Қайднома

Қидирув

Ҳар хил ўйинлар ёхуд олимпиачиларимизнинг Осиё чемпионатидаги ўйинлари таҳлили

Ҳар хил ўйинлар ёхуд олимпиачиларимизнинг Осиё чемпионатидаги ўйинлари таҳлили

  01.02.2018 00:14
  0
  1549
Ҳар хил ўйинлар ёхуд олимпиачиларимизнинг Осиё чемпионатидаги ўйинлари таҳлили

Ўзбекистон ёшлари Осиё чемпионати ярим финалида Жанубий Корея термасини йирик - 4:1 ҳисобида мағлубиятга учратгандан сўнг мухлислардан кимдир «Твиттер»да шундай изоҳ қолдирибди: «Ўзбек футболини ақл билан тушуниб бўлмайди».

Бу гапга нима сабаб бўлганини ўзингиз ҳам яхши тушуниб турибсиз - ёшларимиз қитъа биринчилигида шу қадар турлича ўйин намойиш қилишдики, нима дейишга ҳам ҳайрон қоласиз. Бир томондан, гуруҳ босқичидаги тушунарсиз ўйиндан юраклар сиқилиб кетди.

Бошқа томонлама эса, чорак финалда Япония ва ярим финалда Жанубий Корея нафақат йирик ҳисобда, балки жуда чиройли ўйин эвазига мағлуб этилди ва кўнгиллар чароғон бўлди. Хўш, бундай жамоа ҳақида қандай фикр билдириш мумкин?

Албатта, ҳар кимнинг ўз фикри бўлади ва уни ўзгартиришга уриниш, юмшоқ қилиб айтганда, маъқулланмайди. Шунга монанд Ўзбекистон ёшлар термаси ҳақида ҳамма ўз фикрида қолаверади.

Биз эса, шунчаки, финалгача ўтказилган учрашувларни таҳлил қилишга уриниб кўрамиз. Гуруҳдаги илк баҳс эса Қатар ёшларига қарши ўтказилди.

ҚАТАР

Аслида, Равшан Ҳайдаров шогирдларининг ўйинига бўлган иккиламчи қарашларга сабаб ҳам айнан Қатарга қарши кечган ўйиндан сўнг юзага келди. Бу учрашув мусобақадаги илк баҳс бўлгани туфайли унга қизиқиш юқори бўлди ва илк таассурот ҳам айнан у орқали чиқарилиши табиий ҳол.

Мухлислар жамоани яхши билишмасди, чунки Ўзбекистон ёшлар термаси иштирокида яқин орада расмий ўйин ўтказилмаганди. Таиландда бўлиб ўтган «М-150» мусобақаси эса юртимизда намойиш этилмади. Табиийки, мухлислар Осиё чемпионатидаги илк учрашувни интиқлик билан кутишди. Бу ўйин барча саволларга жавоб бериши керак эди. Амалда эса бирорта ҳам саволга жавоб тополмадик.

Ўзбекистон ёшлари баҳсни анча фаол бошлашди. Аммо қатарликлар ҳимояда ишончли ўйин намо-йиш этишди ва ҳадеганда гол уришнинг имкони бўлмади. Қатар термасини анча вақтдан буён испаниялик мураббий Феликс Бас бошқариб келмоқда. Тан олиш лозим, бу мутахассис ушбу мамлакат футболига Испания ҳавосини олиб кира олибди.

Биз шу вақтга қадар араб жамоалари натижа учун бундай ишончли ўйин намойиш эта олишганини кўрмагандик. Балки айнан шу сабабдир, Равшан Ҳайдаров шогирдлари иккинчи бўлимга келиб ўз ўйинларини бироз йўқотиб қўйишди. 55-дақиқада Али томонидан ҳисоб очилгандан сўнг эса парокандалик янада кучайиб кетди.

Аслида, бундай вақтда ҳисобда ортда бораётган жамоа вазиятни ўнглаш учун олдинга ташланиши лозим. Аммо бизникилар ҳатто ҳимояни ҳам аранг уддалаб туришди. Айнан мана шу баҳс жамоа ҳақида танқидий фикрлар туғилишига олиб келди. Ҳатто илк учрашувдан сўнг гуруҳдан чиқишимизга ишонч йўқолиб қолишига ҳам шу сабаб бўлди.

