Тоголик Эммануэль Адебайор эсингиздами? АПЛ ўйинларида ҳам голеадорлик қобилиятини намойиш эта олган ҳужумчи айни пайт Туркия Супер-лигаси турнир жадвалини «сенсацион» равишда бошқараётган «Истанбул Башакшеҳир» клуби шарафини ҳимоя қиляпти.
Фахрий футболчи маҳаллий Hurriyet нашрига берган интервьюсида турк диёрида қандай пайдо бўлгани ҳақида тўхталиш баробарида «Зенит» устози Роберто Манчинини бошқаларга қараганда, ёмонроқ мураббий ўрнида кўришини яширмади.
Хўш, нега? Қизиқсангиз, Адебайор билан суҳбатнинг энг қизиқарли жиҳатларига эътибор қаратинг...
- Одатий савол: нега айнан Туркия вариантини танладингиз?
- Дастлаб «Лион», кейин «Бешиктош» вакиллари энг сўнгги лаҳзаларда хизматимдан фойдаланиш фикридан қайтишди. Хуллас, самолётга аслида «Бешиктош» орзусида ўтиргандим, охир-оқибат, «Башакшеҳир» сафига қўшилдим.
Очиғи, бошида қаттиқ ўйга чўмгандим: «Ўзи бу қандай жамоа?» Муҳими, клуб президенти Гексел Гюмюшдаг билан илк учрашувдан кейиноқ ҳеч қандай саволга ўрин қолмади.
- Фаолиятингизга нуқта қўйгач, мураббий сифатида ишлашни режалаштираётгандирсиз...
- Йўқ, футболдан четга чиқаман. Биринчи навбатда, дунё бўйлаб саёҳатга чиқмоқчиман. Дейлик, ёшларга фаолият йўлим ҳақида гапириб бериб, уларда футболга қизиқишни кучайтиришим мумкин.
Ўйлайманки, футболдаги ҳаётим кимларгадир намуна бўлишга арзийди. Умуман, бутсаларимни михга илгач, ҳаёт лаззатларидан тўлиқ баҳра олиб яшаш ниятидаман.
- Кўплаб мураббийлар билан бирга ишлагансиз. Улар ҳақида нима дея оласиз?
- Дешам - ғолиблик руҳига туйинган мутахассис, Венгер -профессор. Айнан у ҳаётимда катта из қолдирди. Манчини эса мен билган энг ёмон мураббий - машғулотлар жараёнида нафратимни қўзғатган.
Моуриньо - энг яхшиси, ўз ишининг чин фанати. Реднапп менга отадек эди, фантастик инсон. Виллаш-Боашга эса бироз билим етишмайди. Шервуд - у билан яна бажонидил ишлаган бўлардим.
- Европанинг топ-клубларида ўйнаганингизга қарамай, иқтидорингизни борича кўрсатолмадингиз. Қизиқ, шахсан ўзингиз барчасидан қониқдингизми?
- «Реал» ва «Арсенал» каби клубларда ўйнаганим кўп нарсани англатади. Ёшлигимда бу ҳақда фақат орзу қилардим, холос. Ҳа, футболда муносиб из қолдирдим, эҳтимол, ҳаттоки, «Олтин тўп»ни қўлга киритишим ҳам мумкин эди. Бироқ насиб қилмади. Яна нима дердим...? Ҳали майдондаман ва катта ғалабалар орзусида ҳаракатни давом эттиряпман.
- Айнан қайси клубдан кетиш оғирроқ кечганди?
- «Кристал Пэлас»дан. «Арсенал», «Реал» ва «Тоттенхэм»да доимий равишда гол урардим, «Кристал Пэ-лас»да эса бундай бўлмади. Мени шу ҳолат кўпроқ ранжитди ва ҳанузгача омадсизлик сабабини тушунганим йўқ.
- Энди футболга кириб келишингиз тарихини сўзлаб берсангиз.
- Африкалик ҳар қандай болакай каби кичиклигимда тўп ортидан югуриб чарчамасдим. Биринчи мурабби-йим Камелио Акуса кейинчалик «Мец» спорт директори билан танишиб, унга мени тавсия этди.
Бу борада омадим чопган. Францияда ҳаракатларимни кузатиб, мени ҳаттоки, Нванкво Кану билан таққослагандилар. «Мец»да бироз ўйнагач, «Монако»га ўтдим. Ўша пайт клуб сафида Нонда, Жюли, Ротен ва Морьентес кабилар тўп суришарди. Хуллас, асосан захирадан майдонга тушиш билан чекландим.
Кейин «Арсенал» таклифини қабул қилиб, Лондонда ажойиб 3 йилни ўтказдим. Бироқ алал-оқибат, раҳбарият мени ортиқча кўрди ва Марк Хьюз бошқарувидаги «Манчестер Сити» сафига қўшилдим. Бош мураббий лавозимига Манчини келгунига қадар ҳаммаси яхши кетаётганди.
Афсуски, италиялик мутахассис билан келишолмадим ва яна янги клуб қидиришимга тўғри келди. Шу орада ижара келишуви асосида «Реал» ва «Тоттенхэм» шарафини ҳимоя қилдим. «Тақачилар» бошқарувига Виллаш-Боаш келгач, иш жойимни яна ўзгартирдим. Кейин «Кристалл Пэлас»га ўтдим, ярим йил уйда ўтирдим. Мана, энди Туркиядаман.
- «Башакшеҳир» устози Абдулла Авжи сиз билан ишлаган мураббийлар рейтингида нечанчи ўринга муносиб?
- У энг яхшиларидан бири. Дейлик, ўйин ва футболчиларга муносабати, ғояларни тушунтириши - барчаси юқори даражада. Авжининг асосий ютуғи - қайси рақибга қарши майдонга тушсак, унга мос стратегия ишлаб чиқади.
- Бутун фаолиятингиз давомида биттагина соврин ютгансиз - Испания кубоги. Энди «Башакшеҳир» билан бу кемтикни тўлдира оласизми?
- Ҳозир айнан қандай соврин ютишимиз мумкинлиги ҳақида гапиришим ноўрин. Лекин асосий мақсад шу. Профессионал футболчиман, демак, жамоа муваффақияти йўлида бор кучимни сарфлашим тайин. Чемпионлик қайси клубга насиб этишини эса май ойида кўрамиз.
- Сизнингча, замонамизнинг энг кучли футболчиси ким - Мессими ёки Роналду?
- Роналду. У билан бирга ўйнаганман ва нималарга қодирлигини яхши биламан. Чинакам темир ирода соҳиби, мудом ўз устида ишлайди. Ҳамма машғулотларга соат 10да келганида, у аллақачон шуғулланишни бошлаб юборган бўларди.
1 соат ўрнига 3-4 соат тер тўкарди. Яна бир фантастик ўйинчи - Ибрагимович. Албатта, Месси ҳам энг яхшилардан. Аммо мен учун энг зўри - Роналду.
Манба: «ССФ»
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20