар жамоасида ўзини кўрсатган футболчилар борми? Умуман, ўринбосарлар иштироки, мураббийларнинг ишидан қониқ-япсизми?

- Ёшлар таркиби асосий жамоага энг яқин резерв, яъни захира ҳисобланади. Шу маънода, биз бу жамоага алоҳида эътибор билан ёндашамиз. Мураббийлар яхши ишлашяпти.

Ўтган мавсум ўринбосарлар сафида ўзини ижобий томондан кўрсата олган 3-4 нафар футболчини асосий таркибга таклиф қилганман. Кейинги йили улардан умидим катта.

- Кимларни алоҳида тилга оласиз?

- Миржалол Қосимов, Бекзод Мирзамуродов, Виктор Григорьев, Мустафо Раҳматов каби ёш истеъдодлар ўз ўйинлари билан бугунги кунда асосий жамоада ўйнашга ҳақли эканликларини исботлашди. Албатта, уларга имкон берамиз.

- Жамоанинг футбол академиясини ташкил қилиш режаси борми?

- Футбол мактабимиз фаолият юритяпти. Академия ташкил этиш режаси ҳам йўқ эмас, ҳаракатлар бошлаб юборилган. Фақат озгина вақт керак, чунки бу иш катта маблағ талаб қилади.

- Янги мавсум учун режалар тасдиқландими?

- Албатта. Бир нечта ўқув-машғулот йиғинлари ташкил этилади. 20 декабрдан Навоийда тўпландик. Тайёргарлик жараёнида фақат маҳаллий футболчилар иштирок этишяпти. Хорижликлар иккинчи йиғинда сафимизга қўшилишади.

- Янги легионерлар ҳақида гапиряпсизми?

- Ҳа. Лекин ҳозирча уларнинг номларини ошкор қилолмайман. Таркибимизга келиб қўшилган куни бу ҳақда маълумот берамиз.

- Ўтган мавсум ўйнаган легионерларга жавоб бериб юборилдими?

- Худди шундай. Улар ўз ватанларига қайтиб кетишди.

- Жамоани кимлар расман тарк этди ва аксинча, қайси футболчилар машғулотларга кўрик учун келиб қўшилдилар?

- Қарши бўлмасангиз, бу саволга кейинги йиғинимиз олдидан жавоб берсам. Чунки ҳозир мазкур йўналишда иш олиб боряпмиз ва ечимини кутаётган баъзи масалалар ҳам йўқ эмас.

- Ўтган мавсум учун тўлиқ ҳисоб-китоб ишлари амалга оширилдими? Қарздорлик йўқми?

- Очиғини айтаман, озгина қарздорлик қолган. Янги йил байрамигача бу масала ижобий ҳал этилади.

- Олий лигада 12та жамоа қолдирилишига муносабатингиз қандай?

- Менимча, яхши бўлди. Бунинг натижасида чемпионатимиз кучаяди. Ўйинлар кескин ва қизиқарли руҳда кечади. Ахир мухлислар ҳам шундай футболни хоҳлашади-ку, тўғрими?

- «Қизилқум» ана шу кучли рақобатга тайёрми, жамоа унга дош бера оладими?

- Рақобатга тайёрмиз. Таркибни шунга яраша кучайтирамиз.

- Хорижда йиғин ўтказиладими?

- Ҳа, шундай режа бор. Февраль ойида Туркияга сафар уюштирмоқчимиз. У ерда бир нечта ўртоқлик учрашувлари ташкиллаймиз. Легионерларни айнан шу йиғинимизда яна бир бор назоратдан ўтказиб, якуний хулосага келамиз.

- Ҳамид ака, мураббийлар штабида сизга кимлар ёрдам беряпти? Ўзгариш бўлмайдими?

- Йўқ. Ҳозир менга кўмаклашаётган Ислом Аҳмедов, Юрий Лукин ва Григорий Цейтлин билан ҳамкорликни давом эттирамиз.

- Қайси мураббийларнинг иш услубини кузатиб, ўрганиб борасиз?

- Миржалол Қосимовга ҳурматим баланд. Айнан унинг услубини кузатиб бораман.

- Қаттиққўл мураббиймисиз?

- Унчалик эмас. Сабаби, профессионал футболчилар билан ишлайман. Уларнинг аксарияти пул учун тўп суради, деб ўйлайман.

- Сиз ҳақингизда маълумотлар кўп эмас...

- Футболга келишим тарихи жуда ҳам узоқ. Қисқача айтадиган бўлсам, иккинчи лигадан то бугунги кун, яъни бош мураббийликкача бўлган машаққатли йўлни босиб ўтганман.

Ҳозирги жамоам билан тўрт йил 2-лигада, икки йил 1-лигада иштирок этдик. Иккинчи давра бошида 7 очко билан турнир жадвалининг энг охирида юрган жамоани кучлилар сафида олиб қолишга эришдик. 2013 йили «Қизилқум»ни Зарафшондан Навоийга олиб келиб, янги жамоа шакллантирдик.

Ўшандан бери шу клубда ишлаб келяпман. Ҳали олдимизда қиладиган ишларимиз бисёр. Инфратузилмани янги босқичга олиб чиқишни режалаштирганмиз.

Замонавий стадион бунёд этдик, унинг чими ҳавас қиладиган даражада. Бугунги кунда майдонимиз сифат даражасига кўра Ўзбекистонда кучли тўртликка киради. Буларнинг барига жуда кўп меҳнат сарфланди.

Камолиддин АЛИМОВ суҳбатлашди