ХИТОЙ

Аммо Қатарга қарши кечган ўйин Хитой билан бўлиб ўтгани олдида «ҳолва» бўлиб чиқди. Балки бу ўхшатиш у қадар тўғри эмасдир, аммо Ўзбекистон ёшлар термасининг энг ёмон ўйини айнан мезбонларга қарши ўтказилди. Гарчи бу баҳсда ёшларимиз 1:0 ҳисобида ғалабага эришган бўлсаларда, таъкидлаш жоиз, ҳимоядаги таҳликали ҳаракатлар анчагина асаб толаларимиз узилишига сабаб бўлди.

Ўзбекистон ёшлари Хитойга қарши кечган баҳсни ҳам имкон қадар фаол бошлашга ҳаракат қилишди. Аммо Ҳожиакбар Алижонов томонидан тезкор гол уриб олинганидан сўнг жамоа ўйинига биз тугул анча-мунча мутахассислар ҳам тушунмай қолишди. Бир томондан, гол урган жамоа ҳимояда ўйнаши табиий ҳол.

Бундай вақтда мавжуд устунликни сақлаб қолиш ва қарши ҳужумдан ҳисобни янада оширишга эътибор қаратилади. Аммо Равшан Ҳайдаров шогирдлари мудофаада шу қадар бетартиб ўйин намойиш қилишдики, худди майдонда терма эмас, бирор коллеж жамоаси ўйнаётгандек тасаввур уйғонди.

Биринчидан, ярим ҳимоячилар тугул ягона ҳужумчи - Забиҳилло Ўринбоев ҳам ҳимояга ёрдамга етиб келди. Иккинчидан эса, ҳимоячилар тўпни эгаллаб олгани ҳамоно яқин-атрофида рақиб футболчиларидан ҳеч ким бўлмаса ҳам ўзаро пас ташлаш орқали ўйин тизгинини ўз қўлига олиш ўрнига, кўр-кўрона жарима майдончасидан узоқлаштириш пайида бўлишди.

Бу эса ташаббус тўлиғича Хитой томонига ўтиб кетишига сабаб бўлди. Бизнинг ҳимоячилар тепиб юборган тўпни хитойликлар бамайлихотир ўзига ўнглаб олиб, қайта ва қайта ҳужум ташкил этишди.

Бахтимизга рақиб таркибида ишончлироқ ўйин намойиш этадиган ҳужумчи топилмади. Акс ҳолда, ўзбек футболи тарихидаги энг муваффақиятли мусобақалардан бири биз учун гуруҳ босқичи тугамай туриб якунланиши ҳеч гап эмасди.

УММОН

Хитой устидан минимал ҳисобда қозонилган ғалабадан сўнг Ўзбекистон ёшлар терма жамоасида гуруҳдан чиқиш учун яхши имконият пайдо бўлди. Аммо бу имкониятдан фойдаланиш учун Уммонни мағлубиятга учратиш талаб этиларди.

Бир ҳисобдан бу у қадар мушкул иш эмасдек туюлиши мумкин. Чунки Уммон бунга қадар Хитой ва Қатардан мағлубиятга учрашга улгурганди. Аммо ҳамма гап шундаки, ҳатто шунда ҳам улар гуруҳдан чиқиш имкониятини йўқотишмаганди. Шу боис бўлса керак, ўйин анча мураккаб ўтди.

Ўзбекистон ёшлар терма жамоаси аввалги икки учрашувда ҳеч бўлмаганда дастлабки дақиқаларда фаол бўлишга интилганди. Уммонга қарши кечган ўйинда эса ҳатто дастлабки дақиқалар ҳам эҳтиёткор руҳда ўтди.

Равшан Ҳайдаров ўйин олдидан шогирдларига қандай кўрсатма бергани бизга қоронғу, аммо футболчилар голдан ҳам кўра ўз дарвозаси дахлсизлигини кўпроқ ўйлагандек кўринди. Ҳатто учрашувдаги ягона гол ҳам анча мужмал тусда урилди: бурчак тўпидан сўнг Уммон дарвозаси олдида кўпкарини эслатиб юборадиган ҳолат юзага келди.

Бундай талотўпда тўпни дарвоза чизиғидан ким ўтказа олганини эса кўриб олиш имкони бўлмади. Ҳар ҳолда, Достон Турсунов ҳаммадан кўра фаолроқ нишонлагани учун гол унинг ҳисобига ёзилди. Аммо баъзиларнинг даъво қилишича, рақиб ҳимоячиларидан бири автогол соҳиби бўлиши ҳам мумкин эди.

ГУРУҲ БОСҚИЧИ ҲАҚИДА

Бир сўз билан айтганда, Хитойда бўлиб ўтган Осиё чемпионати гуруҳ босқичи ҳақида яхши таассуротдан кўра ёмони кўпроқ бўлди. Ўзбекистон ёшлар терма жамоаси гуруҳдан иккинчи ўрин билан чиқди ва энг ёмони - ишончли ўйин намойиш эта олмади.

Таркибда иқтидорли футболчилар кўп эди - Достон Ҳамдамов, Жавоҳир Сиддиқов, Одил Ҳамробеков, Азиз Ғаниев, Бобур Абдухолиқов. Аммо ўйин шунга яраша бўлмади. Ўзбекистон ёшлар терма жамоаси ўйини анча сўниқ кайфиятда кечди. Ҳужумдаги уқувсизлик ва ҳимоядаги саросима эса дилни анча хира қилди.

Очиғи, бунақа ўйин билан чорак финалдан кўп нарса умид қилмагандик. Боз устига, рақиб ҳам Япония ёшлар терма жамоаси эди. Балки шу сабабдир, чорак финал олдидан мухлислар орасида у қадар катта шов-шув ҳам кузатилмади.

Билъакс, аксарият ишқибозлар японлар мусобақага 20 ёшли футболчилар билан келишганини рўкач қилиб, ўйин-га бўлган қизиқишни янада пасайтиришга уринишди. Аммо бевосита учрашувга келсак...

ЯПОНИЯ

Ўзбекистон ёшлар терма жамоасининг асл кучини айнан «кунчиқар юрт» вакилларига қарши кечган баҳсда кўрдик. Бу учрашув тўлиғича Равшан Ҳайдаров шогирдларига аталди. Мураббий жамоани ўзгартириш учун нима қилганини билмаймиз, аммо факт шундаки, гуруҳ босқичидаги Ўзбекистон ёшлар термаси билан «плей-офф»даги жамоани мутлақо таниб бўлмасди.

Ниҳоят, ўша ўзимиз истаган ҳужумкор, шиддатли ўйинга гувоҳ бўлдик. Жавоҳир Сиддиқов майдон марказида ўйинни қай тариқа бошқаришини кўрдик. Достон Ҳамдамов ва Жасур Яхшибоевлар майдонга нима учун тушишганини тушуниб етдик. Рустам Ашурматов эса ҳимоядаги ўйини билан яқин келажакда миллий терма жамоа эшигини ҳам тақиллата олишини исботлади.

Ўзбекистон ёшлари Японияга қарши кечган баҳсда рақибга ҳеч қандай имконият қолдиришмади. Бу қадар чорасиз японларни нафақат бизга қарши ўйинда, балки умуман кўрмагандик. Одатда, Япония деганда кўз олдимизга чапдаст ва тезкор футболчилар келади. Аммо бу сафар барча яхши сифатлар фақат Ўзбекистон ёшлар термаси томонидан кўрсатилди.

Бироқ ҳатто шу ўйиндан сўнг ҳам кўнгилда кичик шубҳа қолганди - нима бўлганда ҳам, «кунчиқар юрт» вакиллари Осиё чемпионатига кичик ёшдаги футболчилар билан келишганди. Шундай экан, барчаси ярим финалда Жанубий Кореяга қарши кечадиган ўйинга қараб қолганди.

ЖАНУБИЙ КОРЕЯ

Агар Японияни шубҳасиз, қитъанинг энг кучли жамоаси, деб билсак, Жанубий Кореяга келганда бу фикрни бироз ўзгартириш мумкин. Яқин тарихда шундай ўйинлар бўлганки, салгина уринсак, уларни мағлуб этиш мумкиндек туюларди. Ниҳоят, мана шу ният ёшлар ўртасидаги Осиё чемпионатида амалга ошди.

Агар Япония билан бўлиб ўтган чорак финал баҳсида рақиб ёш эканини рўкач қилишган бўлса, Жанубий Кореяга қарши кечган ўйиндан сўнг танқидчиларда ҳеч қандай баҳона қолмади.

Ҳа, бу жамоа дарҳақиқат, қитъада тенгсиз бўлишга қодир эди. Ўзбекистон ёшлар терма жамоаси ярим финалда шу қадар ёрқин ўйин намойиш этдики, худди майдонда фақат битта жамоа ўйнаётгандек таассурот қолди.

Мухлислар кайфияти эса ҳатто кореяликларнинг жавоб голидан сўнг ҳам тушмади. Чунки бундай ўйин вақтида кайфият тушиши асло мумкин эмасди. «Шундай ўйин билан мағлубиятга учрашса ҳам розиман», - деди мухлислардан бири ҳисоб тенглашгандан сўнг.

Дарҳақиқат, бундай чиройли ўйин кўрсатган жамоага бирор эътироз билдиришнинг ўзи нотўғри бўларди. Аммо Ўзбекистон ёшлари мазкур баҳсни ҳам охирига қадар олиб бориб қўйишди - Жанубий Корея дарвозасига ҳам тўртта тўп киритилди.

ФАРҚ НИМАДА?

Албатта, бундай вақтда бир савол туғилади: Ўзбекистон ёшлар термаси нима учун бу қадар бир-биридан фарқ қиладиган ўйинлар намойиш қилди? Нима сабабдан гуруҳда шу қадар кайфиятсиз кўринган жамоа «плей-офф»га келиб даҳшатли ўйин намойиш этиб юборди? Бу саволларга истаганча жавоб бериш мумкин. Сабаблари эса турлича бўлиб чиқади.

Биринчидан, Ўзбекистон ёшлари мусобақага етарлича тайёргарлик кўра олишмади. Таиландда ўтказилган халқаро мусобақада ғолиб чиқиш вазифасини бажариш чоғида барча футболчиларни кўздан кечириш имкони бўлмади.

Тошкентдаги йиғинда эса кучли рақибларга қарши ўртоқлик ўйинлари ташкилланмади. Бу эса, табиийки, тайёргарлик жараёнига путур етказди. Натижада терма жамоа ўйиндан-ўйинга шаклланиб боришга мажбур бўлди.

Иккинчидан эса, Қатарга қарши кечган дастлабки баҳсдаги мағлубиятдан сўнг оғир босим юзага келди. Бундай вақтда мураббийлар штаби футболчилардан эҳтиёт бўлишни талаб қилишади. Бу эса ўз-ўзидан ўйинга ҳам таъсир ўтказади.

Гуруҳ босқичи ортда қолгандан сўнг эса Ўзбекистон ёшлар терма жамоаси эркин ўйин намойиш этди. Бундан қандай хулоса чиқариш мумкин? Демак, бизнинг футболчилар ҳимояда эмас, ҳужумда ўзларини яхшироқ ҳис қилишади.

Зафар ҚОСИМОВ


Манба: www.interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

Жамоа Ў О
тўлиқ маълумот »
  • ЎФФ ва ПФЛнинг янги раҳбарияти олиб бораётган ислоҳотларга қандай баҳо берасиз?


© "Interfutbol.UZ". © 2006-2018. Мобил версия
Сайт материалларидан тўлиқ ёки қисман фойдаланилганда веб-сайт манзили кўрсатилиши шарт!
Барча ҳуқуқлар амалдаги қонунчиликка биноан ҳимояланган.